1 Kɔlìŋ 15 - Ŋwàʼlè ə̀ Fèzhə̀ Mkâyn Mə̂ Fèm

Ezômə̀ ə Klâyszè

¹ M kyiŋə zôyn ə ghɔnyì ghɨmə se pyə̀ytè ə tom èchûŋ zɛ m tè tsàyn sê ghàyn, gha zɨə ə pomə sè tyəm kə təyn.

² Ə̀ nyi tom èchùŋ nə zɨ̂nə̀ m ndaʼà sê ghàyn. Ə̀ sɔ̀zâ tom èchùŋ nə zɨnə̀ ghàyn ezhoghɛ ə ghàyn fɛte tyəm kə təyn, ə puzâ ə zə nyi nə pomə̂ zaynze tè nyì ke sə ndô.

³ M tsɛsə̀ fo pə̂ se ghàyn ghɛ zɛ ə tè fo sê mi, mə ə̀ lote nyi kàyntè èghɛ, mə ze nyi nə Klâys tè kwu kûmə̀ sèpi sə ghasènìse kè kə nyi mə ə nyàʼ ə ŋwàʼlè ə̀ Fə̀zhə̀ nə,

⁴ ə tə pfɨ̀mə̀ Vəyn, È və kɛsə̂ zômə̀ epàmə m̀tuʼ mta kè kə ə nyi mə ə nyàʼ ə ŋwàʼlè ə̀ Fèzhə̀ nə,

⁵ È və tə fɨ ə Pità ekyàʼ, ə fɨə ghɨətom ghə shi njòse pɛ̀.

⁶ È və fɨə kəpi ə chùmtè èpàm sə Vəynse əshi se tsɨ̂ə tsɛ̂ tèwə tetâyn kè sə eshîŋə̀ èmɔ̀ʼ, mə tsɨ̀tsɨə ə̀ ghənə pa ndamə ndò pî kə yîghe nyi mə ə kwu.

⁷ È və tyə̀ynə̀ ngɨŋə̂ vəyn sê Njə̂m ə fɨnə tyə̂nə̀ se ghɨətomə nâʼà ə̀kɨ̂m.

⁸ Epàm ətəyn è və ke tyə̀nə kwùŋsə ngɨŋə̂ vəyn sê mi nâʼàpî kə m nyi kə wùə ə tè piə ndɔʼɔ shîŋə̀kè kwəyn.

⁹ Kûmə̀ nə m nyi wùə vɛ è tətə kwûŋsə̀ əfètəyn ə̀ghɨtomə, kûmə̀ nə mə tə tsə̀fsè ndɛ ə̀ Fèzhə̀.

¹⁰ Pîza kûmə̀ àfùʼ ə Fèzhə̀kè, m nyi wùə vɛ m nyi vəyn. Mə fùʼ nə kɨ̂yn paʼà njìsè sə ndô. Mə pɨl fɨ̂aʼ nâʼà sə ŋaŋ, ə fɨaʼa tsɛ̂ nâʼàpî ndè əfètəyn ə ghɨətomə nâʼàpî kə ə̀ tè laynsə fɨaʼà va mi, ə̀ tè fɨ̂aʼ afùʼ ə Fèzhə̀ nə kɛ ə mì ewìyn.

¹¹ E za nyi nə, kɨ̀sə ə̀ tè tsàyn mi tom è chûŋ nə zɛ, kɨ̀sə ə̀ tè tsayn ə ghɨ mɔ̀ʼɔ, ə̀ zɨnə nyi eghɛ zɛ ə ghàs əkɨ̂m ndàʼà, ə̀ nyi kepî èghɛ zɛ ə ghàs pomə.

Ezômə̀ ə ghasènìze

¹² Zôyn kə tom zâszè se nyi nə Klâys ə tə zòmə̀, ghàyn yîghe kaʼa pi zayn nə ghɨ ghɛ ə nyi mə kwu tə zômə̀ va?

¹³ Ə ze nyi səmɔʼ, ə nyi nə Klâys tè paʼà zòmə̀.

¹⁴ Mə ə̀ nyi nə ə tè pâʼà zòmsè Klâys, ə ghàs ə kiva ghɛze se ndàʼà, ghàyn e kyi kepî va ghɛze se pomə̂ se zəynze.

