रोमी 14 - बारेली पावरी

आजादिन नियम

¹ जू भुरसामा कोमजुर छे, तीनुक आपने साते कोरु, पुन तिंदरा शंकापोर जो विवाद कोरनेन कोरता नि.

² एक जोना काजे भुरसू छे कि आखो काहीन खाणो वारलो छे, बाकीन जू भुरसामा कोमजुर छे चू भाजी पालूत खातलू.

³ खाणे वावु नि खाणे वावाक विटोव नि सोमजे, एने नि खाणे वावु खाणे वावा पोर गुणू मा लागाळे; काहाकि परमेश्वर तीनाक स्वीकार कोरतेलु छे.

⁴ तू कून छे जू दिसरान सेवक पोर गुणू लागाळतलु? तेरो सुदो होयनो नि ते पोड जाणो तेरा मालिक साते रीसतो मेकतलु; बाकीन चू सुधू कोराय जासे, काहाकि प्रभू तीनाक पाकु कोर सोकतेलु.

⁵ काहनु माणूस ते एक दाहळा काजे दिसरासी बोढीन मानतलु, एने काहनु आखा दाहळा काजे एक सारखू मानतेलु होर एक जोना आपना मोनमा पाको कोर लेवू.

⁶ जू कुदू काहना दाहळा काजे मानतेलु, चू प्रभून कोरता मानतेलु जू खातलू, चू प्रभून कोरीन खातलू; काहाकि चू परमेश्वरोन धन्यवाद कोरतेलु,

⁷ काहाकि आपनेमा गोथू नि ते कुदू आपनेन कोरता जीवतलु एने नि कुदू आपनेन कोरीन मोरतेलू.

⁸ ओगर आपनु जीवतला छे, ती प्रभून कोरीन जीवता छे; एने ओगर मोरतेला, ती प्रभून कोरीन मोरतेला; आखरी आपनुक जीवाळे नीती मारे, आमु प्रभून छे.

⁹ काहाकि मसिह इनान कोरीन मोऱ्यु एने जीव बी उठ्यू कि चू मोरलान एने जीवतला बी प्रभू छे.

¹⁰ तू आपना भाशो पोर काहा गुणू लागाळयू? नीती तू ओवी काहा आपना भाशो काजे विटोव सोमजतलु? आपनु आखान आखा परमेश्वरोन नियावोन सिहासनोन सामने उबा रोयसू.

¹¹ काहाकि लिखलो छे, “प्रभू कोयतेलु, मारा जीवन कोसोम कि होर एक मांडा मारे ओगोव टेकसे, एने होर एक जीब परमेश्वरोन स्वीकार कोरसे.”

¹² इनान कोरता आमरे मायला होर एक जोणु परमेश्वर काजे आपना-आपना हिसाब आपसे.

¹³ आखरी ओगा आमु एक दिसरा पोर गुणू नि लागाळजे, पुन तुमु जो पाको मानतेला कि आपना भाशोन सामने दुख नीती ठूकर खाणेन वोजा होये.

मोंगोन नियम

¹⁴ मे जानतलु एने प्रभू येसुमा मेसेक खरो मालूम होयलो छे कि काहणी चीज खुदोसी विटोव नि होय, बाकीन जू तीनाक विटोव सोमोजतलु तिनान कोरीन विटवलो छे.

¹⁵ ओगर तारू भाश तारा खाणान वोजेसी नोराज छे, ती ओवी तू मोंगोन रितीसी नि चालतलु; जिनान कोरता मसिह मोरलू, तीनाक तू आपना खाणान लारे नाश मा कोरे.

¹⁶ आखरी तुमरेन कोरता यो वारू छे कि तेरी बुराई नि होयनो जुवे.

¹⁷ काहाकि परमेश्वरोन राज खाणा-पिनान नि होय, बाकीन धोरमी एने हिव मेवीन एने जो खुशीमा छे जू पवित्र आत्मासी रोयतलु.

¹⁸ जू कुदू इना रितीसी मसिहन सेवा कोरतेलु चू परमेश्वरोक गोवतेलु एने माणसोमा स्वीकारोन लायक ठेरायतलु छे.

¹⁹ इनान कोरता आमु इनी वातोन कोरता रोयजे जिनान कोरता हिव मेवीन एने एक दिसरान वारू होये.

²⁰ खाणान कोरता परमेश्वरोन काम मा बिघाळे आखो काहीन चुखलो ते छे, बाकीन तीना माणसोन कोरता बुरो छे जीना काजे तेरा खाणासी ठूकर लागतेली.

²¹ भोलोते यो छे कि तु नी मास खाय एने नि आंगुरोन रोस पिये, नि ओवी काहीन ओसो कोरे जीनासी तारू भाश ठूकर खाय.

²² तारू जू भुरसू होय तीनाक परमेश्वरोन सामने आपनात मोनोमा राख. सोयावा चे छे इनी वातोमा, जीनाक चू वारू सोमोजतलु, खुदो काजे गुणावू नि ठेरावतेलु.

²³ बाकीन जू शंका कोरीन खातलू चू दोंडोन लायक ठेरलू छे, काहाकि चू भुरसू नि कोरतेलू; एने जो काहीन भुरसासी नि होय चो पाप छे.