रोमी 16 - बारेली पावरी

फिबे बहणीस काजे नमस्कार

¹ मे तुमु काजे फीबेन कोरता जी आमरी बहोनिश छे एने किंख्रियान मंडवीन सेविका छे, विनता कोरो.

² कि तुमु, जोसो कि चुखला माणसो काजे जुवे, चे प्रभू काजे स्वीकार कोरे; एने काहणी बी वातोमा तिनी काजे तुमरी गोरोज पोळे, तेरी मदत कोरु, काहाकि चू बी घोना सोवटा जोनान ओतरो नि बाकीन मारी बी उपकार कोरने वावी रोयली छे.

रोमोन पुढाऱ्या काजे नमस्कार

³ प्रीस्कील्ला एने अक्कविल्ला काजे जू येसु मसिहमा मारा साथीदार छे, नमस्कार.

⁴ चे मारा जीवन कोरता आपनोत जीवन अडचन मा घाल देदला होता; एने निस्तु मेत नि, बाकीन दिसरी जाती वावा आखा मंडव्या बी तिंदरो धन्यवाद कोरतेला छे.

⁵ इनी मंडवी काजे बी नमस्कार जे हिंदरा घोरोमा छे मारा मोंगावा इपैनितूस काजे, जू मसिहन कोरता आसियान पेहलो फोव छे, नमस्कार.

⁶ मरीयम काजे, जोतरा तुमरेन कोरता जादात मेहनत कोऱ्या, नमस्कार.

⁷ अन्द्रूनिकुस एने युनियास काजे जे मारा घोरानामा छे, एने मारे साते बोंदी होयला होता एने प्रेषितमा नामी छे, एने मारे गोथू पेहेले मसिही होयला होता, नमस्कार.

⁸ अम्पलियातूस काजे, जू प्रभूमा मारू मोंगावू छे, नमस्कार.

⁹ उरबानूस काजे, जू मसिहमा आमरू साथीदार छे, एने मारू मोंगावू इस्तखुस काजे नमस्कार.

¹⁰ अप्पीलेस काजे जू मसिहमा खोरलू निकव्यू, नमस्कार अरिस्तुबुलुसन घोराना काजे नमस्कार.

¹¹ मारा घोरानामा वावा हेरोद काजे नमस्कार नरकिस्सूसन घोरानान माणसे प्रभूमा छे, तीनु काजे नमस्कार.

¹² त्रुफेना एने त्रूफासा काजे जू प्रभूमा मेहनत कोरला छे, नमस्कार मारा मोंगावा पिरसिस काजे, जी प्रभूमा जादा मेहनत कोरली, नमस्कार.

¹³ रुफूस काजे यो प्रभूमा नेवाळलो छे एने तेरी आया काजे, जी मारी बी आया छे, दुयू काजे नमस्कार.

¹⁴ असुंक्रितुस एने फीलगोन एने हिमर्स एने पत्रबास एने हिर्मेस एने इंदरा साती एने भाशे काजे नमस्कार.

¹⁵ फिलूलुगुस एने युलीया एने नेरयुस एने हेरी बहोनिश एने अलुम्पास एने हिंदरा साती आखा चुखला माणसो काजे नमस्कार.

¹⁶ आपोसमा चुखला गुवासी नमस्कार कोरु तुमु काजे मसिह भूनीन आखा मंडव्या तोरोफसी नमस्कार.

फुट पाळन्याक निकावनो

¹⁷ हिमी हे भाशो, मे तुमरेसी विनता कोरो, कि जे माणसे तिना प्रचारोन खिलापमा, जी तुमु ली लेदला छे, फुटी घालने एने ठूकर खावळावने वोजा छे, तीनुक भोनाळ्या कोरु एने तिंदरे गोथा नांबे रोयू.

¹⁸ काहाकि ओसला माणसे आमरा प्रभू मसिहन नी, बाकीन आपना पेटोन सेवा कोरतेला छे; एने चिकनी चूपडी वातोसी सुदा-सादा मोनोन माणसो काजे बोहोकाव देतला.

¹⁹ तुमरी आग्या पावनेन चर्चा आखा माणसोमा पोसरी गोयली छे, इनान कोरता मे तुमरे बारामा खुशी कोरो, बाकीन मेसेक यो जुवे कि तुमु भोलाईन कोरता बुद्धिमान बाकीन बुराईन कोरता वारू बोनीन रोयू.

²⁰ शांतीन परमेश्वर भुतडा काजे तुमरा पायोसी मामार छेंद देसे आमरा प्रभू येसु मसिहन दया तुमरे पोर होयती रोये.

पौलुसोन दुस्तीदार सी अभिवादन

²¹ मारा सहकरमी तीमथीन, एने मारा घोरानामा वावा लूकियुस एने यासोन एने सोसिपत्रुस तुमु काजे नमस्कार.

²² मेसेक चिट्ठीक लिखने वावा तिरतियुस काजे, प्रभूमा तुमु काजे नमस्कार.

²³ गयुस जू मारी एने मंडव्या पाहांतराय कोरणे वावू छे, हिंदरु तुमुक नमस्कार. इरास्तुस जू नोगोरोन भंडारी छे, एने भाश क्वारतूसोन तुमु काजे नमस्कार.

²⁴ आमरा प्रभू येसु मसिहन गिन तुमरे पोर होयती रोये. आमेन.

आशिष

²⁵ हिमी जो तुमु काजे मारी वारली खोबर मतलब येसु मसिहन सोंदेसोन प्रचार अनसारे पाको कोरतू रोयतलु छे, तिना भेदोन विजावान अनसारे जो ओमोरकाईसी डूकाय रोयो,

²⁶ बाकीन हिमी देखायीन ओमोरकाई परमेश्वरोन आग्यासी भविष्य कोरणे वावान किताबोन लारे आखा जात्या काजे सोमवाळाय गोयो कि चे विश्वासी आग्या पावने वावा होय जाय,

²⁷ तिना एक एखलु बुद्धिमान परमेश्वरोन येसु मसिहन लारे कायम महिमा होयतो रोये, आमेन.