1 Tèsàlonikà 3 - Ŋwàʼlè ə̀ Fèzhə̀ Mkâyn Mə̂ Fèm

¹ Ə̀ tè nyi kə ghàs fe nə ghàs vayn kàʼa fɨyn kol ə̀təm sə̂ tsɨs fe va ghàyn, ghàs ə fe nə ze tsɔ̂fə̀ ndò nə ghàs faŋ sə̂ ndamə kə sə ghàs ə sengɨŋ ə Atèn.

² Ghàs ə tomə ànyì vâsvè Timotì vɛ ə ghasè ghə̀ ghənə fɨaʼà sê Zhə̀fè, ndàʼà tom è chùŋ kûmə̀ Klâys. Ghàs tomə nə è pəyn tsâmtè ə è nəyn nə ghàyn pomə è tyaʼa se Klâys, è kɨsè se fo ghàyn è təm ə tɛghe nə ghàyn ə kyi ndu ke ndò kyî epomə̂zè èshike,

³ kə ndɔ̀ʼɔ tsôs tɨ̂nə̀ ə ghàyn nyi ətəyn nəyn ə ghàyn ə fɨnə pomə̂ va sê Klâys. Nâʼà ghàyn nyiə ke nə ə̀ nyi endə̂m ə Fezhə̀zè nə ghɨ nə fo ngəʼ nə zɨ̂yn sê ghâsènì.

⁴ Ghàyn kendô ghɛ ətəyn kûmə̀ nə ə̀ tè nyi kə ghâsènì tè nyi əmɔʼ, ghàsə tsâ sê ghàyn nə kɔʼɔ ə ngɛ̀ ə tso əchi, ə tə fo ngəʼ sê ghâsènì, zə ə tə kwi ə kwəynə kə èghɨ kə ghàyn ke.

⁵ Ə̀ za nyi eghɛ zɛ ə ze tè nəyn mə tiynsə̂ Timotì. M tè tiynse nə è pəyn fe nə ghàyn ghe tɔ̀ʼɔ̀ samsə̂ Klâys, è kûmə̀ nə m tè vayn kàʼa m fɨyn kol ə̀təm sə̂ ndamə, ke va nə ə̀ kyàynə̀ ghè sê ghàyn ə. M tè fànə kə nə ndə̂plè kàʼa è zə nyi mə è zə mɔ̀m ghàyn, ə nə̀ nə fɨ̂aʼ etsɨə kɛ ə ghàs tè nəyn ə ghàyn əfètəyn ə njìse səndô.

⁶ Timotì ə kɛse pəyn zôyn ə tsâ saʼghe èchùŋ sê ghàs nə ghàyn pa kyi ke ndò kyî epomə̂zè se Klâys, fɨnə kɔ̂ŋɔ̀ ə̀ghɨ mɔʼɔ. È və fɨyn pi nə ghàyn kwàʼtə̀ ghàs nâʼàpî ashìŋə̀ àkè, ghàyn e saŋnə kə nyî, kɔ̂ŋɔ̀ se fɨnə fe ghàs kèpi kə ghasè vəyn kɔ̂ŋɔ̀ se fe ghàyn.

⁷ Ghàs saŋnə̂ kə nyî ə ghɔnyì ghasə kûmə̀ èghɛ zɛ ə Timotì tsàyn sê ghàs nâʼàpî kə ghasè vəyn fe ngəʼ nâʼà àpi. Ndom vɛ ə ghàyn pa kyi èkyî epomə̂zè sê Klâys, ə fo ghàs è təmə sə ŋaŋ.

⁸ Ghàs nyîə saŋnə̂ sə̂ ndamə zôyn fɨnə fànə̀ va kûmə̀ nə pomə̂ atyaʼ zaynze sê Zhə̀fè ndùə kə èshike.

⁹ Ghàs vayn fo àzɔ̀ŋnè se Zhə̀fè endom vɛ ə ke kaʼa ke kwəyn shîŋə̀ kɛ ə ghàs tsə̀mə̀, kûmə̀ nə ghàyn ə nə̀yn ghàs ghe kyi saŋnê etsɨəze.

¹⁰ Èchwì è tuʼve, ghàs tsə̀mə̀ è təm ghasghe əkɨ̂m nə fe nəyn ə ghasè vəyn fe ke nâʼà ghàyn se zaʼlə ghàyn è fɨa kɛ ə ghàyn pa laʼà se nə̀yn nə kyî epomə̂ zayn fɛte tɛ.

¹¹ Ghàs tsə̂mə̀ nə Zhə̀fè ghasènìfe, ə Pɨ̀a è ngɨŋə̂ Vəyn yî Pɛ̂pɛ ə ghâsènì Njisə̀s nəyn nə kə ghɛze tase nə ghasè vəyn pəyn fe ghàyn.

¹² Ghàs tsə̀mə̀ kəpî nə Pɛ̂pɛ nəyn ə kɔ̂ŋ zɛ ə ghàyn kyi sê ngɨŋ saynse, è kɨsè sê ghɨə mɔ̀ʼɔghe əkɨ̂m ə ndəmə̂ ndûə kə ndò, kèpî kə zɛ ə ghàs kyi sê ghàyn.

¹³ Ə ghàyn nə̂ nyi, ə è nəyn ə təm ghaynghe ə tɛ, kə ghàyn ə kyi va ləʼke, nyi èŋwaʼve ə Zhə̀fè ə ghâsènì fe əshi mə za nyi pɨ̀a ghâsènì ashìŋə̀ kɛ ə Pɛ̂pɛ ə̀ ghâsènì Njisə̀s pə̀ è ghɨə vəyn ghe ŋwaʼaghe əkɨ̂m.