¹⁵ Ze pize ətəyn nyi nə, e tyə̂nə̀ nə ghàs wamə àkaŋ kûmə̀ Fèzhə̀, kûmə̀ nə ghàs ə pì nə È və tə zòmsè Klâys, pîza ə ze nyi səmɔʼ nə ə tə zômsə̀ va ghɨ kwutəghe, ə zə nyi nə è tè paʼà zòmsè Klâys

¹⁶ Ə ze nyi səmɔʼ nə ə zômsə̀ va ghɨ, ə zə tyə̂nə̀ nə ə tè paʼà pɔŋ zòmsè Klâys.

¹⁷ Mə ə̀ nyi nə ə tè paʼà zòmsè Klâys, ə pomə̂ zaynze ə nyi kə sə ndô, ghàyn e pa nyi ke mə ə njìsè ə ghàyn ə sepi.

¹⁸ Ə zə tyə̂nə̀ kəpi nə ghɨ ghɛ ə nyi mə pomə̂ se Klâys, mə kwu nyi mə ə njìsè.

¹⁹ Ghâsènì e sè nyi mə və fo ngɨŋsə ghasènìse sê Klâys nə È tsamte ghâsènì, è nyi se tsàmtè kûmə̀ kə èndam zɛ ghâsènì ndamə ə mbi zôyn, ə zə kwəynə̂ kə ə nə kosə̂ èsəyn sê ghâsènì tsɛ̂ kə ə kosə nâʼàpî se ndè və mɔʼɔ ə mbi.

²⁰ Pîza səmɔʼ ətəyn nyi nə ə tə zòmsè Klâys kèpi kə tə zômsə̀ ghɨ ghɛ ə ghe nyi mə ghə kwu.

²¹ Kè kə kwue tè pəyn ə chi mə ə̀ nəyn wùə, kèpi èghɨ famə endom, zômsè ə wûəzè tè pə̀yn kepî famə endom.

²² E za nyi kəpi èghɨ kə ghɨ ghəkɨ̂m kwuə kûmə̀ ètsɨ̂yntè ə ghənə̂zè yîghə̀ Andàm, kèpi famə endom, ə tə zômsə̀ ə̀ghɨ ə̀kɨ̂m endam kûmə̀ ètsɨ̂yntè ə ghənə̂zè yighə̀ Klâys.

²³ Pîza nâʼàpî ndè tə zômə̀ kə vəyn ashìŋə̀, ə Klâys sə shi, ashìŋə̀ kɛ ə è pə̀yn, ə ghɨ ghɛ ə̀ nyi ghə Və zomə.

²⁴ Ə mɨ̀se ke pə̀yn, shîŋə̀ kɛ ə Klâys tə tɛ tsɛ̂ nâʼà zuʼse pi sekɨ̂m, è twɔʼve ə È tsɛse fo eluʼ efɔ̀yn sê Zhə̀fè mə ə̀ za nyi pɨ̀a.

²⁵ Klâys kyi ke sə saʼa se zaʼâ kə È tɛ tsɛ sèpàyn sèkɨ̂m se ndə̀mə ghənə ə Vəyn etyə̂ ə̀ghòl.

²⁶ Kwùŋse ə̀ pàyn vɛ kə tɛ tsɛ tə pə̂ ə nyi èkwu.

²⁷ Ŋwàʼlè ə̀ Fèzhə̀ pi nə, “Zhə̀fè ə ndə̀m fɨa vekɨ̂m ə Vəyn etyə̂ ə̀ghòl nə è və saʼa.” Ze panə kə ə ndayn nə ghɛ zɨ̀nə nyiə nə, “Fɨave kɨm,” nyi mə ə paʼà paʼsê Zhə̀fè ətəyn, mə ə̀ ndəm Vəyn fɨa vekɨ̂m ə Klâys etyə̀.

²⁸ Pîza shîŋə̀ kɛ ə ndə̂m mɨsè fɨa vekɨ̂m ə Klâys etyə̂ èsaʼ, ə Vəyn è ngɨŋə̂ Vəyn, mə za nyi vayn, ndəm ngɨŋə̂ Vəyn ə Zhə̀fè etyə̀, ə Fɛ ə Fe ndə̂m fɨa vekɨ̂m ə Vəyn etyə̀, ə Zhə̀fè ke saʼ mɨ̀sè əghɨ ə̀kɨ̂m.

²⁹ Ezhoghɛ e nyi nə ghɨ tə zômə̀ va səmɔʼ, əghɨ etɛghe ə fiə zàyn mômè əghɨ kwutəghe elùʼ, ə tɔf ətəynze ə nyi nə ghe ə? Ezhoghɛ ə ze nyi nə tə zômsə̀ va ghɨ, əghɨ ghə fiə m̀mo əghɨ kwutə nə ghɛ elùʼ kûmə̀ ghè ə?

