1 Kɔlìŋ 7 - Ŋwàʼlè ə̀ Fèzhə̀ Mkâyn Mə̂ Fèm

Əghɛ kûmə̀ malə̂

¹ M pîə eghɛ zôyn kûmə̀ ə̀ghɛ ghɛ ə ghàyn tè nyàʼ pfɨftê sê mi. Ə̀ zɨnə nyi eghɛ zɛ ə m pîə, ‘E tsɔfə kə nâʼà ndò nə kə wùə malə.’

² Pîza kûmə̀ nə nyɨ̂ŋə̀ ə ndomnèzè è nyɨ̂ŋə̀ ə zəynze nyîə nyi tsɛsè, m pìə nə nâʼàpî wùə è ndomə̀ èkè nyì sə̂ kyi zhwìə vəyn, nâʼàpî wùzhɔyn èkè e kyi sə̂ kyi ndomə̀ vəyn.

³ Wùndômə̀ kyi sə̂ fo ngɨŋə̂ vəyn sê zhwìə vəyn kè nâʼà kə̂ lâŋ ə malə kyiŋə, wùzhɔyn e kyi sə̂ nə̂ kəpî za sê ndomə̀ vəyn.

⁴ Ze nyi nyî kûmə̀ nə wùzhɔyn kyi va tyaʼke ə vəyn etûə ewìyn, pîza ə̀ kyi ndomə̀ vəyn, kepî èghɨ kə̂ wùndômə̀ kyi va tyaʼke ə vəyn etûə èwìyn, pîza ə̀ kyi zhwìə vəyn.

⁵ Kə wùzhɔyn tə se fo ngɨŋə̂ vəyn se ndom ə̀ vəyn, kə wùə ndômə̀ tə kepî se fo ngɨŋə̂ vəyn se zhwîə vəyn, ə̀ tsɛ kə va mə ə̀ pomə ghənə se nə̀yn zamə sə fe ndiŋə kə ghənə ə nyi kàʼa tsəm. Pîza ə shîŋə̀ təynke mî, ghàyn e kɛsə̂ ndamə kə lâŋ ə malə̂kè kyiŋə, ə̀ va za, ə mɔ̂m ə Satàynzè nəyn, ə ghàyn pfɨ kûmə̀ nə ghàyn keva se kyî ə sengɨŋ saynse.

⁶ M tsɨ̂nə̀ pîə kə ndò kə eghɛ ə ke ə pomə̂ ezhoghɛ ə ghàyn kyiŋə, ə̀ vachi àlaŋ.

⁷ M fə̂ kàʼa ə mə kɔ̂ŋɔ̀ nə nâʼà əghɨ əkɨ̂m ə nyi ke kə̂ mi, pîza Zhə̀fè nyi mə fə fo nâʼàpî ndè è zə vəyn nə kàyntè èfo, nâʼàpî ndè e kyi èkyì ə vəyn ze foze.

⁸ M pîə sê ghɨ ghɛ ə ghe pa nyi ndɔ̀ʼɔ malə, kèpî è zhwîə kwuə nə, e tsɔ̂fə̀ nə ghənə faŋ ke zâ, ə nyi ke kə̂ mi.

⁹ Pîza mə ghənə vayn kàʼa ə kyi ngɨŋsə ghənə̂sè, ə ghənə malə, kûmə̀ nə e tsɔ̂fə̀ se malə tsɛ̂ sə̂ tsɨs pî ashìŋə̀ akè, kwaʼtə̀ kə sə ŋaŋ se nyɨ̀ŋə̀ è wùzhɔyn kɨ̀sə wùə èndom.

¹⁰ Sê ghɨ ghɛ ə ghe nyi mə ghə malə, m fo sə alàŋ, ə̀ va alàŋ kɨma, ə̀ nyi àlaŋ ə Pɛ̂pɛke nə, wùzhɔyn kyi va se zà ə ndômə̀ vəyn.

¹¹ Pîza mə ə è zà, è və faŋə kə və̂yn nɨŋ, ə̀ va za è və kɛsə̂ ndûə pɨaʼtə̂ yî ndômə̀ vəyn. Wùə ndômə̀ pɔŋ kyi va se chumə̀ zhwìə vəyn.

