1 Kɔlìŋ 1 - Ŋwàʼlè ə̀ Fèzhə̀ Mkâyn Mə̂ Fèm

¹ Ə nyaʼ mi Pɔ̂l ŋwàʼlè zɨ̀yn. Ə̀ tɔŋə Fezhə̀ mi nə mə nyi wùətom ə̀ Klâys Njisə̀s. M nyâʼà ŋwàʼlè zɨ̀yn ghasè ànyìə ghâsènì Sòstinìs.

² M nyâʼà sê nɔ̂yn ə ndɛ Fèzhə̀ kɛ ə̀ kyi Fezhə̀, ə ke nyi endaʼ ə Kolìnzè, è kɨsè sê ghɨghe əkɨ̂m ghɛ ə Zhə̀fè tɔŋə ə nə̀ nə ghənə nyi ə̀ghɨ ə vəynghe ŋwaʼaghe tɔynə̂ ə Klâys Njisə̀s. Fɨnə nyâʼà se ghɨghe əkɨ̂m nâʼà pi ghayn, mə nyi ghɛ ə ngɨmnə Pɛ̂pɛ ə̀ ghâsènì Njisə̀s Klâys. È nyi Pɛ̂pɛ ə̀ ghənə̂ kèpi kə è nyi Pɛ̂pɛ ə̀ ghâsènì əkɨ̂m.

³ Ghàs tsə̀mə̀ nə Zhə̀fè pɨ̀a ghâsènì, è Pɛ̂pɛ ə ghâsènì Njisə̀s Klâys fo ghàyn fùʼkè è pɔ̂ynè.

Zhə̀fè pɔsə̂ ghâsènì tɔynə̂ ə Njisə̀s Klâys

⁴ M fo àzɔ̀ŋnè sê Zhə̀ fɨmfe shîŋə̀ tekɨ̂m kûmə̀ ghàyn, kûmə̀ àfùʼ kɛ ə è fo sê ghàyn tɔynə̂ ə Klâys Njisə̀s.

⁵ Kûmə̀ nə ghàyn nyì sə afɨa àmɔ̀ʼ e Klâys, ghàyn ə kyi fɨa echûŋvè ekɨ̂m, fɛtê ke se ndàʼa tom ə̀ Fezhə̀, fɨyn kyi ètɔf èkɨ̂m.

⁶ Ghɛ zɛ ə ghàyn zɨ kûmə̀ Klâys ə kyî ghaŋə, tɛ kə nyi ə ghàyn ə fètəyn.

⁷ Ze ə nə̀yn nə ghàyn tə faŋə va se fiə nâʼàpi èpɔse èkè zɛ Zuʼse ə Fezhə̀sè fo kə ghàyn lɨmtə shîŋə̀ kɛ ə Pɛ̂pɛ ə̀ ghâsènì Njisə̀s Klâys tə tyə̂nə̀ paynsə̂ ngɨŋə̂ vəyn ətəyn.

⁸ È nə̀ tsâmtə̀ nə ghàyn ə kyi ke èpomə̂ sê vəyn se zaʼâ ə kwùŋse, kə ghàyn tə nəyn ə kiva ghâmzè ə ezhoghɛ ə Pɛ̂pɛ ə̀ ghâsènì Njisə̀s Klâys kɛse pə̂yn.

⁹ Zhə̀fè pìə èghɛ, nə̂ kə zəynze. Ə̀ nyi Fəynfe ə Fe tɔŋə ghàyn nə ghàyn ə fɨaʼà sə eghɛ èmɔ̀ʼ è Va vəyn, ə Pɛ̂pɛ ə ghâsènì Njisə̀s Klâys.

Echâsè əfètə̂ ndɛ ə̀ Fèzhə̀

¹⁰ M chyatə̂ ghàyn ə ghɔnyì ghɨmə e zə Pɛ̂pɛ ə ghâsènì Njisə̀s Klâys nə ghàyn ə tyəm ke echo emɔ̀ʼ əghɛ ghɛ ə ghàyn pîə kə châsè zə va ə ghàyn ə fètəyn. Ghàyn kyi sə̂ pɨl nyi ke kə wùə èmɔ̀ʼ, è kɨsè endom vɛ ə ghàyn fe ghɛghe ətəyn.

