रोमी 4 - बारेली पावरी

अब्राहाम भुरसान सी धोरमी गीनायनो

¹ इनान कोरता आमु काय कोयजे आमरू डीलोन बास अब्राहाम काजे काय जोळ्यो?

² काहाकि अब्राहाम कामोसी धोरमी ठेराय गोयू, ती तीना काजे मोटाय कोरणेन जागू होतु, बाकीन परमेश्वर साते नी.

³ पवित्र शास्त्र काय कोये? यो कि “अब्राहाम परमेश्वर पोर भुरसू कोऱ्यु, एने यो तेरेन कोरता धोरमी गीनाय गोयो.”

⁴ काम कोरणे वावान दाहाळकी तेरो दान नि, बाकीन होक सोमवाय जातलो छे.

अब्राहाम पुऱ्या पेहेलेत भुरसासी धरमी गीनायनो

⁵ बाकीन जो काम नी कोरे बाकीन बिना भोक्तीन धोरमी ठेरायने वावा पोर भुरसू कोरतेलू, तेरु भुरसू तेरेन कोरता धोरमी गीनाय जातलो.

⁶ जीना काजे परमेश्वर बिना कामोन धोरमी ठेरावतलु तीनाक दाऊद भी सोयावा कोयतेलु.

⁷ “सोयावा जे जिंदरा पाप माफ होय गोया एने जिंदरा पापे ढाकाय गोया.

⁸ सोयावू छे जू माणूस जीनाक परमेश्वर पापी नी ठेरावे.”

⁹ ती यो सोयावा वचन, “काय सुंता वावान कोरता छे कि बिना सुंतावावान कोरता बी छे? आमु यो कोयतेला अब्राहामन कोरता तेरु भुरसू धारमिकता गीनाय गोयू.”

¹⁰ ती चू कोसू गीनाय गोयू? सुंतान लारे कि सुंतान नी कोरलान लारे? सुंता कोरलान लारे नी बाकीन सुंता नी कोरलान लारे.

¹¹ चू सुंतान चिन्ह लेदू कि तिना भुरसान धोरमी पोर छापू लागाय जाय जो चू सुंता नी कोरलान लारे मेकलु होतु, काहाकि चे बी धोरमी ठेराये;

¹² एने तीनु सुंता कोरलान बास जे निस्ता सुंता कोरला होता बाकीन आमरू बास अब्राहामन तिना भुरसान निशाणी पोर बी चालतला छे, जो चू सुंता नी कोरला लारे कोरलु होतु बाकीन भुरसान धोरमीन लारे.

¹³ काहाकि जू वायदू कोऱ्यु चू जोगोन वारीस होयसे नी अब्राहाम काजे नी तेरा पिढी काजे शास्त्रनियमोन लारे आपलो होतो बाकीन भुरसान धारमिकतान लारे जोडी.

¹⁴ काहाकि अगर शास्त्रनियोमवावा वारीस छे, ती भुरसू बिना कामोन एने वायदू बिना कामोन ठेरी.

¹⁵ शास्त्रनियम ते रीस उपजावेतली, एने जा शास्त्रनियम नी होय, चा तेरो नियम तुडनो बी नी होय.

¹⁶ इनान वोजेसी वायदू भुरसान लारे छे, कि चे दयान रिती पोर कि चे तेरे आखा पीढीन कोरता मजबूत होये, नी ते निस्तु तेरेन कोरता जू शास्त्रनियोम वावू छे; बाकीन तेरेन कोरता बी जू अब्राहाम सारकू भुरसावाला छे, चू आमरा आखान बास छे,

¹⁷ जोसो लिखलो छे “मे तुसे काजे घोणा सोवटा जातीन बास ठेरावलु छे” तिना परमेश्वरोन सामने जिना पोर तू भुरसू कोऱ्यु एने जू मोरलामा गोथू जीवतलु एने जे वाते होय नि तेरो नाव ओसो लेये कि सोमजू चू छे,

¹⁸ चू नाराजीमा बी आस राखीन भुरसू कोऱ्यु इनान कोरता कि तीना वचनोन लारे कि “तारी पिढी ओसी होयसे” चू घोणा सोवटा जातीन बास होये.

¹⁹ चू जू एकसोव सालोन होतु आपना मोरला कोमजुर डीलोन एने सारान पुऱ्या होयनेन गर्भ नि होय सोके ओसला हालोत जानीन बी भुरसू मा कोमजुर नी होयू.

²⁰ एने नी अविस्वासी होईन परमेश्वर वायदापोर शंका कोऱ्यु एने भुरसामा रोयीण परमेश्वरोन महिमा कोऱ्यु.

²¹ एने ठान लेदू कि जिना वातोन चू वायदू कोरतेलू छे, परमेश्वर तीना काजे पुरो कोरणे बी ताकत वावा छे,

²² इना वजेसी चू तिनान कोरता धोरमी गीनाय गोयू.

²³ एने यो वचन, “भुरसू तेरेन कोरता धोरमी गीनाय गोयू” निस्तु तेरेन कोरता नि लिखलो होय,

²⁴ बाकीन आमरेन कोरता बी जीनुन कोरता भुरसू धोरमी गीनाय गोयू एने आमरेन कोरता जू तेरे पोर भुरसू कोरतेला जू आमरा प्रभू येसु काजे मोरलामा गोथू जीवाळ्यु,

²⁵ चू आमरा पापोन गुणान कोरता धोराय गोयू, एने आमुक धोरमी ठेरावनेन कोरता जीवतू कोराय गोयू.