रोमी 3 - बारेली पावरी

परमेश्वरोन नियावोन राखवावी

¹ आखरी यहुदिन काय बोढाई, नी ते सुंतान काय लाभ?

² होर एक भातीन घोनो काय. पेहेले यो कि परमेश्वरोन वचन तीनु काजे आप देदा.

³ ओगर काहनुस विस्वासघाती कोरे तीबी काय होयो? काय अविस्वास्या होयनेसी परमेश्वरोन खोरलो वायबार ठेरावसे?

⁴ कोदि बी नी, बाकीन परमेश्वर खोरलू एने होर एक माणूस झुटू ठेरायसे, जोसो लिखलो छे “जीनासी तू आपनी वातोमा धोरमी ठेरावणे एने नियाव कोरनेन टेमे तुसेक जीत जोळे.”

⁵ इनान कोरता अगर आमरो अधोरम परमेश्वरोन धारमिकता ठेराव देतलू छे ती आमु काय कोयजे? काय यो कि परमेश्वर जू रीस कोरतेलु अन्यायसी छे? (यो ते माणसोन रिती पोर कोय रोयू,).

⁶ कोदि नि; नीती परमेश्वर जोगोन कोसू नियाव कोरसे?

⁷ अगर मारा झुटोसी परमेश्वरोन खोरलो तेरी महिमान कोरीन जादा होईन प्रगट होये ती एने काहा पापी सारखो मे दोंडोन लायक ठेराय जातलो?

⁸ “आमु काहा बुराई नी कोरजे कि वारलो निकवे?” जोसो आमरेपोर योत गुणू लागाळने बी जातलो छे, एने काहनास कोयतेला कि इंदरो योत कोयनो छे बाकीन ओसलान गुणावा ठेरावनेन ठीक छे.

आखा पाप कोरला से

⁹ ती ओवतेन काय होयो? काय आमु तिंदरेसी वारला छे? कोबी नि; काहाकि आमु यहुदिन एने युनानी दुयो पोर यु गुणू लागाळ देतला छे कि चे आखान-आखा पापोन ताबामा छे.

¹⁰ भविष्य कोरतान लारे ओसो लिखलो छे, “कुदू धोरमी नी होय, एक बी नी होय.”

¹¹ कुदू सोमोजदार नी होय, कुदू परमेश्वर काजे हेरने वावू नी होय,

¹² आखा भोटकी गोयला छे, आखान-आखा ठारला बोन गोयला छे; कुदू भोलाई कोरणे वावू नी होय, एक बी नी होय.

¹³ तिंदरू गोवू उगाळनेन मोळवाट्या छे, चे आपना जीबोसी छोळ कोऱ्या, तिंदरा हुट्यापोर घोळसान जेहेर छे,

¹⁴ तिंदरो मूय श्राप एने कोळवलासी भोरलो छे.

¹⁵ तिंदरा पाय लुय वोयाळनेन तियार छे.

¹⁶ तिंदरे वाटे नुकसान एने तोकलीत छे,

¹⁷ चे शांतीन वाट नी सोमव्या.

¹⁸ तिंदरा डूवा ओगोव परमेश्वरोन बिक नि होय.

¹⁹ आमु काजे मालूम छे कि शास्त्रनियम जो काय कोये चो, तीनु काजे कोये जे शास्त्रनियमोन अधीन छे; इनान कोरता कि हर एक मूय बोंद कोराय जाय एने आखो जोग परमेश्वरोन दोंडोन लायक होये.

²⁰ काहाकि शास्त्रनियम कामोसी काहनो प्राणी तेरे सामने धोरमी नी ठेराये, इनान कोरता कि शास्त्रनियमोन लारे पापोन उवखोन होयतलो.

भुरसान लारे परमेश्वरोन धारमिकता

²¹ बाकीन हिमी शास्त्रनियमोसी ओलोग परमेश्वरोन जी धारमिकता प्रगट होयली छे, जेरी गोवायी शास्त्रनियम एने भविष्य कोरता आपतला.

²² मतलब परमेश्वरोक जी धारमिकता जो येसु मसिह पोर भुरसू कोरणेसी आखा भुरसू कोरनेवावान कोरता छे. काहाकि काहीन भेद नि होय;.

²³ इनान कोरता कि आखा पाप कोरतेला छे एने परमेश्वरोन महिमासी छेटा छे,

²⁴ बाकीन तेरे दयासी तिना छुटकारान लारे जू येसु मसिहमा छे तेरे पुठी चू धोरमी ठेराय जातलू.

²⁵ तीना काजे परमेश्वर तेरो लुयसी एक ओसू पोस्तावू ठेराव्यू, जू भुरसू कोरणेसी ठेरायतलु छे, कि जो पाप पेहेल कोराय गोयलो एने जीना पोर परमेश्वर तेरी सहन शीलतान लारे ध्यान नी लागाळ्यु तेरे बारामा चू तेरी धारमिकता सामने लावे.

²⁶ बाकीन इना टेमोमा तेरी धारमिकतान सामने होये जेरेसी चू खुद धोरमी ठेरे एने जू येसु पोर भुरसू कोरे तेरो बी धोरमी ठेरने वावू होये.

²⁷ ती मोटाय कोरणे का रोयो? तेरुत जागू नी होय. कानली शास्त्रनियमोन अनसारे छे? काय कामोन शास्त्रनियोम छे? नी होय नीती शास्त्रनियोम नुसार,

²⁸ इनान कोरता आमु इना रिती पोर पुगतला कि माणूस शास्त्रनियमोसी ओलोगुत, भुरसान लारे धोरमी ठेरतलु.

²⁹ काय परमेश्वर निस्तु यहुदिजून छे? काय दिसरा जातीन नी होय? होव दिसरा जातीन बी छे.

³⁰ काहाकि एकुत परमेश्वर छे, जू सुंता वावा काजे भुरसासी एने सुंता नि कोरला काजे बी भुरसान लारे धोरमी ठेराव्यू.

³¹ ती काय आमु शास्त्रनियम काजे भुरसान लारे, बिन कामोन ठेरावतेला? कोदि नी, बाकीन शास्त्रनियोम काजे मजबूत कोरतेला.