1 Kɔlìŋ 12 - Ŋwàʼlè ə̀ Fèzhə̀ Mkâyn Mə̂ Fèm

Fo tɛ ə Zuʼse ŋwaʼase fo

¹ Zôyn, kûmə̀ ə̀ghɛ ghɛ ə ghàyn tè nyâʼ kûmə̀ tèfo tɛ ə Zuʼse Ŋwaʼase fo, soyn sɨmse m kyiŋə nə ghàyn ke səmɔʼ kûmə̀ ə̀ghɛ ətəynghe.

² Ghàyn ke ndô nə ə̀ tè nyi kə ghàyn tè nyìəm va əghɨ poməghe, e ləʼsə̀ ghàyn ə tendom te tsɨəte nə ghàyn ə ngɨmnə̂ èfɨaʼsè mə ve kyi va ndamze.

³ M kyiŋə nə ghàyn ke nə wùə vîvè va mə chisə Sèzuʼ sə Fezhə̀sè è vəyn ə è kàʼa è pi nə, “Ə ndi ə Njisə̀s ə tu” mə wùə vîvè vayn kàʼa è pi nə, “Njisə̀s nyi Pɛ̂pɛ,” mə ə̀ chisə va Zuʼse Ŋwaʼase vəyn.

⁴ Kyì tə tefo tə Sezuʼ se Ŋwaʼate tsɨ̀ə kə nyî, pîza mə ə̀ fo kə Sèzuʼ sə Fezhə̀ semɔ̀ʼ.

⁵ Ndomte tsɨəte nyîə nyi ə fɨaʼà ətəyn sê Pɛ̂pɛ, pîza ə̀ nyi ke Pɛ̂pɛ emɔ̀ʼ ə fɨaʼà sê vəyn.

⁶ Tyaʼ kɛ ə ghɨə kyi se nə̀yn efɨaʼ va eghɨ, pîza ə̀ nyì ke Fèzhə̀ fèmɔ̀ʼ ə fe fo tyaʼ nə kɨ̂nə̀ sê ghɨə ghəkɨ̂m nə ə nə̂ èfɨaʼ ə ghənə̂zè ətəyn.

⁷ Zhə̀fè fo Sèzuʼ sə Vəynse nâʼàpî se ndè nə sə tsâmtə̀ vəyn è nə̂ èfɨaʼ kè sə chùŋ ə̀ghɨ ə̀kɨ̂m.

⁸ Zuʼsə təynse fo se wùə vîvè tom mə è nyiə kyi ètɔf eghaʼâzè, sê wùə mɔʼɔ, se fo tom mə è nyiə kyi èkê.

⁹ Ə̀ nyì ke sèzuʼ sɨ̂nə̀ ə se fo sê wùə vîvè pomə̂ etɛze, sê wùə mɔʼɔ, sə fo àtyaʼ nə è və ke se tsuʼə tezaf.

¹⁰ Zuʼ nə sɨ̂nə̀ fo se wùə èmɔ̀ʼ, tyaʼke nə è və nə̂ ə̀ghɛ əkayntəghe, se wùə vîvè, sə̂ fo àtyaʼ nə è və tsâ ə̀ghɛ mə ghe ndo sê Zhə̀fè, sê wùə vîvè, sə nə̀ nə è və ke sə nɨŋ nə Zuʼse ndo sê Zhə̀fè mə se paʼà ndò chi se Zhə̀fè ə, sê wùə vîvè, sə̂ nə̀ nə è və ke se wâmnè ə tewâmnè ndɔ̀ʼɔ è zaʼle, sê wùə vîvè, sə̂ nə̀ nə è və zɨə kê tèwâmnè tə təynte, tsâ èghɛ zɛ ə te pîə.

¹¹ Pîza ə̀ nyì ke sèzuʼ nə sɨ̂nə̀ ə se nə̂ ghɛ nə ghɨnə̀ ə̀kɨ̂m, mə se fo tèkyì tə tefote sê nâʼàpî ndè kè kə se kɔ̂ŋə̀.

Wiynve kyi èpɨ̂as etsɨəve

¹² Klâys nyì ke kə ewiyn emɔ̀ʼ ə ve kyi pɨ̂as etsɨəve; ə̀ pa nyi ke èwiyn emɔ̀ʼ pi kə ve kyi pɨ̂as etsɨəve.

¹³ Kèpi famə endom, ghâsènì əkɨ̂m, kɨ̀sə əghɨ ə Njûsə̀, kɨ̀sə əghɨ ghɛ ə va əghɨ Njûsghè, kɨ̀sə ekɔ̂s, kɨ̀sə ghɛ ə va ekɔ̂s, Zuʼ sɨ̂nə̀ semɔ̀ʼ ə tə fo ghâsènì môm kə ghâsènì ə nyi èwiyn emɔ̀ʼ, Zhə̀fè ə ndə̀mə̀ Sèzuʼ nə sɨ̂nə̀ semɔ̀ʼ ə ghâsènì əkɨ̂m ətəm.

