1 Timotì 5 - Ŋwàʼlè ə̀ Fèzhə̀ Mkâyn Mə̂ Fèm

Ndom vɛ ə kaʼa kyi ə̀zhwi ə kwughe ə ndɛ ə̀ Fèzhə̀

¹ M pìə sê ghò nə kə ò nə nə̂ ò wàmnə̀ sê wùə ndumə sə atyaʼ. Ə ò wàmnə̀, ò njìə kə nâʼà vəyn kə pɨ̀a vɛ̂vè. Ò piə ò nə̀ èghɛ sê kwuŋte, ndumə̂ tsɛ̂ ghənə, ò njìə ghənə kə ə ghɔnɛ̂ghe ndômə̀ghè.

² Ò njîə ə̀zəyn ə nduməghe kə nyì ghɛghe, njìə sèngɔ̀yn kə ghɔnyì ghɛghe zəynghe. Kə ò nə ndəʼ kwaʼtè se nə̀yn ə pi ghâyn ghə̀ ghənə nâʼà endom vîve.

³ Ghàyn e tɔ̂ʼnə̀ è zhwiə kwuə ghɛ ə ghe ndɨŋ kyi va.

⁴ Pîza, ə zhwiə kwu kyi ghɔnə, kɨ̀sə ghɔ ghɔnə, o nə̀ ə ghənə zaʼle sə̂ nə̂ ə̀ghɛ ghɛ ə ghɨ ə poməghe kyi sə̂ nə̂, sə tɔ̂ʼnə̀ è sas ə ndɛ ə ghənə̂zè. Zhə̀fè nyiə kɔ̂ŋɔ̀ ashìŋə̀ kɛ ghənə nə̂ nyî, kə ze ə nyi kəpiə ghənə kɛsə̂ ndaʼà ə̀ pɨ̀a ə ghənə̂ghè è nyì ə ghənə̂ghè.

⁵ Kàyntè ə̀ zhwîə kwu vɛ ə è kyi va wùə nə è və tɔ̂ʼnə̀ è vəyn nyi mə è kwàʼtə̀ lɨmtə̂ kə se Zhə̀fè, tsə̂mə̀ kə ndo shîŋə̀ tekɨ̂m, ndɔnə ètsâmtè sê Vəyn etuʼve, èchwì.

⁶ Zhwìə kwu vɛ ə è mɔ̀msə̀ kə sə̂ zhisə̂ èwiyn ə vəyn se nyi mə zuʼse ə vəynse ə kwu nâʼàpî kə è pa kwìə.

⁷ Tsàyn ghɛ nə ghɨ̂yn sê ghənə kə wùə sətəyn ə kyi va tsasze.

⁸ Ə̂ tə pîndè nə zhi tɔ̂ʼnə̀ va è sas ə ndɛ ə vəynze, paynpayn ghɨə vəynghə ndɛghe, ə zə tyə̂nə̀ nə è paʼà pomə Klâys səmɔʼ, ə kɛsə̂ kwûəmnə̀ tsɛ̂ nâʼà wùə vɛ ə è tàʼa tyəmə pomə̂ nâʼà səkɔs.

⁹ Ə zhwìə kwu kwəynə va pìŋsè m̀ghɨm mtufə, kə ò nji vəyn nə è tsɨynte nɔ̂yn ə zhwiə kwuke. Ə̀ kyi sə̂ nyi wùzhɔyn mə è tè fɨə kwîə va ə pɨəyn yighə̀ ndômnè əmɔ̀ʼɔghe

¹⁰ ghɨghe ke nə è kyi ndô ndam echûŋzè, mə è və tɔ̀ʼnè kɔʼ pəyn è ghɔ vəynghe, fɨnə fiə ə̀ghɨ ə motə pə kè nâʼà àchûŋ. Ə̀ kyi sə̂ nyi wùə mə è nyiə tsâmtə̀ ə̀ghɨ ə poməghe ə mndômnə̀ mndômnə̀ se tyə̀yn engɨmnê, fɨnə tsâmtə̀ əghɨ ghɛ ə ghe kyi tsôstè. Ə̀ kyi sə̂ nyi wùə mə è və fo ngɨŋə̂ vəyn sə̂ nə̂ chùŋ.

¹¹ Kə ghàyn tsɨynte zhwiə kwu ghɛ ə pa nyi sèngɔ̀yn ə fètə̂ ànɔ̀yn ə zhwiə kwuke, kûmə̀ nə kwàʼtè ə ghənə̂zè kàʼa ə ze kwiyne, ə ghənə sè fɨnə kyiŋə se malə, ə ghənə ə fɨnə chûmtə̀ va Klâys,

¹² ə ngəʼ pəyn sê ghənə kûmə̀ nə ghənə pâʼà ndə̀m kâyntè zɛ ə ghənə tè kàynte sê Vəyn.