¹¹ M pîə nyî ə ghɔnyì ghɨmə kûmə̀ kə̂ ghɨ ndɛ Kɨ̀lowè tsàyn sê mi nə zɔ̂zè nyi ə ghàyn əfètəyn.

¹² Ghɛ zɛ ə m pîə nyi nə nâʼàpî ndè ə ghàyn ə fètəyn wâmnə̀ kə sə nɨŋ. Ghɨ yîghe pìə nə, ghənə nyi əghɨ ə Pɔ̂lghè; yîghe pîə nə, ghənə nyi əghɨ ə Àpolòsghè; ghəmɔ̀ʼghe e pìə nə, ghənə nyi əghɨ ə Sefàsghè, yîghe pîə nə, ghənə nyi əghɨ ə Klâysə̀.

¹³ Ə̀ za nyi nə ə chyate ndô Klâys mə? Ə̀ nyi Pɔ̂l kə è tè kwu awâmnè mə? Ə tè fo mmo sê ghàyn nə ghàyn ə nyi sèchùmtè èpàm sɨmse mə?

¹⁴ M fo àzɔ̀ŋnè sê Zhə̀fè nə m tè paʼà fo môm sê wùə sê ghàyn ə tsɛ̂ kə va Klispùs yî Ngayùs.

¹⁵ E za tyə̂nə̀ nə wùə sê ghàyn vayn kàʼa è pi nə ə fo mmo sê zhi nə zhi ə nyi chùmtè èpàm zɨ̂mè.

¹⁶ (Mə kwàʼtè nə mə tə fo mômè se ghɨ ghɛ ə tè ndamə Shɨ̀tèfanàs ə ndɛ. Epàm ə zɨnə mə, m kɛsə̂ kwaʼtə̀ va nə mə tə fo môm se wùə vîvè)

¹⁷ Klâys tè paʼà tom mi nə m pəyn fo m̀mo sê ghɨ. È tè tom nə m pəyn ə mə ndâʼà tom èchùŋ, tsâ va è tɔf eghaʼâ ə ghɨ̀zè, kə kwu ə vəynze awâmnè tàʼa njìsè atyaʼ kɛ ə ze kyi.

Klâys nyi atyaʼ è tɔf eghaʼâ ə Fezhə̀zè

¹⁸ Ghâsènì ə ke nə tom èkwu ə̀ Klâys awâmnè nyi kə eghɛ angôze sê ghɨ ghɛ ə ghe njisə̀ ndûə, pîza se ghâsènì ghɛ ə Klâys tè sɔ̀zâ, ze tyə̂nə̀ àtyaʼ ə Fezhə̀kè.

¹⁹ Ze nyi ke èghɨ kə̂ ə nyaʼ ə ŋwàʼlè ə̀ Fezhə̀ nə: “M nə̀ pofsə̂ ètɔf eghaʼâ zɛ əghɨ ə tɔfəghe kyi, m nə̀ nə̂ ə ŋwàʼlè əghɨ̀ ə ŋwàʼlèghè ə va nâʼà eghɛ zhize.”

²⁰ Wùə ètɔfə se vâyn zə? Tyə̀ynsè èsaʼ vâyn? Nâʼà wùə vɛ ə è ke se wàmnè ə əghɛ ə mbi ghɨnə ghe nâʼà àchuŋ vàyn zə? Pîə Zhə̀fè ə nə̀yn tɔf eghaʼâ ə ghɨ mbi zɛ ze kɛse sè nyi ke ango ə?

²¹ Kûmə̀ nyiə mə, Zhə̀fè tɔynə̂ ə vəyn etɔf eghaʼâzè ə nə̀yn nə wùə vayn ndə̀ʼə kê vəyn tɔynə̂ ə vəyn etɔf eghaʼâ ə ngɨŋze. Zhə̀fè tè nyîə pɨlə saŋnə̂ tɔynə̂ əfètə̂ ‘àngo’ kɛ ə tè ndàʼa, è və sɔ̀zâ ə̀ghɨ ghɛ ə tè pomə.

