रोमी 15 - बारेली पावरी

दिसरान भार उठावनो

¹ आखरी आपु ताकत वावा काजे जुवे कि कोमजुर वावान कोमजुरी सोहोन कोरे, नि कि आपना खुदो काजे खुश कोरे.

² आमरे मायलु होर एक आपना साते वावा काजे हेरी वारलान कोरता खुश कोरे कि तेरी बोढती होये.

³ काहाकि मसिह आपना खुदो काजे खुश नि कोऱ्यु, बाकीन जोसो लिखलो छे “तारी बुराईन बुराई मारे पोर आव पोडी.”

⁴ जोतरा वाते पेहेलेत लिखाय गोया, जी आमरेत भोननेन कोरता लिखाय गोयो कि आमु धीर एने पवित्र शास्त्रान प्रोत्साहन लारे आस राखे.

⁵ धीर एने शांतीन दाता परमेश्वर तुमुक यो वरदान आपे कि येसु मसिहन अनसारे आपसमा एक मोन रोयू.

⁶ काहाकि तुमु एक मोन एने एक ओवाजमा आमरा प्रभू येसु मसिहन बास परमेश्वरोन बोढाई कोरे.

एकजूट होयीन परमेश्वरोन महिमा

⁷ इनान कोरता, जोसू मसिह परमेश्वरोन महिमान कोरता तुमुक स्वीकार कोरलु छे, तोसोच तुमु बी एक दिसरा काजे स्वीकार कोरु.

⁸ इनान कोरता मे कोयो कि जी वायदू बाप दादा काजे आपाय गोयली होती तीनुक पाका कोरनेन कोरता मसिह, परमेश्वरोन खोरलायीन सबूत आपनेन कोरता, सुंता कोरला माणसोक सेवक बोनाव;.

⁹ एने दिसरा जात्या बी दयान वजेसी परमेश्वरोन स्तुती कोर; जोसो लिखलो छे, “इनान कोरता मे जाती-जातीमा तारू धन्यवाद कोरीस, एने तारा नावोन भजन कोरिस.”

¹⁰ पोछो कोयलो छे, “हे जाती जातीन आखा माणसे, तेरी प्रजा साते खुशी कोरु.”

¹¹ एने पोछो, “हे जाती जातीन आखा माणसे, प्रभून बोढाई कोरु; एने हेरा राज्योन आखा माणसे, तिनान स्तवन कोरु.”

¹² एने ओवी यशयाह कोये कि, “यिशैयोन एक थुळ देखा पोळसे, एने दिसरा जातीन सुबेदार होयनेन कोरता एक उठसे, तिना पोर दिसरा जात्या आस राखसे.”

¹³ परमेश्वर जू आसोन दाता छे तुमुक भुरसू कोरणेमा आखा रितीन खुशी एने शांतीसी पुरेपूर कोरे, कि पवित्र आत्मान ताकतसी तुमरी आस बोढती जाय.

यरुशलेम गोथा इल्लुरिकुम जाणो

¹⁴ हे मारा भाशो, मे खुद तारा बारामा जरूर मालूम छे कि तुमु बी खुद भोलाई सी भोरू एने परमेश्वरोन ग्यानसी घोणा सोवटा होये इनीक दिसरा काजे जोताळ सोकतेला.

¹⁵ ते बी का-का फोम देवाळणे कोरीन तुमुक जुदो हिंमत कोरीन लिखलू छे यो तिना दयान वजेसी होयो जो परमेश्वर मेसे काजे आपलु छे.

¹⁶ कि मे दिसरा जातीन कोरता येसु मसिहन सेवक होयीन परमेश्वरोन वारली खोबर प्रचारोन सेवा पुजारा सारको कोर, जिनामा दिसरा जातीन चोळाव जाणेन पवित्र आत्मासी चुखो कोरीन स्वीकार कोराय जासे.

¹⁷ इनान कोरता तिनी वातोन बारामा जू परमेश्वर सी संबध राखतेला छे, मे मसिह येसुमा बोढाई कोर सोकतेलु.

¹⁸ काहाकि इनी वातो काजे छुळीन मेसेक ओवी काहणी वातोन बारामा कोयनेन हिंमत नि, जो मसिहमा दिसरा जात्यान ताबान कोरता वचन, एने कर्म,

¹⁹ एने चिन्ह, एने अदभूत कामोन ताकतसी, एने पवित्र आत्मान ताकतसी मारेत लारे कोऱ्यु; न्या तोक कि मे यरुशलेम सी लीन चारू भूनी इस्लुरीकुम तोक मसिहन वारली खोबरोन पुरू-पुरू प्रचार कोऱ्या.

²⁰ बाकीन मारी मोनोन मोर्जी यो छे कि जा मसिहन नाव नि लेवाय गोयो चात वारली खोबर कोयो, एने ओसो नि होये कि दिसरान पाया पोर घोर बोनावो.

²¹ बाकीन जोसो लिखायलो छे तोसोच होयो, “जीनुक तेरो वारली खोबर नि पुग्यू, चेत देखसे एने जे नि सोमव्या चेत सोमजसे.”

रोममा जानेन योजना

²² इनान कोरता मे तुमरेनचा आवनेसी घोळी-घोळी रुकाय रोयू.

²³ बाकीन हिमी इना देसोमा मारा कामोन कोरता एने जागां नि रोई, जादा साल सी मेसेक तुमरेनचा आवनेन मोर्जी छे.

²⁴ इनान कोरता मे जेतार स्पेन काजे जायीस ती तुमरेनचा आवीन जायीस, काहाकि मेसेक आस छे कि तिनी यात्रामा तुमरे पुठी भेट होयसे, एने जेतार तुमरी संगतीमा गोथू मारू जीव भराय जाय ती तुमु मेसेक ओगा पुगाळ देजू.

²⁵ बाकीन हिमी ते मे चुखला माणसोन सेवा कोरनेन कोरता यरुशलेममा जाणे बाज रोयू.

²⁶ काहाकि मकीदुनीया एने अखायान माणसो काजे यो वारू लागलो कि यरुशलेमोन पवित्र चुखला माणसोमा पोयशा नि होय ओसला वर्गणी टूवू कोरे.

²⁷ तीनु काजे वारू ते लाग्यो बाकीन चे दीसरा कोरजा वावान छे काहाकि ओगर दिसरा जातीन तिंदरी आत्मिक वातो पोर भागीदार होया ती तीनुक बी वारू छे कि शारीरिक वातोमा तिंदरी सेवा कोरे.

²⁸ इनान कोरता मे यो काम पुरो कोरीन एने तीनु काजे जी वर्गणी होवाले कोरीन जाता-जाता तुमरेनचा गोथू स्पेनमा जायीस.

²⁹ एने मेसेक मालूम छे कि जेतार मे तुमरेनचा आवीस, ती मसिहन पुरा आशिष सी आवीस.

³⁰ हे भाशो आमरू प्रभू येसु मसिह पवित्र आत्मान मोंगोन फोम देवाळीन मे तुमु काजे विनता कोरो कि मारेन कोरता परमेश्वरोनचा प्रार्थना कोरणेमा मारे साते मेवीन लागला रोयू.

³¹ कि मी यहुदियान अविस्वासीमा वाच रोये, एने मारी ची सेवा जी यरुशलेमोन कोरीन छे, चुखली माणसो काजे गोवे;.

³² एने मे परमेश्वरोन मोर्जीसी तुमरेनचा खुशीमा आवीन तुमरे साते आराम कोरे.

³³ शांतीन परमेश्वर तुमरे आखान साते रोये. आमेन.