¹⁴ Wiynve nyi nyî kyi ke va pâskè amɔ̀ʼ, pîza ve kyi èpɨ̂as, ve tsɨ̂ə kə nyî.

¹⁵ Ə gholke kaʼa ə ke pi nə, “Kûmə̀ nə m vachi àgho, m va apâs ewìynke,” ə zɛ mə tàʼa nə̀yn nə kə̂ kə fɨyn va àpâs ewìynke.

¹⁶ Mə ə tôŋneke ke pì nə, “M vachi àpâs ewìynke kûmə̀ nə m̀ vachi èshi,” ə zɛ mə tàʼa nə̀yn nə kə kə fɨyn nyi àpâs ewìynke.

¹⁷ Ə wiynve ekɨ̂m fe nyì ke èshi, ə və zɨə zàyn ghɛ ghe ə? Ə wiynve ekɨ̂m nyi ke àtôŋne, ə və lɨ̂mtə̀ zàyn fɨave ə?

¹⁸ Kè kə ze nyi, Zhə̀fè tè ndə̂m èpɨas ewìynve sə nɨŋ sə nɨŋ kè kə è tè kyiŋə nə və nyi.

¹⁹ Ə wiynve kɨ̂m fe kyi ke àpâs àmɔ̀ʼ, mə wiynve ndəʼ va.

²⁰ Kè kə ze nyi, pɨas ewìynve nyi setsɨ̀ pîza kyi ke èwiyn emɔ̀ʼ.

²¹ Kûmə̀ zɨnə mə, Shize vayn kaʼa ze pi sê ghoke nə, “M kyiŋə va gho,” pî àtu se pì se gholke nə, “M kyiŋə va gho.”

²² Ghâsènì vayn kàʼa pɨl nyi, mə kiva pɨ̂as vɛ ə ve nyi kə ve pɔylə̂ ndò.

²³ Pɨas ewìyn vɛ ə ghâsènì kwàʼtə̀ nə ve fɛte kiva m̀kɔʼnè pɨl nyi vɛ ə ghâsènì fɛtə fo kɔʼsêzè sê vəynve, mə pɨ̂as ewìyn vɛ ə ve nyə̂lə̀ kyâʼà nyi vɛ ə fɛtə tɔ̂ʼnə̀ è vəynve,

²⁴ mə vɛ ə ve tɔ̂ʼə̀ tsɔ̂fə̀, ə tɔ̂ʼnə̀ va è vəynve. Zhə̀fè è ngɨŋə̂ Vəyn ndəm ewiyn sə afɨa amɔ̀ʼ endom se fo èkɔʼsê etsɨəze se pɨ̂as vɛ ə ve kyiŋə kɔʼsê ətəynze.

²⁵ Nyiəmə wiynve kiva se chyàsə ngɨŋə̂ vəyn, pîza pɨ̂as ewìynve kyi sə̂ kɔ̂ŋə̀ və mɔ̀ʼɔve kè eghɨ.

²⁶ Ə pâs ewìynke amɔ̀ʼ zɨə ngəʼ, ə pɨas ewiynve ekɨ̂m ə zɨə kəpî ngəʼ è kəynke. Ə tsîtə̀ pâs ewìynke amɔ̀ʼ, ə pɨas ewiynve ekɨ̂m ə saŋnə̂ è kəynke.

²⁷ Nâʼà ghàyn əkɨ̂m nyi ewiyn ə Klaysvè, mə nâʼàpî ndè nyi apâs ewìyn ətəynke.

²⁸ Ə ndɛ ə̀ Fèzhə̀, Zhə̀fè nyi mə Fə ndə̀m ghɛ ghəkɨ̂m, shike nyi ə̀ghɨtomə, kòmtèke nyi sè fɨ̀aʼtè, ta e nyi sètyə̀ynsè. È və tə ndə̀m kepî ghɨ ghɛ ə ghe nə̂ ghɛ əkayntəghe, ə̀ chûmtə ghɛ ə ghe kyi foze sə̂ tsuʼə ə̀ghɨ, pî sə̂ tsâmtə̀ ə̀ghɨ, chisə̂ ə̀ghɨ e wâmnə̀ ə tewàmnè tə ndôtè ndɔ̀ʼɔ zaʼle.

²⁹ Ə̀ vachi ə̀ghɨ ə̀kɨ̂m ə nyi əghɨtomə, kɨ̀sə se fɨ̀aʼtè, kɨ̀sə setyə̀ynsè. Ə̀ vachi nâʼàpî ndè ə è kyi tyaʼke sə̂ nə̂ ə̀ghɛ kaynəghe

³⁰ pî sə tsuʼə tèzaf, pî sə wamnə̀ tèwâmnè tə ndôtè ndɔ̀ʼɔ ghənə zaʼle, pî se fɛtə tsâ paynsê èghɛ zɛ ə wâmnè tə təynte pîə.

³¹ Ghàyn e nô se kyiə tefo te ghaʼâtè. M tə chwîtə̀ ghàyn ndom vɛ ə ve tsɔ̂fə̀ tsɛ̂ ndom tekɨ̂m.