¹³ Ghənə nyiə kwîə laʼsə̀, njiə kə ə ndɛ ə ndɛ, ndə̀mə̀ kôghɔ̀ŋ, njiə ə ghɨghə ghɛ, fɨnə wâmnə̀ ə̀ghɛ mə va eluʼ ə ghənə̂vè sə̂ wâmnə̀.

¹⁴ M kyiŋə nə zhwiə kwu ghɛ ə pa nyi sèngɔ̀yn kɛse malə̂, ə piə ghɔnə, ə tɔ̂ʼnə̀ è sastə ndɛ tə ghənə̂tè kə pàyn sə ghasènìse ə kyi va ndom sə̂ wâmnə̀ ə̀ghɛ ə piə kûmə̀ ghâsènì.

¹⁵ M pìə nyi kûmə̀ nə ngɔ̀yn sə zhwiə kwu shîse se nyi mə sə zàmaʼà sə̂ zɨə èghɛ zɛ ə Zhə̀fè pìə, pɨlə zɨə kə èghɛ zɛ ə satàyn pìə.

¹⁶ Ə̂ se nyi nâʼàpî wùzhɔyn è pomə èkwə̀, kyi ə̀ zhwiə kwughe ə vəyn esas ə ndɛ, è və tɔ̂ʼnə̀ è ghənə. Kə è zɔʼ chîə təyn zə ghɨə poməghe ətu. Ə ze nyi nyî ə ndɛ̂ Fèzhə̀ ə tɔ̂ʼnə̀ kɔʼɔ kə è zhwiə kwu ghɛ ə ghe kyi va ghɨə kə ghə tɔ̂ʼnə̀ è ghənə.

¹⁷ Ə kyi sə̂ kɔʼsə fɨnə ndaʼà zɔmtə̂ sè chəʼ sɛ ə se fɛtə nə̂ fɨ̂aʼ ə ghənə̂zè, paynpayn ghɛ ə ghənə ndâʼà tom fɨnə zaʼlə̂ ə̀ghɨ̀,

¹⁸ kûmə̀ nə Ŋwàʼlè ə Fèzhə̀ pìə nə, “Kə ò tə kol echo ə mbɔ̀ŋzè, mə è kèsə̀ sesɔ̀f.” È zə fɨyn pi nə, “Naʼapi wùə è fɨ̀aʼa èkwə̀ kyi sə̂ kyi è ndâʼ ə vəynze.”

¹⁹ Ə wùə pə̀yn pìə eghɛ epi se ghò kûmə̀ chəʼ ə ndɛ̂ Fèzhə̀, kə ò zɨte, ə̀ tsɛ̂ kə va mə è pî za, ghɨghe ə tɔ̀ʼɔ̀ vəyn ə̀pɛ̀, kɨ̀sə ta.

²⁰ Ə̂ nə̀yn pîndè pi, ə zɔ̂ sê vəyn kè ə ndayn kə ghɨ mɔʼɔghe zɨ ə fànə̀ sə̂ pɔŋɔ nə̂ pi.

²¹ M tyəm fâyn ə Zhə̀fè əshi yî Klâys Njisə̀s, è tsì sə vəynse se tsàyn sê ghàyn nə, ghàyn ə ndə̂mə̀ ə̀ghɛ ghɨ̂yn mə ghàyn kɔ̀ŋə̀ va wùə vîvè tsɛ və mɔʼɔ, fɨnə nə̂ va ghɛze se wùə kûmə̀ nə è nyi wùə vɛ̂vè.

²² Kə ò tə nəyn nə wùə ə nyi àtu mə ò ndəm əgho ə vəyn atu mə ò paʼà njì shîŋə̀kè se mɔ̀mə fe vəyn. Ə o nə̀yn nyiə mə, ə zə nyi kəpiə ò nə̀ ndò ghɛ əpi ghɛ ə è nə̀. Kə ò nə pfɨ ə pi.

²³ Kə ò nə mɨtə kə môm, ò mɨtə eluʼ ə mlɨ̂ kə m̀ mə tsâmtə̀ m̀zaflə̀ mɛ ə m̀ zâŋsə̀ fo ngəʼ ə ghò endwɔ̀.

²⁴ Ghɨ yîghe nə̂ pi kə ndayn, endom kə ò kàʼa ò ke zə̂ynzè ndɔ̀ʼɔ ò kyaʼse naynê ghənə, pîza ghə mɔ̀ʼɔghe e nə̂ pi andə̀te mə ò va kaʼa ò ke ə̀ tsɛ̂ kə va mə ghaf kə ndù.

²⁵ E za nyi kepî èghɨ kə ghɨ nə̂ chùŋ, è zâŋsə̀ panə ə ndayn, mə è tàʼa payn nâʼàpî ashìŋə̀ nə kɛ, ə ze ə tɛ kə ə ndəte chùŋ ə̀təyn.