1 Kɔlìŋ 11 - Ŋwàʼlè ə̀ Fèzhə̀ Mkâyn Mə̂ Fèm

¹ Ghàyn səyne ndam zɨme kè kə m səynə zə Klâyszè.

Sə̂ kɨtə̂ atu ashìŋə̀ kɛ ə ngɨmnə Zhə̀fè

² M tsîtə̀ ghàyn kûmə̀ kə̂ ghàyn zàŋsə̀ kwaʼtə̀ mi, ndə̂mə̀ èzaʼlê zɛ ə m tè fo sê ghàyn.

³ Pîza m kyiŋə nə ghàyn fe kê nə, Klâys nyi atu sê nâʼàpî wùə endômə̀ èkè, wùə ndomə̀ e nyi àtu se zhwîə vəyn, Zhə̀fè nyi àtu se Klâys.

⁴ E za nyi nə wùə ndomə̀ vɛ ə è tsə̀mə̀ kɨ̀sə è ndàʼà tom ə̀ Fèzhə̀ è tu ə vəynke mə è və kɨtê, ə nyi èghomə̂ sê Klâys.

⁵ Mə ə wùzhɔyn tsə̂mə̀ kɨ̀sə è ndàʼà tom ə̀ Fèzhə̀ ndɔ̀ʼɔ è kɨte tu ə vəynke, ə zə nyi nə è ghomsə̂ ndomə̀ vəyn. E nyi kepî èghɨ kə è və kɔm tuə vəynke.

⁶ Mə wùzhɔyn va se kɨl afɨa ə və atu, ə zə tsɔ̂fə̀ nə è laynse kɔm àtu ətəynke, pîza kə ə̀ nyi eghɛ e ghoməze sê wùzhɔyn se kɔm atu, ə zə tsɔ̂fə̀ nə è kɨl kəynke.

⁷ Wùə ndômə̀ kyi va se kɨl atu ə vəynke kûmə̀ nə è nyi afûsè ə Fezhə̀kè è pomsê ə Vəynze, pîza wùzhɔyn e nyi afusè ə ndomə̀ vəynke.

⁸ Ə tè paʼà njì pâs ewìyn ə wûzhɔynke ə fɛtə̂ wùndômə̀ ətəyn, ə tè pɨl njî kə wûndomə̀kè ə fɛtə wùzhɔyn ətəyn.

⁹ E nyi kəpî èghɨ kə̂ ə tè tàʼa pom ə wùndômə̀ sê wùzhɔyn, ə tè pɨl pom wùzhɔyn sê wùndômə̀.

¹⁰ Kûmə̀ sètsì, wùzhɔyn kyi sə̂ kɨlə àfɨa ə və atu se tyə̀yn nə è nyi ə ndom ə̀ vəyn etyə̀.

¹¹ Pîza, sê ghâsènì ghɛ ə pomə sê Pɛ̂pɛ, wùzhɔyn vayn kàʼa è və tyəm sə ngɨŋ, mə wùndômə̀ va, wùndômə̀ e vayn kàʼa è tyəm sə ngɨŋ, mə wùzhɔyn va.

¹² Kè kə wùzhɔyn nyi mə ə tè pom apàs ewìyn ə wûndomə̀kè, e nyi kepî èghɨ kə wùndômə̀ nyi mə ə̀ tè piə wùzhɔyn vəyn. Pîza mə ghɛ ghəkɨ̂m pə̀yn sê Zhə̀fè.

¹³ Ghàyn kwaʼte è ngɨŋ saynse nə ze tsɔ̂fə̀ ndò se wùzhɔyn nə è və tsə̂mə̀ ndɔ̀ʼɔ è kɨl fɨake ə və atu mə ze tsɔ̂fə̀ va.

¹⁴ Pî èndom vɛ ə Zhə̀fè nyi mə fə pom ghɨghe ətəyn fa mbi tyə̂ ndò nə ə wùndômə̀ kɔʼse nyuŋ sə atu se tyafəse, ə nyi èghɛ eghoməze sê vəyn,

¹⁵ pîza sê wùzhɔyn, ə̀ nyi eghɛ se nə̀yn nə è və tsɔ̂fə̀. Ə fo senyuŋ sê vəyn nə sə nyi kə afɨa ə è kɨl tuə vəynke ətəyn.

¹⁶ Pîza nâʼàpî ndè vɛ è kyiŋə se pì nə ghɛ nə zɨnə mə tsɔ̂fə̀ va, ə mə kyi ke se tsàyn se vəyn nə ghàs, pî ndɛ ə̀ Fèzhə̀ fɨyn kyi va ndom vîve sə̂ ngɨmnə̂ ətəyn.

Ewiyn ə Pɛ̂pɛve

¹⁷ Ə te zaʼlê tɛ ə nyi se fo sê ghàyn, m kyiŋə chîəva se tsìtə ghayn kûmə̀ nə nâʼàpî ashìŋə̀ àkè ə ghàyn zùŋtè se kɔʼsə̂ Fezhə̀, ze pɨlə nə̂ ghàyn pi tsɛ̂ kə ze nə̂ chùŋ.

¹⁸ Se zhə̀tè m kyiŋə se pì nə, ghɨghə tsàyn sê mi nə ghàyn pə̀ zûŋtə̀ ə ndɛ ə̀ Fèzhə̀, kyi echyâsè ə ghàyn ə fètəyn, m pomə̂ nə ghɛ mɔ̀ʼɔ nyi ətəyn kə̂ ə pîə, ghe nyi ke nâʼà səmɔʼ.

