1 Pità 5 - Ŋwàʼlè ə̀ Fèzhə̀ Mkâyn Mə̂ Fèm

Etəftê se chəʼse è kwuŋte

¹ Ə mi kèpî kə chəʼ, ə wùə vɛ ə m tsâ sê ghɨ kə Klâys tè fe ngəʼ, mə m nyi wùə mə pomsê ə Klâyszè tə pə̂ kəpî sê mi, m chyatə̂ ghàyn nə,

² ghàyn e tɔ̂ʼnə̀ è ndzè sə Fezhə̀ sɛ ə se nyi ə ghàyn etyə̀. Kə ghàyn ə nə kəpiə ə ŋamnə̂ ndò ghàyn, pîza ghàyn e nə̂ mə ghàyn kɔ̀ŋə̀ ndò kûmə̀ nə ə̀ nyi zamə kə Zhə̀fè kyiŋə. Ghàyn e nə̀ èfɨaʼ zaynze ə̀ vachi kûmə̀ àfɨa kɛ ə nə̀ ndâʼà ghàyn ətəyn, ghàyn e fɨaʼà kûmə̀ nə ghàyn səmtə̂ ndò se fɨ̂aʼ sê Zhə̀fè.

³ Kə ghàyn ə zəʼtə̂ ndò ghɨ ghɛ ə fo nə ghàyn ə tɔ̂ʼnə̀ è ghənə. Ghàyn e pɨlə nə̂ ə̀ghɛ endom vɛ ə ghənə nə̀ səynə ghàyn.

⁴ Ə ghàyn nəyn nyi, ə wùə vɛ ə è nyi tu ə sengyəynke tə kɛse pəyn pi etuʼ èkwə̀, ə è ndaʼ ghàyn è fɔ ə tefɔ̀yn ə kayntəke mə ke tə ndamə faŋə.

⁵ Kwuŋte, ghàyn tsose ngɨŋ saynse əchi sə zɨə se chəʼse. Ghàyn maʼ ngɨmnêzè kə sendzɨs sefɨaʼase sə̂ fɨ̂aʼà sê ngɨŋ saynse kûmə̀ ŋwàʼlè ə̀ Fèzhə̀ nyi mə è zə pì nə, “Zhə̀fè pânə̀ əghɨ ghɛ ə ghe ghaŋsə wiynve, pîza è fo àfùʼ sê ghɨ ghɛ ə ghe ngɨmnə ngɨŋsə ghənə̂sè.”

⁶ Ghàyn e ngɨmnə̂ sèngɨŋ saynse ə Zhə̀fè əshi vɛ ə è kyi tyaʼke kə shîŋə̀kè tə kwəyn ə è ndwise ghàyn.

⁷ Ghàyn nji pəyn àfɨm kaynke nâʼà àkɨ̂m ə fo sê vəyn kûmə̀ nə è ke ndô ghɛ zaynze.

⁸ Ghàyn e tsɨs pfɨ̂tə̀, nyi etsɨ̂ŋnèzè, kûmə̀ nə pàyn zâynzè, mə za nyi ndə̂plè nyiə tàyntə̀ ka kə kə pìkəm, pɨa, kyiŋə wùə se zɨ̀.

⁹ Ghàyn tyəm ə ghàyn ə tɛ ə ghàyn ekyî epomə̂zè kə ghàyn tàʼa pomə̂ eghɛ zɛ ə è pìə kûmə̀ nə ghàyn nyîə ke nə ghɔnyì ghaynghe ghɨə pomə fe kəpî èkyì ə ngəʼ nə zɨ̂yn mbi èkɨ̂m.

¹⁰ Ghàyn nə̀ fe ngəʼ kè sə fendiŋə̀ fə ashìŋə̀fè nyi, epàm ətəyn, ə Zhə̀ fɛ ə fe nə̂ chùŋ se ghâsènì əghɛ ə̀kɨ̂m, mə Fe ə tɔŋə̂ ghâsènì nə ə nyi paʼsê kepî ə vəyn ə fètəyn èghaʼ sə afɨa àmɔ̀ʼ è Klâys. Nâʼà vəyn è ngɨŋə̂ vəyn tə nə̂ kwəynsə̂ nə ghàyn ə kyi àtyaʼ, tyəm tɛ ə ghàyn e samsê, ə è nəyn ə ghàyn ə ndam kyi ekol ətəmze.

¹¹ Ə tyaʼke ə nyi sê vəyn sə teshìŋə̀ tèkɨ̂m. Ə ze ə nyi ke zamə.

Etɔŋtê ekwuŋsəze

¹² Ə̀ tsàmte Silàs mi nə m nyâʼ ŋwàʼlè zɨ̀nə sê ghàyn. Ə̀ nyì ke nâʼà ànyì vɛ ə kaʼa samse. Ŋwàʼlè ètɨmsə̂ nə zɨ̂yn nyì se fo ghàyn è təm ə tɛghe è kɨsè sê tyə̀yn nə ghɛ zɛ Zhə̀fè nyi mə fe ə nə̀yn sê ghàyn nyi chwìə səmɔʼ nə fe nyîə kɔ̂ŋə̀ ghàyn. Ghàyn tyəm ə tɛ, pomə̂ sê tom ə̀təyn.

¹³ Ndɛ ə̀ Fèzhə̀ zɛ ə è nyi ə Papilɔ̀yn, mə za nyi kə ànyì vâyn ve zəyn vɛ ə Zhə̀fè tè chɔʼ kepî kə è chɔʼ ghàyn, tomə ètɔŋtê sê ghàyn. Mâk, mə za nyi vayn vɨ̂m ve èpomə, tomə kəpî ètɔŋtê sê ghàyn.

¹⁴ Ghàyn tɔŋte ngɨŋ saynse endom vɛ ə ve tyə̂nə̀ kɔ̂ŋzè kə ghɨ ə poməghe kyi sə̂ nə̂. M tsə̂mə̀ nə pɔ̂ynè ə Fèzhə̀ faŋ sê ghàyn əkɨ̂m ghɛ ə ghàyn pomə sê Klâys.