1 Kɔlìŋ 9 - Ŋwàʼlè ə̀ Fèzhə̀ Mkâyn Mə̂ Fèm

Ghɛ ghɛ ə̀ nyi eluʼ əghɨ̀tomghe sə̂ nə̂

¹ M va sə mì ə ngɨŋ ə̀? M va wùətom ə̀? M tè paʼà fe Njisə̀s Pɛ̂pɛ ə̀ ghâsènì ə? Ghàyn va etwɔm efɨ̀aʼ zɨmze ə Pɛ̂pɛ ə̀?

² Ə m va pî wùətom se ghɨə mɔ̀ʼɔghe, m mə ke nə m nyi ndô sê ghàyn kûmə̀ èndom vɛ ə ghàyn nyi ətəyn sə eghɛ èmɔ̀ʼ ghâyn ghə̀ Pɛ̂pɛ. Zɨnə mə chwîtə̀ nə m nyi wùətom.

³ Ə̀ vɨnə nyi endom vɛ ə m kyi se wàmnè se tsàmtè ə ngɨŋ zɨ̂mè se ghɨ ghɛ ə pîə ghɛ ə pighe kûmə̀ mi:

⁴ E za nyi nə ə̀ va eluʼ vasve se zhi è kɨsè se mɨ kûmə̀ èfɨaʼ zɛ ə ghàs nə̀ mə?

⁵ E za nyi nə ə̀ va eluʼ vasve se njiə wùzhɔyn è pomə sə zhwi, sə̂ kwîə è vəyn kepî kə̂ əghɨtom ə mɔ̀ʼɔghe, è ghɔnyì ə Pɛ̂pɛghe, è Sefàs mə?

⁶ Mə ə̀ nyì ke ghasè Pànapàs ə kyi sə̂ fɨaʼà kə ndò tsɔ̀fə ə kyi kɛve mə?

⁷ Ə̀ nyi sokə̀ʼ èkè ə è njì kɛ ə vəyn se zhɔyn efɨa vɛ ə è kyi sə̂ nə̂ èfɨaʼ ə sokə̀ʼze ətəyn ə? Ə̀ nyi wùə àfùʼ èkè ə è kaʼa ə è və fɨaʼà afùʼ etwɔm etɔfəve, vayn kàʼa è ndɛ vəynvə? Ə̀ nyi ngyəyn ə senyàm èkè ə è kamə va yîynə̀m ə və senyàm se mɨ ə?

⁸ M wamnə̀ va zɨnə̀ è tyaʼ kɨmke kûmə̀ nə lâŋkè pìə kəpi èghɛ nə zɨnə mə.

⁹ Ghâsènì tɔŋɔ̂ ə ŋwàʼlè Àlâŋ ə Mosîskè nə, “Kə ò tə kol ècho ə mbɔ̀ŋə̀ titîazè ashìŋə̀ kɛ ə è kɛ̀sə̀ sɔ̀fsè.” Zɨnə mə tyə̂nə̀ nə Zhə̀fè lotə wamnə̀ kə nâʼà kûmə̀ sèmbɔŋsətitîasè mə?

¹⁰ È tè lotə wâmnə̀ kûmə̀ ghâsènì kə è tè pìə ghɛ zɨnə̀. Èyn, ə tè lote nyâʼ zɨnə̀ kûmə̀ ghâsènì. Nâʼàpî ndè vɛ ə è fə̀, è vɛ ə è kwìə, ə ghənə ə nə̂ èfɨaʼ ə ghənə̂zè kyi ekwâʼtè nə ghənə tə kyîə və ghənəvè nə efɨazhiəve.

¹¹ Ghàs ə zho ghɛ ə chûŋghè ə ghàyn ətəm. Ə̀ vayn kàʼa ə nyi èghɛ epize ezhoghɛ ghàyn fo ghàs èfɨa vɛ ə ghàs kàʼa ə ghàs tsamte ngɨŋ sase ətəyn.

¹² Ə̂ nyi eluʼ əghɨ̀ əmɔ̀ʼɔghe se pfɨf efɨa nə vɨnə se ghàyn, ə va zàyn luʼ vasve se pfɨf se ghàyn se tsɨə tsɛ pì ə? Pîza ghàs paʼà faŋ se pìə faŋsə̂ kə nə ə̀ vɨnə nyi eluʼ vasve kə ghàyn ə nə̂ zamə sê ghàs, ghàs pɨlə kolə kə ə̀təm kə ghàs ə va àtàmtè se tom èchùŋ ə̀ Klâys.

¹³ Pîə ghàyn ke ndô səmɔʼ nə ghɨ ghɛ ə ghe fɨaʼa ə ndɛ̂ ètsə̀mə kyîə èfɨaezhiə ə ghənə̂vè fumə ə Ndɛ ètsə̀mə ə? Ə chyâtə̀ èfɨa vɛ ə fo sə efo etûə alaŋ, fo və ghənəvè.

¹⁴ Kèpi èghɨ, Pɛ̂pɛ ə tsɛ̀sè sə esaʼ nə ghɨ ghɛ ə ghe ndaʼà tom èchùŋ kyîə èfɨazhiə ə ghənəvè fumə ə tom èchùŋ nə zɛ mə ə ghənə ndâʼà.