¹⁹ E kayntə̂ va ndô mi, chyâsè kyi ke sə̂ nyi ə ghàyn əfètəyn, kə ə fɛte fe kê ghàyn ghɛ ə lote nyi ə̀ghɨ ə Fezhə̀ghè.

²⁰ Shîŋə̀ kɛ ə ghàyn pə̀yn tsɨ̂yntè, ə̀ nə̂ vachi èwiyn ə Pɛ̂pɛve kə ghàyn zhiə,

²¹ kûmə̀ nə ghàyn piə zhiə ndò, ghàyn yîghe ə ndûə əshi sə zhiə kə èfɨazhiə ə vaynve, kûmə̀ zɨnə mə, chɨ̀ŋ e zafə ə̀ghɨ əmɔ̀ʼɔghe, mə ghə mɔ̀ʼɔghe ə zhi tsɛsè.

²² Ghàyn vayn kaʼa ə ghàyn ə zhiə, mɨə ə ghàyn ə sendɛ ə̀? Ghàyn chìynə̀ ndɛ ə̀ Fèzhə̀ tɔynə̂ endom vɛ ə ghàyn ghomsə ghɨ ghɛ ə ghe kiva mə? Ghàyn kwàʼtə̀ nə m kaʼa m pi nə ghe è ghàyn ə? Ghàyn kyiŋə nə mə tsîtə̀ ghàyn famə əghɛ nə ghɨ̂nə̀ ə ghàyn nə̀ mə? M vayn kaʼa m momse.

²³ Ghɛ zɛ m zaʼlə se ghàyn nyi zɛ ə m tè zɨ sê Pɛ̂pɛ, ze nyi nə, ə̀ tè nyi ètuʼve əfetuʼ fɛ ə tè pəʼle Pɛ̂pɛ Njisə̀s ətəyn, È və njìə àpayn ə kwaŋke,

²⁴ ə pə kə è fo zɔ̀ŋnèkè sê Zhə̀fè, ə pɨaʼlə̂ ə ke pì nə, “Ə̀ vɨnə nyi ewiyn Vɨme kə M fo sê ghàyn. Ghàyn zhi vəynve kə ve nəyn ə ghàyn ə kwâʼtə̀ Mi.”

²⁵ Ə pə̀ kə ə zhi mɨsè, È və nə̂ kəpî zâ è wà, ə pìə nə, “Wà zɨ̀nə nyi wà m̀kàyn me fêm mə ə zhɔyn è ndə̂m mîəm̀. Nâʼàpî ashìŋə̀ àkè kɛ ə ghàyn mɨ zə̂ynzè, ə è zə nə̂ nə ghàyn ə kwaʼtə̀ Mi.”

²⁶ E za tyə̂nə̀ nə nâʼàpî ashìŋə̀ àkè kɛ ə ghàyn zhiə payn ə kwaŋ nə kɨ̂nə̀, mɨə fa wà, ə zə nyi nə ghàyn tsà tom èkwu ə̀ Pɛ̂pɛ se zaʼâ kə è tə kɛsê pəyn.

²⁷ Nyiəmə, ə wùə se ghàyn zhi payn ə kwaŋ ə Pɛ̂pɛke kɨ̀sə è mɨ ə Və wà endom mə ve kyi va kɔʼsêzè sê Klâys, ə ze ə tyə̂nə̀ nə è və nə̀yn pi sê wiyn ə Pɛ̂pɛve è ndə̂m mə Və̂ynmè.

²⁸ Nyiəmə, nâʼàpî ndè kyi se fɛtə kyàʼsə naynê ə ngɨŋə̂ vəyn sə shi tsɔ̀fə kə è zhi payn ə kwaŋ ətəynke ə è se mɨ fu wà.

²⁹ Ze nyi nyî kûmə̀ nə ə̀ zhi pîndè payn ə kwaŋ nə kɨ̂yn ə fɨnə mɨə famə ə wà nə zɨ̂yn, mə è keva ndom vɛ ə wiyn ə Klaysvè nyi èŋwaʼze ətəyn, è və ke nə è zhiə, fɨnə mɨə kə ngəʼ ə və tu.

³⁰ Ə̀ za nyi eghɛ zɛ ə ghàyn setsɨ̀ zafə, fɨnə pɔylə̂, ghàyn yîghe e kwutə̂.

³¹ Ə ghâsènì kyàʼsè nayne ngɨŋsə ghasènìse sə shi, ə ghɛ ze ə va ə ze kaʼa ə ze nəyn nə Klâys pi nə ghâsènì ə nə̀yn pofsê.

³² Pîza Pɛ̂pɛ saʼa è və pɔynsə̂ ghâsènì kə shîŋə̀kè tə pəyn ə è tàʼa tsɨ̀yntə pofsə ghâsènì paʼsə̂ kə è mbi.

³³ E za nyi ə soyn sɨmse nə, shîŋə̀ kɛ ə ghàyn zùŋtè pə̂yn sə eghɛ emɔ̀ʼ se zhi ewiyn ə Pɛ̂pɛve, ghàyn ə lɨmtə̂ ə̀ghɨ ə̀kɨ̂m.

³⁴ Mə chɨ̀ŋ zafə wùə se ghàyn, è və zhiə ə ndɛ, kə shîŋə̀ kɛ ə ghàyn pə̀yn sə eghɛ emɔ̀ʼ, ə è tàʼa nə̀yn eghɛ kə Zhə̀fè fo tsôsvè sê vəyn. Sê ghɛ ə mɔ̀ʼɔghe, shîŋə̀ kɛ m pə̂yn, ə m chise ghàyn eghɛ zɛ ə ghàyn kyi se nə̀yn.