¹² Sê ghɨ mɔ̀ʼɔ ghɛ ə ghe faŋ ndɔ̀ʼɔ ə m wâmne kûmə̀ ghənə, m pîə nə, (Ə̀ pìə mi zɨ̂nə̀ ə̀ vachi Pɛ̂pɛ), ‘Ə wùə èpomə kyi zhwi ndɔ̀ʼə è pomə, zhwî ə̀təyn ə pomə̂ se ndam yî vəyn, kə è nə chum vəyn.’

¹³ Mə ə wùzhɔyn èpomə kyi ndom, ə̀ va wùə è pomə, ndom ə̀təyn ə pomə sə̂ ndamə yî vəyn, kə wùzhɔyn tə vəyn.

¹⁴ E nyi nyî kûmə̀ nə Zhə̀fè kàʼa Fe nəyn nə ndom vɛ ə è tàʼa pomə̂ nə è və nyi èŋwâʼzè ə Zhə̀fè əshi tɔynə̂ ə zhwìə vəyn, fɨnə nə̂ wùzhɔyn vɛ è tàʼa pomə̂ nə è və nyi èŋwâʼzè ə Zhə̀fè əshi tɔynə̂ ə ndomə̀ vəyn. Ə ze fə̂ va nyî, ə ghɔyn ə ghənə ghè ə va èzoze pîza kè kə ze chwîtə̀, ghənə nyi èŋwaʼze ə Zhə̀fè əshi.

¹⁵ Pîza ə wùə vɛ è tàʼa pomə, è kɔ̂ŋɔ̀ se zà ə ndomə̀ vəyn kɨ̀sə zhwi ə vəyn, è və zà kə ndò. Ə ze kyayn nyì, ə ghɛ ətəynze ə va ə wùə ndomə̀ èpomə kɨ̀sə zhwi èpomə ətu, kûmə̀ nə Zhə̀fè kyiŋə nə ghâsènì ə ndamə è pɔ̂ynè.

¹⁶ Ghò wùzhɔyn èpomə, wùə keva, ze kaʼa ə ze kyayn nə ò kàʼa ò sɔza ndom vɛvè, è ghò wùə èndomə̀ èpomə, wùə keva, ze kaʼa ə ze kyayn nə ò kàʼa ə ò sɔza zhwi vɛvè.

Ghàyn e ndamə kə atɨ̀ŋ kɛ ə Zhə̀fè kyiŋə nə ghàyn ə ndamə

¹⁷ Ezho ghɛ ə ze va zamə, ə nâʼàpî ndè ndam ke atyaʼ kɛ ə Pɛ̂pɛ fo nə è ndam ətəyn, fɨnə ndamə kè endom vɛ ə è tè nyi əfetuʼ fɛ Zhə̀fè tè tɔŋə vəyn. Ə̀ za nyi eghɛ zɛ ə m zaʼlə sê ndɛ sə Fezhə̀ sekɨ̂m.

¹⁸ Ə̂ nyi nâʼàpî ndè mə ə tə se namə vəynghe tsɔ̀fə kə Zhə̀fè tɔŋə vəyn, kə è və momsə sə̂ ndə̂tə̀ èndwɔ̂ elùʼ vɛ ə tè se nam ə vəynghe ətəyn. Ə wùə nyi mə è və pomə tɔŋə̂ ə Fezhə̀zè, ndɔ̀ʼɔ se namə vəynghe, kə è fɨyn pi nə ə se.

¹⁹ E za nyi nə kə se namə wûəghè kɨ̀sə tàʼa se, kiva ghɛze se nə̀yn. Ghɛ e tɛze nyi ke sə̂ ndə̂mə̀ alàŋ ə Fezhə̀kè.

²⁰ Nâʼàpî ndè kyi sə̂ nyi ke endom vɛ ə è tè nyi tsɔ̀fə kə è pomə tɔŋə̂ ə Fezhə̀zè.