³⁰ Mə se ghàs, ghàs tə pə̂ ə tyəm ke zàyn shîŋə̀ tekɨ̂m ə kwuze echo ə?

³¹ Soyn sɨmse, m tyəm ke echo èkwu tuʼmè m̀kɨ̂m. Ghaŋse ewìyn zɛ m kyi sê ghàyn, ə ghâsènì akaʼ amɔ̀ʼ è Klâys Njisə̀s Pɛ̂pɛ ə̀ ghâsènì, nə̀ mi nə m pi ghɛ zɨ̀nə nyiə nə,

³² Saʼ zɨme nyi nâʼà ghè kə m tè nô ə Efesùs ghasè ghɨ, ghənə nyi kə senyam sə mbvɨynse, ezhoghɛ ze fe nyì ke nâʼà səmɔʼ nə ghɨ tə zômə̀ va ə? Ə ze se nyi nyî, ə zə tyə̂nə̀ nə ghəmɔ̀ʼɔ pîə kə nâʼà səmɔʼ nə, “Ghâsènì nə zhiə kə ndò fɨnə mɨə kûmə̀ nə ə̀ tə nyi eyisəʼə ə ghâsènì kwutê ə njise.”

³³ Kə wùə tə lə̂ʼsè ghàyn. Ghàyn e ke nə, “Soynse pise nyiə pofsə̂ endam e chûŋzè.”

³⁴ Ghàyn kɛse pəyn ə ghàyn ə tetɔf ə kəmne ə ghàyn ə tendom tə pite. M pîə nyi kə ghàyn ghomə kûmə̀ nə ghàyn yîghe keva Zhə̀fè.

Ewiyn vɛ ə ve nyi mə və zômə̀

³⁵ Wùə vîvè tə pfɨfə nə, “Ə kaʼa zomse zayn ghɨghe nə ghe kɛse pəyn endam ə? Ghənə tə pə̂ ə kyi èwiyn èkwə̀”

³⁶ Ngoa afɨa! Shîŋə̀ kɛ ə ò zho ngwàʼ ə chi, ndom va kə è fol ndɔ̀ʼɔ è kwu.

³⁷ Fɨa kɛ ə ò zho nyi ke ngwàʼ èzom, mə ə̀ nyì ke èshiə sɔ̀fzè ə̀ puzâ eshi ə ngwàʼ ə ndôzè, ə̀ vachi èwiyn ngwàʼ vekɨ̂m ə ve nə̀ ndəmə kɔʼɔ pə̂.

³⁸ Zhə̀fè fo kə èwiyn vɛ ə fe kɔ̂ŋə̀ nâʼàpî sê kyì ə ngwàʼ èkè, ə nyi ke èwiyn vɛ ə ve kwənə sê kyì ə ngwàʼ nə zɛ.

³⁹ Wiyn efɨa e zhwisə vekɨ̂m vachi èghɨ. Ghɨ kyi ke èkyì ewìyn ə ghənə̂, nyamse kyi ke və ghənəvè. Nɨ̂ŋmè kyi mə ghənə̂m nə mwiyn, mbwɔ̀ve kyi kepî èkyì ewìyn ə vəyn.

^40-41 Fɨave nyi ekwùtwəyn, kyi èwiyn sə nɨŋ, fɨave nyi ə chi, kyi èwiyn sə nɨŋ. Fɨa vɛ ə ve nyi ekwùtwəyn kyi ke èkyì etsɔ̀f ə ghənə̂zè, vɛ ve nyi ə chi e kyi ke èkyì etsɔ̀f ə ghənə̂zè. Zhwize kyi etsɔ̂f ə vəynze, njɔŋ e kyi zə vəynze, nɨ̂ŋme pɔŋ kyi zə ghənə̂zè. Nâʼàpî fèlî fèkè fe kyi ke ètsɔ̂f sə nɨŋ.

⁴² Ə̀ nyi zamə kə ze tə nə̂ ə zə nyi ezhoghɛ ghɨ zômə̀. Wiyn vɛ ə pfɨ̀mə̀ tə fîə, ə vɛ ə ve zòmə̀ tàʼa fɨnə fì.

⁴³ Shîŋə̀ kɛ ə pfɨ̂mə̀, ve saʼtə̀ kyaʼà kə nyi fɨnə pɔylə̂. Shîŋə̀ kɛ ə zômsè, ve tsɔ̂fə̀ kə nyi fɨnə tɛ è tyaʼa.

