1 Njɔyn 5 - Ŋwàʼlè ə̀ Fèzhə̀ Mkâyn Mə̂ Fèm

Ghɨ ghɛ ghe kyi pomə̂zè ə tɨm zhi mbi

¹ Naʼapi ndè vɛ ə è pomə nə Njisə̀s nyi vɛ ə Zhə̀fè chɔʼ ndə̂m nyi va Fèzhə̀. Ə̂ kɔ̀ŋɔ̀ pîndè Pɨ̀a, ə è və pɔŋɔ kɔ̂ŋɔ̀ kəpi vayn vɛ ə Pɨ̀a kyi.

² Ghâsènì kàʼa ə ke nə ə kɔ̂ŋɔ̀ ndò ghɔ Fezhə̀ ezhoghɛ ə kɔ̂ŋɔ̀ vəyn, nə̂ ə̀ghɛ ghɛ ə lâŋ ə Vəynke pîə.

³ Ə ghâsènì fɛtə kɔ̂ŋɔ̀ Zhə̀fè, ə ndə̀mə̀ elwɔ̂ŋ ə vəynve. E tɛ va se ndə̀m ə elwɔ̂ŋ ə vəynve,

⁴ kûmə̀ nə nâʼàpî va Fezhə̀ èkè nyi mə è və tɨm zhi mbi. Ə̀ nyi ekyî epomə̂ ə ghasènìze ə ze nə̂yn nə ghâsènì tɨm zhi mbi.

⁵ Ə̀ nyiə kàʼa ə̀ tɨm zhi ndè mbi ə? Ə̀ nyì ke vɛ ə è pomə nə Njisə̀s nyi Va Fèzhə̀.

⁶ Ə̀ nyi Njisə̀s Klâys nə vɨ̂yn ə è ndò ekwùtwəyn ə pə̀ ə chi, ə fiə m̀mo ə fɨnə kwuə ə tsosə̂ m̀ndəm mə Və̂ynmè. È tè pâʼà fi ke môm, è və tè kwu kepî ə sɨsə m̀ndəm mə Və̂ynmè. Ə̀ nyi Sèzuʼ se Ŋwaʼase ə se tyəm tsɛ̀ èsaʼ sê ghɛ nə ghɨyn kûmə̀ nə Zuʼse Ŋwaʼase wamə va kaŋke.

⁷ Kûmə̀ nə ə̀ nyi əghɨ ə̀ ta ə ghe tyəm tsɛ̀ èsaʼ ekwùtwəyn, ə̀ nyi pɨ̀a, è vayn, è Zuʼse Ŋwaʼase. Ghɨ nə ghɨnə mə ə ta nyi sə afɨa àmɔ̀ʼ. Ndomte nyi teta se kê ə səmɔʼ kûmə̀ Njisə̀s.

⁸ Ghe nyi kepî ə̀ ta ə ghe tyəmə tsɛ̀ èsaʼ fa chi, ə Sezuʼ, è môm è kɨsè ndə̂mə̀m. Ghɛ nə ghɨnə mə ə ta e pomə̂ èghɛ èmɔ̀ʼ ghâsènì kê səmɔʼ kûmə̀ Njisə̀s kûmə̀ nə Zuʼse tsâ ndò sê ghâsènì, ghâsènì nyîə ke nə ə tə fo môm sê Njisə̀s è môm, È və sɨ̀sə̀ m̀ndəm mə vəynm̀ kə È tè kwu. Ndom tɨ̀nə tèta tyə̂nə̀ nə Klâys nyi Vâ ə Fèzhə̀.

⁹ Ghâsènì pomə̂ ndò ghɛ ghɛ ə ghɨ pîə, pîza zɛ ə Zhə̀fè piə, e tsɛ̂ ndò zə wûəzè. E nyi nyiəmə kûmə̀ nə ə̀ nyi Fezhə̀ ə Fe tsâ sê ghâsènì è ngɨŋə̂ Vəyn kûmə̀ Vâ vəyn.

