रोमी 7 - बारेली पावरी

¹ हे भाशो काय तुमुक नी मालूम होय, मे नियम जानणे वावा काजे कोयो कि जत्यार तोक माणूस जीवतलु रोयतलू तेत्यार तोक तीना पोर नियमोन होक रोयतलु छे?

² काहाकि वियाव कोरला बायर नियमोन अनसारे आपना ओदमी काजे जीवतलेन बांधायली छे बाकीन लाडूस मोर जाय ती ची तेरा घोरवावान नियमोन अनसारे छुट जाय.

³ इनान कोरता ओगर घोरवावान जीवतेलामा ची काहनास दिसरान लाडी बोन जाय ती चो व्यभिचार कोवायसे बाकीन अगर लाडूस मोर जाय, ती ची तिना शास्त्रनियमोन गोथो छुट जाय न्या तोक कि अगर काहनास दिसरा माणसोन होय जाय ते बी सिनावो नी कोवाये.

⁴ तोसोत हे मारा भाशो, तुमु बी येसु मसिहन डीलोन लारे शास्त्रनियमोन कोरीन मोरला बोन गोया कि तिना दिसरान होय जाय, जू मोरलामा गोथू जीव उठ्यू; काहाकि आपु परमेश्वरोन कोरीन फोव लावे.

⁵ काहाकि जेतार आमु डीलोमा होता ती पापोन लालच जे शास्त्रनियमोन लारे होतो मोरनोन फोव पोयदा कोरनेन कोरता आमरा डीलोमा काम कोरती होती.

⁶ बाकीन हिमी जिनान बंधनमा आमु होता तिनान कोरता मोरीन हिमी शास्त्रनियमोन नुसार ओसा छुट गोया कि लिखलान जूनली रितीन अनसारे नि बाकीन आत्मान नोवली रितीसी सेवा कोरतेला छे.

नियम एने पाप

⁷ ती आमु काय कोयजे? काय शास्त्रनियम पाप छे? कोबी नि, बाकीन बिना शास्त्रनियमोन मे पापो काजे नी उवखी सोको, अगर शास्त्रनियम नी कोयती कि लालच मा कोरे ती मे लालच काजे नी जानतू,

⁸ बाकीन पाप टेम हेरीन आग्यान लारे मारेमा आखा भातीन लालूच पोयदा कोऱ्यु काहाकि बिना शास्त्रनियमोसी पाप मोरलो छे.

⁹ मे ते बिना शास्त्रनियोम पेहेले जीवतलु होतु, बाकीन जेतार आग्या आवी, ती पाप जीव गोयो, एने मे मोर गोयू.

¹⁰ एने ची आग्या जी जीवनोन कोरता होती मारेन कोरता मोरनेन वोजा बोनी.

¹¹ काहाकि पाप टेम देखीन आग्यान लारे मेसे काजे बहकव्यू, एने तिनान लारे मेसेक मारी बी देदु.

¹² इनान कोरता शास्त्रनियम चुखलो छे एने आग्या बी चुखलो एने सोही एने वारली छे.

पापोसी वाचाडनेमा नियम नाकाम

¹³ ती काय जी वारली होती, ची मारेन कोरता मोत बोन गोयी? कोदि नी, बाकीन पाप तिनी वारला चीजोन लारे मारेन कोरता पोयदा कोरणे वावू आव्यु कि तेरो पाप होयनो सामने आवे एने आग्यान लारे पाप घोन सोवटो ठेराय.

¹⁴ आमु काजे मालूम छे कि शास्त्रनियम ते आत्मिक छे, बाकीन मे डीलोन एने पापोन हाते वेचायलू छे.

¹⁵ जो मे कोय चो नी उवेखतलु, काहाकि जो मेसेक गोवे चो नी कोरतेलू, बाकीन जीनासी मेसेक रीस लागतली चोत कोरतेलू,

¹⁶ अगर जो मेसेक नी गोवे चोत कोरतेलु ती मे मान लेयो कि शास्त्रनियम वारलो छे.

¹⁷ ती ओसली दोशामा तिनान कोरणे वावू मे नी होय, बाकीन पाप जू मारेमा बोस रोयू.

¹⁸ काहाकि मेसेक मालूम छे कि मारेमा मतलब मारा डीलोमा काहणी वारली चीज नी रोयतली मोर्जी ते मारेमा छे, बाकीन भोलाईन काम मारेसी नी होय सोकतलो.

¹⁹ काहाकि जिना वारला कामोसी मे, मोर्जी कोरतेलू छे चो ते नी कोरतेलू बाकीन जिना बुराइन मोर्जी नी कोरतेलू चोत कोरतेलू छे.

²⁰ आखरी, अगर मे चोत कोरतू रोयो जेरी मोर्जी नी होय ती तेरु कोरणे वावू मे नी रोयो बाकीन पाप जो मारेमा वोसलो छे.

²¹ इना रितीसी मे यो शास्त्रनियम मानो कि जेतार भोलाई कोरनेन मोर्जी कोरतेलू ती बुराई मारेंचा आवतेली छे.

²² काहाकि मे माहिवावा आत्मासी परमेश्वरोन शास्त्रनियमोन घोनो खुशीमा रोयतलो छे.

²³ बाकीन मेसेक आपना डीलोमा दिसरे भातीन शास्त्रनियम देखाय देतली छे, जी मारे बुद्धीन नियमोसी लोळायतली छे एने मेसे काजे पापोन शास्त्रनियमोन बंधनमा नाखतेली जी मारे डीलोम छे.

²⁴ मे कोसू मेहनती माणूस छे; मेसेक इना मोरनोन डीलोसी कून छुळावे?

²⁵ आमरा प्रभू येसु मसिहन लारे परमेश्वरोन धन्यवाद होयो इनान कोरता मे खुद बुद्धीसी परमेश्वरोन शास्त्रनियमोन बाकीन डीलोमा गोथो पापोन शास्त्रनियोम सेवा कोरतेलू.