⁴⁴ Shîŋə̀ kɛ ə pfɨ̂mə̀, ə̀ nyi àchaʼ ewìynke, shîŋə̀ kɛ ə zômsè, ə̀ nyi èwiyn ə Sezuʼ se Ŋwaʼase.

⁴⁵ Ə nyàʼ ə Ŋwàʼlè Fezhə̀ nə, “Wùə əshi Andàm, ə tè fɛte nə è və nyi wùə èndamə”; Andàm è kwùŋsə, mə ə̀ za nyi Klâys tè pə̂yn nyi sèzuʼ sɛ se nə̂ nə ghɨ ghə ndamə.

⁴⁶ Ə̀ vachi èwiyn ə sezuʼve ə ve pə̂ sə shi pîza ə̀ pə̀ və achaʼve, və sezuʼve ə se pə̀yn.

⁴⁷ Andàm ə̀shi vɛ ə tè fɛte mchi tè pə̀yn mchi, Andàm e kòmtə ə pə̀ ekwùtwəyn.

⁴⁸ Ghɨ ghɛ ghe nyi ə chi nyi ke kə wùə vɛ ə tè fɛte è chimè, ghɨ ghɛ ghe nyi ekwùtwəyn nyi kə wùə vɛ ə è tè pəyn ekwùtwəyn.

⁴⁹ Kè kə ghâsènì kyàʼà kə wùə vɛ ə tè fɛte è chîəm, ə̀ nyì kepî zamə kə ghâsènì tə nə̂ ə kyaʼà kə wùə vɛ ə è ndò ekwùtwəyn.

⁵⁰ Ghɛ zɛ m pîə ə ghɔnyì ghɨmə nyi nə, ə fɨa kɛ ə ke fîə ə kiva ghɛze se nə̀yn yî kɛ ə ke fîə va.

⁵¹ Ghàyn zɨte, m tsayn ghɛe, mə wùə paʼà tyəmə̂ kê. Ghâsènì tə kwuə mɨ̂sə̀ va əkɨ̂m, pîza ghâsènì əkɨ̂m tə pə̂ ə nyi mə kwiyne.

⁵² Fɨake tə ŋwaŋə̀, ə wùə piə è mbɨytə̀ kə èshi, ə tɔŋ kendò sɔŋze. Pɔ̀m nə ə tə tɔŋɔ èsɔŋ, ə ghɨ ghɛ ə nyi mə kwu zomə mə vayn kàʼa fɨyn kwu, ə ghâsènì kwiyne ə kyi èwiyn efeve.

⁵³ Kûmə̀ nə wiyn vɛ ə ve fîə kyi se kwiynə pə̀yn se vɛ ə ve fîə va, ə wiyn vɛ ə ve tə kwuə ə kyi se kwiynə pə̀yn se vɛ ə ve tə kwuə va.

⁵⁴ E za nyi nə shîŋə̀ kɛ ə zɨnə mə tə kyânə̀, ghɨ ghɛ ə fîə ə kwiynə̂ nduə se ghɛ ə ghe fîə va, ə ghɛ zɛ ə nyi mə ə nyàʼ ə ŋwàʼlè ə̀ Fèzhə̀ ke pə̀yn səmɔʼ nə, “Ə pofsê kwue, tɨmə ezhize ə pə̀yn mɨsè.”

⁵⁵ “Tyaʼ kɛ ke ə tɨmə zhiə, ke kâynzə kwue? Fɨl zɛze zâyn zə?”

⁵⁶ Fɨl ekwuze nyi pi, pi e kyi kə vəynke nə atyaʼ tɔynə̂ alàŋ.

⁵⁷ Pîza zɔ̀ŋnèkè ndùə sê Zhə̀ fɛ ə fe nə̀yn nə ghâsènì tɨm zhi èkwu toynə̂ se Pɛ̂pɛ ghâsènì Njisə̀s Klâys.

⁵⁸ E za nyì ə soyn sɨmse chûŋsè nə, ghàyn fɛte tyəm ə nyi è pɨaʼtêzè. Ghàyn e zâŋsè nyi ke shîŋə̀ tekɨ̂m ə Pɛ̂pɛ efɨ̀aʼ kə ghàyn se ke nə ghɛ zhîze va ə ghàyn nə̀ ə Pɛ̂pɛ efɨ̀aʼ mə ze nyi sə ndô.