¹⁰ Naʼapi ndè vɛ ə è pomə sê Va Fèzhə̀ nyîə ke èghɛ nə zɨ̂nə̀ ə və ətəm. Naʼapi ndè vɛ ə è tàʼa pomə se Va Fèzhə̀ njìə Fèzhə̀ sə wùə àkaŋ kûmə̀ nə è pâʼà pomə ghɛ zɛ ə è pì kûmə̀ Va vəyn.

¹¹ Ghɛ zɛ ə Zhə̀fè pìə nyi nə, fe ə fo ndam zɛ ə ze tə mîə va sê ghâsènì, ndam nə zɨ̂nə̀ e nyi ə vəyn ə Vayn.

¹² Wùə vɛ ə è nyi fɨake amɔ̀ʼ yî Vayn tə kyiə èndam zɛ ə ze tə mîə va, vɛ ə è va fɨake amɔ̀ʼ yî Va Fèzhə̀ tə kyiə va ndam zɛ ə ze tə mîə va.

Kə kaʼa kyi ndam zɛ ə ze tə mîə va

¹³ M nyâʼà ə̀ghɛ ghɨyn sê ghàyn ghɛ ə ghàyn pomə sê Vâ Fèzhə̀ kə ghàyn ə ke nə ghàyn nyîə kyi èndam zɛ ə ze tə mîə va.

¹⁴ Ə ghâsènì tyəm ə Zhə̀fè əshi ə pfɨfə nâʼàpî ghè endom vɛ ə è kyiŋə ə ghâsènì ə ke nə è nə̀ zɨə ndò sê ghâsènì.

¹⁵ Kə ghâsènì se ke nə è zɨə ndò ghâsènì, nâʼàpî èghɛ èkè zɛ ə pfɨf, ə ke kepî nə è nə̀ fo ndò sê ghâsènì.

¹⁶ Ə fe pi ndè ànyìə vəyn kə è nə̀yn pi, ə va pi se chyàsə vəyn yî Zhə̀fè, è və tsə̀mə̀ sê vəyn kə Zhə̀fè nəyn ə ànyìə vəyn nə vɛ ə ndamə. M pîə ə̀ghɨ ghɛ ə ghe nə̂ pi è va se chyâsè əghənə yî Zhə̀fè. Pi zhîzè nyîə nyi, ə zɛ ə wùə nə̀yn, è zə chyasə̀ vəyn yî Zhə̀fè, m piə va nə ghàyn tsəm kûmə̀ èkyì ə pi nə zɨ̂nə̀.

¹⁷ Nâʼà əghɛ pighe əkɨ̂m nyi pi, pîza, pi zhizè e nyi zɛ ə è va se chyâsè ə wùə yî Zhə̀fè.

¹⁸ Ghâsènì ke ndô nə ghɔ Fezhə̀ vayn kàʼa ə nə̂ ndùə kə pi, kûmə̀ nə Va Fèzhə̀ tɔ̀ʼnə̀ ndò è ghənə, mə wùə èpi vayn kàʼa è nəyn ghɛ epi zhîze sê ghənə.

¹⁹ Ghâsènì nyiə ke nə ghâsènì nyi əghɔ Fezhə̀, ke kepî nə wùə èpi nyi wùə vɛ ə è kyi ghɨ ghɛ ə ghe ke va Zhə̀fè.

²⁰ Ghâsènì ke kepî ndò nə Va Fèzhə̀ ə tə pə̀yn ə mbi, ə zaʼlə ghâsènì kə ə ke Fèzhə̀ fɛ ə Fe nyi səmɔʼ, ə ghâsènì ə tsɨ̂yntè nyi sə afɨa àmɔ̀ʼ, kûmə̀ nə ghâsènì nyì sə afɨa àmɔ̀ʼ è Vâ Vəyn Njisə̀s Klâys. È nyi Fezhə̀ fɛ ə fe nyi səmɔʼ, fo èndam zɛ ə ze tə mîə va.

²¹ Kə ghàyn tə twɔm kyî èghɛ zhîze se nə̀yn ghâyn ghə̂ zhə̀tè mə̂ àkaŋàm ə ghɔyn ghɨmə.