रोमी 6 - बारेली पावरी

पापोन कोरता मोरोन एने परमेश्वरोन कोरता जीवन

¹ ती आमु काय कोयजे? काय आपु पाप कोरता रोयजे कि दया जादा होये?

² कोबी नि, आपु जेतार पापोन कोरता मोर गोया ती ओवतेन ओवी तीनामा कोसा जीवन जोगजे?

³ काय तुमु काजे नी मालूम कि आपु आखा येसु मसिहन बाप्तिस्मा लेदा, तेरा मोरनेन बाप्तिस्मा लेदा.

⁴ आखरी, तीना मोरनोन बाप्तिस्मा होयनेसी आपु तीना साते गाळाय गोया काहाकि जोसो येसु मसिह काजे बासोन महिमान लारे मोरलामा गोथू जीवाळाय गोयो तोसोत आपु बी नोवला जीवनोन चाल चालजे.

⁵ काहाकि अगर आपु तेरी मोतोन समानतामा बी जुळाय गोयला छे, ती छाचलीन तेरो जीव उठनेन समानतामा बी जुळाय जासू.

⁶ आमु काजे मालूम छे कि आमरो जूनलो माणसोन रूप तेरे साते ख्रुस पोर चोळाय गोयो, काहाकि पापोन डील बिन कामोन होय जाय एने आपु ओगा पापोन बंधनमा नि रोयजे.

⁷ काहाकि जू मोर गोयू, चू पापोसी छुटीन धोरमी ठेहऱ्यु.

⁸ इनान कोरता अगर आपु मसिह साते मोर गोया ती आमरू भुरसू यु छे कि तेरे साते जीवसू बी.

⁹ काहाकि यो मालूम छे कि मसिह मोरलामा गोथू जीव उठीन पोछु नि मोरे, तीना पोर पोछा मोरणन होक नी होय.

¹⁰ काहाकि चू जू मोर गोयू ती पापोन कोरता एकुत कावा मोर गोयू; बाकीन जे जीवतला छे ती परमेश्वरोन कोरता जीवतला छे.

¹¹ ओसात तुमु बी आपना खुदो काजे पापोन कोरता ते मोर गोयू बाकीन परमेश्वरोन कोरता मसिह येसुमा जीवतला सोमजू.

¹² इनान कोरता पाप तुमरा नाशवंत डीलोमा राज नी कोरणो जुवे कि तुमु तेरी लालचोन होकमा रोयू;.

¹³ एने नी आपना डीलो काजे धोरमोन हत्यार होयने कोरता पापोन होवाले कोऱ्या एने आपना खुदो काजे मोरलामा गोथा जीव उठनेन जानीन परमेश्वरोन होवाले कोऱ्या एने आपना डीलो काजे अधोरमोन हत्यार होयनेन कोरता परमेश्वर काजे आप देदा.

¹⁴ तेत्यार तुमरे पोर पापोन बंधन नी रोये काहाकि तुमु शास्त्रनियमोन ताबामा नी होय बाकीन दयान ताबामा छे.

पापोन गोथा, परमेश्वरमा

¹⁵ ती काय होयो? काय आपु इनान कोरता पाप कोरजे कि आपु शास्त्रनियमोन ताबामा नी बाकीन दयान ताबामा मा छे? कोदि बी नी,

¹⁶ काय तुमु नी जानतला कि जेरी आग्या माननेन कोरीन तुमु खूदो काजे नोवकरोन तोसो सोप देजे तेरात गुलाम छे, चाहे पापोन, जेरो ओमोरकाई जीवनोन मोरनो छे, चाहे आग्या माननेसी जेरो धारमिकता छे.

¹⁷ बाकीन परमेश्वरोन धन्यवाद होये कि तुमु जे पापोन गुलाम होता हिमी मोनोसी तीना प्रचार मानने वावा होय गोया जिनान विचारोमा चाल रोया होता.

¹⁸ एने पापोसी छुळाव जाणेसी धोरमोन गुलाम बोन गोया.

¹⁹ मे तुमरे डीलोन कोमजूरी पोरसी माणसोन रिती पोरसी कोयो कि जोसो तुमु आपना डीलोक भुंडला कामोन गुलाम कोरीन होवाले कोरलो होतो तोसोत हिमी चुखलान कोरता धोरमीन गुलाम कोरीन सोप देवू.

²⁰ जेतार तुमु पापोन गुलाम होता ती धोरमीन तोरोफसी स्वातंत्र होता.

²¹ आखरी जिनी वातोसी हिमी तुमु लाजवायतला, तीनु काजे तिनी टेमे तोक काय फोव जोळतलो? काहाकि तेरो आखरी ते मुसा छे,

²² बाकीन हिमी पापोमा गोथा छुटकारू होयीन एने परमेश्वरोन दास बोनीन तुमु काजे फोव जोळे जीनासी चुखलाय जोळतली छे तेरो ओमोरकाईन जीवन छे,

²³ काहाकि पापोन दाहाळकी ते मोत छे बाकीन परमेश्वरोन वरदान आपना प्रभू येसु मसिहमा ओमोर जीवन छे.