²¹ Wùə tè nyi akɔ̂s əfetuʼ fɛ ə Zhə̀fè tè tɔŋə vəyn, kə ghɛ ətəynze fo ngəʼ sê vəyn, pîza ə è kyi ndom se nə̀yn nə ə za vəyn nə è və nyi sə və ngɨŋ, è və nə̀.

²² Ə Zhə̀fè tɔŋə̂ wùə mə nyi akɔ̂s nə è və chumtə̀ Pɛ̂pɛ, sê Pɛ̂pɛ ə è və fɨyn vachi àkɔ̂s kepî èghɨ kə wùə vɛ ə è tè va akɔ̂s ashìŋə̀ kɛ ə Klâys tè tɔŋə vəyn, ə è kəmne ə è və nyi àkɔ̂s sê Klâys.

²³ Zhə̀fè se nyi mə Fə zhɔyn ghàyn ə ndàʼà; kûmə̀ nyiəmə, kə ghàyn nəyn ngɨŋ saynse sə̂ nyi èkɔ̂s se ghɨghe.

²⁴ M pîə ə ghɔnyì ghɨmə nə, nâʼàpî ndè ə ghàyn ə fètəyn faŋ ke endom vɛ ə è tè nyì yî Zhə̀fè ətəyn əfetuʼ fɛ ə fe tè tɔŋə vəyn.

Ətepfɨf kûmə̀ ə̀ghɨ ghɛ ə nyi ndɔ̀ʼɔ malə è kɨsè zhwîə kwuə

²⁵ M pîə èghɛ zôyn se pə̀ynsè eghɛ zɛ ə ghàyn tè pfɨf kûmə̀ ə̀ghɨ ghɛ ə ghe pa tsɨs ndɔ̀ʼɔ malə. M kyi va lâŋkè mə ə̀ tsɛ̀se Pɛ̂pɛ, m pîə kə èghɛ zɛ m̀ kwâʼtə̀ kə wùə ə Pɛ̂pɛ kose səyn sê vəyn ə nə̀ ghɨghe ə samsə̂ vəyn.

²⁶ M kwàʼtə̀ nə, e tsɔ̂fə̀ nə wùə faŋ ke za kûmə̀ m̀lùŋtsuŋ mɛ ə m̀ nyì zôyn.

²⁷ Ə ò kyi zhwi, kə ò nə kyiŋ èndom se chùm ə vəyn, ò pa tsɨs ndɔʼɔ ò kyi, kə mɔmse se malə.

²⁸ Pîza mə ò malə, ò paʼà nə̀yn pi, mə wùə èzhɔyn nyiəm keva wùə endômə̀, ə malə, è paʼà pa nəyn pi, pîza ghɨə malə tə kyîə tètsôs fa mbi, ə̀ nyi tètsôs nə tɨ̂nə̀ ə m mɔ̂msə̀ se puʼse nə kə ghàyn tə kyî.

²⁹ Nâʼà èghɛ zɛ ə m pîə ə ghɔnyì ghɨmə, nyi nə, shîŋə̀ kɛ ə ndə̂m se nyi mə kə paʼse, se zhə̀tè zôyn se ndù əshi, ghɨ ghɛ ə ghe kyi zənə kyi sə̂ ndamə kəpiə ghənə kyi va,

³⁰ əghɛ ə ghe chîə, ə chîə kəpiə ə pfɨ̀ynə̀ kyaʼà chîə va, ə ghɨ ghɛ ə ghe chaʼa ə nyi ke kə̂ ghɛ ə ghe saŋnə va ndô. Ghɨ ghɛ ə zhɔnə fɨave ə nyi ke kə̂ fɨa ətəynve kyi va ghənə.

³¹ Ghɨ ghɛ ə ghe fɨaʼà è fɨa ə chive kyi va sə̂ tɔʼ kyi èghɛ kûmə̀ èfɨa ətəynve. M pîə nyi kûmə̀ nə ndom vɛ ə mbi zɨ̀nə nyi ətəyn zôyn kyi va ndam etyâzè.