¹⁵ Pîza m paʼà pfɨf fɨa vɨ̀yn pî kə ə̀ nyi eluʼ vɨmve se pfɨfə vəynve. M nyâʼà pîə va ghɛ zɨnə̀ nə ghàyn fo sê mi fɨa vɛ ə m nyi se kyî. Wùə vîvè vayn kàʼa è tyəmse ghaŋsê zɨmze wìynze kûmə̀ èghɛ nə zɨ̂yn.

¹⁶ M kiva sə̂ ghaŋsə ewìyn kûmə̀ kə̂ kə m ndaʼà tom èchùŋ. Nâʼà sə kàyn, ə̀ se nyi efɨaʼ mə ə ndə̀m nə m kyi sə̂ nə̂, mə m tàʼa ndaʼà ə tom èchùŋ ə̀təyn, ə tsôs ekaynə və nyi ə mì ətu!

¹⁷ Ə m nə̂ fɨ̂aʼ zɨmze mə ə̀ kɔŋ mi sə̂ nə̂, ə nyi nə ə kyi sə̂ ndàʼà mi; pîza m nə̀ nə̂ kə kûmə̀ nə ə̀ nyi eghɛ, m kyi ke se nə̀yn, mə ə̀ fo Fezhə̀ èfɨaʼ ətəynze nə mə nə̂.

¹⁸ Mâʼtè zɨme za nyi nâʼà ghè? Mâʼtè zɨme nyi ke nə mə ndaʼà tom èchùŋ, pfɨfə va mâʼtèzè, nyiəmə, kiva fɨa vɛ ə fe nyi eluʼ vɨmve sə̂ kyi kə wùə vɛ ə è ndàʼà tom èchùŋ.

¹⁹ M nyi sə mì ə ngɨŋ, vachi àkɔs ə wûə vîkè, pîza mə nə̀yn sə nyi àkɔs se nâʼàpî ndè kè endom se nə̀yn nə zə pɔynə̂ kə ghɨə pomə̂ nâʼà setsɨ̀ setsɨ̀.

²⁰ Shîŋə̀ kɛ ə m ndu se ghɨə Njûsə̀, m nyi ke kə wùə ə Njûs, se nə̀yn nə ghɨə setsɨ̀ setsɨ̀ chumte Klâys, mə ndùə se ghɨ ghɛ ə ghənə ndə̀mə̀ lâŋkè, m nyi kè kə wùə ə è ndə̀mə̀ lâŋkè nâʼà pî kə m va əfètə̂ ghɨ̀ ghɛ ə ghənə chûmtə̀ lâŋkè, kə m nəyn ə ghɨ ghɛ ə ndə̂mə̀ lâŋkè chumte Klâys.

²¹ Shîŋə̀ kɛ m ndu se ghɨ ghɛ ə ghe chûmtə̀ va lâŋa, m nyi ke kə wùə ə è chùmtə̀ va lâŋà. (Zɨnə mə tyə̀nə̀ va nə m ndə̀mə̀ va laŋa Fezhə̀kè pîza m pɨlə ndə̂mə̀ àlâŋ ə Klayskè) kə m nəyn ə ghɨ ghɛ ə ghe ndə̂mə̀ va lâŋkè ə chûmtə̀ Klâys.

²² Shîŋə̀ kɛ ə m ndu sê ghɨ ghɛ ə ghənə pɔlə̂, m nyi ke kə wùə ə è pɔlə endom se nə̀yn nə ghənə chumte Klâys. Mə kɛse sè nyi ke èfɨa èkɨ̂m se ghɨ ghəkɨ̂m se mɔ̀msè ətendom tèkɨ̂m nə ghənə yîghe kyi sɔzaze ezhoghɛ ə ze pɔynə.

²³ M nə̂ ə̀ghɛ nə ghɨnə̀ ə̀kɨ̂m kə ghɨ setsɨ̀ setsɨ̀ zɨ tom èchùŋ kûmə̀ Klâys kè se nə̀yn nə tom èchùŋ zham nduke èshike kə̂ m pɔŋ kyî epɔsê zɛ ə ze nyi ətəyn.

²⁴ Pîə ghàyn ke ndô nə ə səynə̂ ènyɨŋ, ghɨghe e nyɨŋə, tsɨ̂ə kə nyi, pîza ə̂ nə̀ nyɨŋə zhiə kə wùə èmɔ̀ʼ, è ve kyîə èmâʼte ətəynve. E za tyə̂nə̀ nə ghàyn kyi se fɛtə nyɨŋ endom se zhi se kyî emaʼte ətəynve.

²⁵ Wùə ènyɨŋə vɛ ə è nə̀ fɨ̂aʼ ə vəynze kyi sə̂ chûmtə̀ elwɔ̂ŋ enyɨŋəve. Ghənə nə̂ e nə̂ za se kyi emaʼte, ve va se ndamə faŋ, pîza ghâsènì nə̀ e nyi se kyî emaʼte vɛ ə ve tə ndamə faŋə.

²⁶ Ə̀ za nyi eghɛ zɛ ə m nyɨŋə va kə wùə vɛ ə è nyɨŋə keva ghɛ zɛ ə è nyɨŋə sətəyn; nô va kə wùə ə è vɨ̀ŋə̀ fèkàm elùʼ ezomve.

²⁷ Ngaŋ, M fo ngəʼ sê wiyn vɨmve kə̂ ve ə nyi àkɔs se mi, ə̀ va zâ ə m ndaʼa tom èchùŋ sê ghɨə mɔ̀ʼɔghe, ə tə nəyn ə nyi a kwùŋse, ə Zhə̀fè pi nə m kwəynə̂ va se səynê ènyɨŋ ətəynze.