1 Kɔlìŋ 13 - Ŋwàʼlè ə̀ Fèzhə̀ Mkâyn Mə̂ Fèm

Ekɔ̂ŋ

¹ Ə m kaʼa m mə wamnə̀ tèwâmnè tə ghɨ̀ msɔ̀ŋte, è tə setsìtè, pîza mə m kiva kɔ̂ŋzè, ə wâmnè zɨmze ə nyi ke kə ngyìm ə̀ puzâ kə mbəŋne kə puʼə.

² M kaʼa m mə kyi èfo se fɛtə ndaʼà eghɛ ə Fezhə̀zè, nyi kàʼa m mə ke ə̀ghɛ ə̀kɨ̂m, nyi kàʼa m zɨ kê ə̀ghɛ ə ndətə ghəkɨ̂m, m kaʼa m mə kyi èpomə̂ mə ze kaʼa ə ze muʼ pfɨ̀yn, pîza mə m kiva kɔ̂ŋzè, ə zə nyi nə m va nâʼà àfɨa kyîke.

³ Ə m kaʼa m fo fɨsə nâʼàpî àkè kɛ m kyi, se fɨnə fo nâʼà ewiyn vɨmve nə ə nyɔʼ, pîza mə m kiva kɔ̂ŋzè, ə zɨnə mə ə nə̂ va chùŋ zhîzè sê mi.

⁴ Kɔ̂ŋè nyi ewəynsê ewìynze è təm əchûŋghè; ə̀ vachi sə̂ naynə̂ àfɨa kɔ̂ŋə̀ nə ə̀ fe nyì sə̂ kyi gho, pî se pfɨ̀yn angàŋtè, pî sə kyi èghaŋsê ewìynze.

⁵ Wùə vɛ ə è kɔ̀ŋə̀, chìynə̀ va ghɨghe, è kwaʼtə̀ kə va se ngɨŋə̂ vəyn, è nyɔʼsə̀ va tɔŋve, è ndə̂mə̀ va ghɛ ə pi ghɛ ə nyi mə ə nə̀yn se vəyn ə və təm,

⁶ è saŋnə̂ va è pi, pîza è saŋnə̂ è səmɔʼ.

⁷ Wùə vɛ ə è kɔ̂ŋè, è pɔ tsɛ̂ va, shîŋə̀ tekɨ̂m è nyiə kyi èpomə, è nyiə kwaʼtə̀ lɨmtə̂ se kyî afɨa kɛ ə è lɨmtə, kyi kepî èwəynsê ewìynze.

⁸ Kɔŋè mìə tsɛ̂ va, pîza tom sɛ ə fɨ̀aʼtèsè fo nyi ke sə fendiŋə̀ fə ashìŋə̀fè; ghɨghe e wâmnə̀ tèwâmnè mə ə paʼà zaʼlê pîza mə te nə mîə; ghɨghe e kyi kepî ètɔf pîza mə ze tə pə̂ tsɛ̂.

⁹ Kûmə̀ nə fo ə ghasènìze, tɔfe, è tom zɛ ə fɛtə fo nyì ke apɨaʼ apɨaʼ.

¹⁰ Pîza shîŋə̀ kɛ ə ghɛ zɛ ə ze tsɔ̂fə̀ kwəynə tə pə̂, ə zɛ ə ze nyi apɨaʼ apɨaʼ saŋ.

¹¹ Shîŋə̀ kɛ m tè nyi vayn èpɔ, m tè wàmnə̀ kə vâyn èpɔ, m tè kwàʼtə kə kə vâyn èpɔ, nə̂ ə̀ghɛ kə vâyn èpɔ. Shîŋə̀ kɛ ə m tè ndəmə, mə zàmaʼà ə̀ghɛ ə vâyn èpɔghe.

¹² Ghɛ ghɛ ə ghâsènì fe zôyn nyì ke kə ghe nyi anâynè mə ke tɔ̂ʼɔ̀ panə va, pîza ghâsènì tə fe shwi m̀shwi awulə. Ghɛ zɛ m ke zɔ̂yn nyì ke àpɨaʼ, mə awulə, m tə kê nâʼàpî ghè, kepî kə Zhə̀fè ke nâʼàpî ghè kûmə̀ mi.

¹³ Nyiəmə, ə̀ nyi əghɛ ghɨ̀nə̀ ə̀ ta ə ghâsènì kyi sə̂ kyi, epomə̂, è ghɛ ghɛ ə ghâsènì kwàʼtə̀ se kyi, è kɔŋè; pîza ghɛ eghaʼâzè famə əghɛ ə̀kɨ̂m nyi ekɔ̂ŋ.