1 Timotì 2 - Ŋwàʼlè ə̀ Fèzhə̀ Mkâyn Mə̂ Fèm

Ndom vɛ əghɨ kyi sə̂ ngɨmnə̂ Fèzhə̀ ətəyn

¹ E za nyi ə Timotì nə ghɛ ə m̀kɔʼnè zɛ ə m kyiŋə nə gho è ghɨə mɔ̀ʼɔghe ə nə̂ nyi nə, ghàyn e ndɔnə se Zhə̀fè kè sê ghɨghe əkɨ̂m, tsə̂mə̀ se ghənə, fɨnə njîə eluʼ ə ghənə̂vè sə̂ tsə̂mə̀ se ghənə, è kɨsè sə fo àzɔ̀ŋnè sê Zhə̀fè əghɛ ghɛ ə è nyi mə è və nə̀yn sê ghənə.

² Ghàyn e lotə̂ paynsə̂ tsə̂mə̀ tso sê fɔ̂yntè è kɨsè ghɨə mɔ̀ʼɔ ghɛ ə ghe chisə ghɨghe kə ghâsènì ə ndamə è pɔ̂ynè, fanə̀ va ghɛ zhîze, kə ghâsènì ə nyi kàʼa ə ngɨmnə̂ Fèzhə̀, fɨnə nə̂ kə èghɛ zɛ ə è kyiŋə nə ghâsènì ə nə̂.

³ Zɨnə mə nyîə tsɔ̂fə̀ nə̂ nə Zhə̀fè, mə za nyi sɔ̀zà ə ghâsènì, ə saŋnə̂.

⁴ Zhə̀fè kyiŋə nə ghɨ ghəkɨ̂m sɔ, fɨnə kyiŋə kəpî nə ghɨ ghəkɨ̂m kyi ghɛ zɛ ə ze nyi səmɔʼ.

⁵ Kûmə̀ nə ə̀ nyì ke Fèzhə̀ fèmɔ̀ʼ, ə̀ fɨyn nyi ke wùə èmɔ̀ʼ vɛ è njìə pə̂ Zhə̀fè yî ghɨ kaʼke amɔ̀ʼ, wùə nə vɛ nyi Klâys Njisə̀s,

⁶ vɛ ə è fo ngɨŋ ə Vəyn ə kwu se zhɔyn atu əghɨ̀ ə̀ kɨ̂mkè. Kə shîŋə̀ kɛ ə Zhə̀fè tè chɔʼ kwəyn, Zhə̀fè ə nə̀ nə Njisə̀s Klâys ə nyi chwìə nə zhi kyiŋə se sɔzà əghɨ ə̀kɨ̂m.

⁷ Ə̀ za nyi eghɛ zɛ ə tè tom mi kə wùətom è wùə èzaʼlə ə̀ghɨ ghɛ ə tè va əghɨ Njûsghè, nə m zaʼle tom èkyî epomə̂ zɛ ə e nyi səmɔʼ sê ghɨ ghɛ ə̀ vachi ə̀ghɨ ə Njûsghè. M wamə chîəva kaŋke, m lotə̂ pîə kə nâʼà èghɛ səmɔʼ!

⁸ M kyiŋə nə ndômnèghè əkɨ̂m, ə sendɛ sə Fezhə̀ sekɨ̂m ə tsə̂mə̀, ghənə kyi sə̂ ndamə èndam eŋwaʼaze tsɔ̀fə ə sè kɔʼsə ghoghe ekwùtwəyn nə ə tsə̂mə̀ sê Zhə̀fè. Ghənə kyi va sə̂ nyɔʼsə̀ etɔŋ sê wùə vîvè, mə ə ghənə fe kyi pî èzɔ̂ yî wùə, ghənə ə fɛtə̂ èghɛ ətəynze tsɔ̀fə ghənə tsəm.

⁹ M kyiŋə kəpî nə kə zəynghe ə lafə tsɨ̂ə tsɛ àndiŋ kɛ ə ghənə kyi sə̂ lafə ətəyn, endom vɛ ə ve fo va ngəʼ ə ghɨghe əshi. Ghənə kyi se laf endom vɛ ə ghɨghe əkɨ̂m fe nə ə̀ nyi endom echûŋvè. Kə ghənə ə ndəmə tsɛsə tyalze ə ghənə atu, kə ghənə ə chiŋə chaʼse mə ə fɛte è ngôl, è fɨate nyaynəte mə ə fɛte è pə̂l, kə ghənə maʼà tsɛsə̀ sèndzɨs sə ekɛ etɛse

¹⁰ Ə ghənə pɨlə fɛtə̂ sengɨŋ sə ghənə̂sè è ghɛ ə chûŋ ghɛ ə ghənə nə̂, kûmə̀ nə ə̀ nyi eghɛ echûŋzè se zəyn ghɛ ə nyi mə ə pomə Zhə̀fè sə̂ nə̂.

¹¹ Zənə kyi sə̂ zɨtə̂ ə̀ghɛ ghɛ ə zaʼlə sê ghənə kè àkyi àkyi, è ngɨmnêzè.

¹² M paʼà zà ghənə nə ə zaʼle, pî se kyî atyaʼ ə wùndômə̀ ətu. Ghənə kyi sə̂ tsɨs ke mɔŋ.

¹³ Kûmə̀ nə ə tè pom Andàm sə shi, ə ke pomə Îf.

¹⁴ Ə tè paʼà kyìŋse Andàm. Ə tè kyìŋse ke wùzhɔyn, è və kyimə àlâŋ ə Fezhə̀kè.

¹⁵ Pîza Zhə̀fè tə sɔza nâʼàpî wùzhɔyn èkwə̀ tɔynə̂ apiə ə ghɔynke, ashìŋə̀ kɛ è kol təmə ə faŋa tɛ kə ndò ə vəyn ekyî epomə̂zè, fɨnə kɔ̂ŋɔ̀ ə̀ghɨ mɔʼɔghe, fɨnə ndamə èndam zɛ ə ze nyi èŋwaʼze, nə̂ va ghɛ nə ghɨ̂yn endom kə shi əghɨ̀ghe ə nyi ke ə vəyn ewìyn.