²² Ghɨ Njûsə̀ kyiŋə kə sèchwìə se kaynəse, ghɨ Nglêkghè e kyiŋə sə̂ kyi etɔf eghaʼâzè,

²³ pîza ghàs e pɨlə ndaʼà kə nə ə tè payntê Klâys, ə tom mə ghɨə Njûsghè kɔ̀ŋə̀ va, è ze va nâʼà eghɛ zhîze sê ghɨ ghɛ ə ghənə va əghɨ ə Njûsghè.

²⁴ Pîza sê ghɨ ghɛ ə Zhə̀fè tɔŋə, kɨ̀sə ə̀ nyi əghɨə Njûsə̀, kɨ̀sə ə̀ va əghɨ ə Njûsə̀, ghənə ke nə Zhə̀fè tyə̀nə̀ àtyaʼ ə vəynke è tɔf eghaʼâ ə vəynze tɔynə̂ ə Klâys.

²⁵ Kûmə̀ nə ghɛ ə Fezhə̀ zɛ ə ze nyi kə ango nyîə kyi ètɔf eghaʼâzè tsɨ̂ə tsɛ̂ ètɔf eghaʼâ ə wûə m̀sɔ̀ŋze, mə ghɛ zɛ ə ze kyaʼà kə ze kyi va tyaʼa se Zhə̀fè nyîə kyi àtyaʼ tsɛ̂ àtyaʼ ə wûə m̀sɔ̀ŋke.

²⁶ Ghɛ zɛ ə m pîə ə ghɔnyì ghɨmə nyi nə, ghàyn kɛse kwaʼtè kə̂ ghàyn tè nyi tsɔ̀fə kə Zhə̀fè tɔŋə ghàyn. Ə ghàyn tè nayne ə ghàyn əfètəyn, mə ghàyn ə tə fe nə ghɨ ghɛ ə ghɨ msɔ̀ŋghe tè njîə sə ghɨ ə tɔfə tè tsɨə va, ghɛ ə tè fe nə ə̀ nyi əghɨ atyaʼa e tsɨ̂ə va, ghɛ ə tè fe nə ghe fɨ ətesas tə ndɛte tɛte e tsɨ̂ə va.

²⁷ Pîza Zhə̀fè ə chɔʼ ghɛ ghɛ ghɨ mbiə fe nə ə̀ nyi ango se nə̀yn nə ghɨ tɔfə ghomə, ə fɨnə chɔʼɔ ə̀ghɛ ghɛ əghɨ ə mbi ghɨnəghe njîə nə ghe va eghɛ se nə̀yn nə ghɨ atyaʼa ghomə.

²⁸ Zhə̀fè ə chɔʼ ghɛ ghɛ ə ghɨ mbi ghɨnə ghe njîə nə ghe va eghɛ, kyi va shîŋə̀kè ətəyn, kə ghɛ zɛ ə ghɨ ə mbi ghɨnə njìə nə ze kyi m̀kɔʼnè, ə zə va èghɛ zhize,

²⁹ kə wùə ə kyi va ghɛze se ghaŋse ewiyn ətəyn ə Zhə̀fè əshi.

³⁰ Pîza ə̀ nəyn Fezhə̀ nə ghàyn ə nyi sə eghɛ èmɔ̀ʼ ghâyn ghə̀ Klâys Njisə̀s, ə nə̀ nə è və nyi ètɔf eghaʼâ ə ghasènìze, ə nə̀ nə ghâsènì ə tyəm chichi ə Zhə̀fè əshi tɔynə̂ ə Klâys, ə fɨnə tɔynə̂ kəpi ə Klâys ə nə̀ nə ghâsènì ə nyi è ŋwâʼzè, ə zhɔnə àtu ə ghasènìke.

³¹ Ə̀ za nyi eghɛ zɛ ə ze nyi ke èghɨ kə̂ ə nyaʼ ə ŋwàʼlè ə Fezhə̀ nə, “Ə̂ ghaŋsə pîndè wiyn, è ve ghaŋsə̂ kə kûmə̀ èghɛ zɛ ə Pɛ̂pɛ nyi mə È və nə̀yn.”