³² M kyiŋə nə kə ghɛ nə fɨmsê ghàyn. Wùə vɛ è tàʼa malə ndə̀mə̀ ə̀təm ə vəynghe kè sə̂ nə̂ èfɨaʼ ə Pɛ̂pɛze, kûmə̀ nə è mɔ̀msə̀ se nə̀yn eghɛ zɛ ə ze nə̀ nə̂ ə Pɛ̂pɛ ə saŋnə.

³³ Pîza wùə è malə ndə̀mə̀ ə̀təm ə vəynghe kè əghɛ ə mbighe, sə̂ nə̂ nə zhwìə vəyn ə saŋnə̂;

³⁴ ze nə̂ è fɨyn kyi va kwaʼtè zemɔ̀ʼ. Wùzhɔyn vɛ è tàʼa malə̂ kɨ̀sə ngɔ̀yn ə̀ wùzhɔyn vɛ ə è nyìəm keva wùndômə̀, kyi sə nə̂ kə àfɨaʼ ə Pɛ̂pɛke kûmə̀ nə è kyiŋə se fo ewiyn ə vəyn è zuʼsə vəynse sê Pɛ̂pɛ; pîza wùzhɔyn vɛ ə è nyi mə è və malə̂ ndə̀mə̀ kə ə̀təm ə vəynghe ə ghɛ ə mbiə, kûmə̀ nə è kyiŋə nə təm ə ndomə̀ vəynghe ə saŋnə̂.

³⁵ M pîə èghɛ nə zɨnə kûmə̀ nə m kyiŋə se tsàmtə ghàyn, ə va nə m kyiŋə se kwiynse eghɛ se ghàyn. M pɨlə kyiŋə kə se nə̀yn nə ə nə̂ ə̀ghɛ endom echûŋvè kə ghe ə kwîə ə mbaŋə ə mbaŋə, se fɨnə nə̀yn nə ghàyn fo ngɨŋ saynse sekɨ̂m sə nə̂ èfɨaʼ ə Pɛ̂pɛze.

³⁶ Ə wùə fe nə zhi tsɨs nâʼàpî ashìŋə̀ àkè, kwaʼtə̀ kə vâyn èzhɔyn mə yî vəyn ə tè ndə̀m nə ə tə malə, è və fe nə wùzhɔyn ə̀təyn ə ndəmə̂ kwəyn se malə̂, è və kwàʼtə̀ fe nə zhi nyi malə, è və nə̀ èghɛ zɛ ə è kwàʼtə̀. Ə̀ vachi pi, ghənə kaʼa malə.

³⁷ Pîza mə ə wùə nyi mə è və lotê ndəm ə və təm nə zhi malə va mə ə paʼà ŋamnê ndò vəyn, mə ə è lote ke ndò se kyî ə ngɨŋə̂ vəyn nâʼà àchûŋ, mə è və kàynè ndəm ə vəyn ətəm ghɛ zɛ ə è kyiŋə se nə̀yn, ə nyi èghɛ echûŋ nə ke è malə.

³⁸ E za nyi nə wùə vɛ è malə ngɔ̀yn ə̀ vayn èzhɔyn vɛ ə è nyìəm keva wùndômə̀ nə̀yn ke nâʼà èghɛ e chuŋè, vɛ è tàʼa malə è nəyn eghɛ, ze tsɔ̀fə̀ tsɛ̂ zɛmə.

³⁹ Wùzhɔyn èmalə fɨyn kyi va se malə kwəynse ezhoghɛ ndomə̀ vəyn pa ndamə, pîza mə ndomə̀ vəyn kwu, ə è və nyi kàʼa è malə nâʼà pîndè vɛ ə təm ə vəynghe kɔ̂ŋɔ̀, wùə ə̀təyn e kyi sə nyi wùə èpomə.

⁴⁰ Ə nyì ə mi ekwaʼtè, ə wùzhɔyn ətəyn kaʼa è və saŋnə̂ tsɛ̂ ashìŋə̀ kɛ è faŋ ke za. M kwàʼtə̀ nə Zuʼsə Fezhə̀sè chisə̂ kəpî ndò mi.