रोमी 13 - बारेली पावरी

सरकारोन हातो तवे रोयनो

¹ हर एक जोणु सरकारी अधिकारीन अधीन रोयू, काहाकि काहनु अधिकारी ओसू नी होय जू परमेश्वर भूनी गोथू नी होय; एने जे होक छे, चे परमेश्वरोन ठेरावलु छे.

² इनान कोरता जू कुदू होकोन खिलाप कोरतू होय, चू परमेश्वरोन नियमोन लोळाय कोरतेलू, एने लोळाय कोरणे वावाक दोंड जोळतलु.

³ काहाकि अधिकारी वारला कामोन नी होय, बाकीन भुंडला कामोन कोरता बिहनेन वोजा छे; आखरी ओगर तुमु अधिकारीक नि बिहीता रोयनेन कोरायतेला ती वारलो काम कोर, एने तेरा तोरोफसी तारी बोढाई होयसे,

⁴ काहाकि चू तारी वारलान कोरता परमेश्वरोन सेवक छे बाकीन ओगर तू बुरायी कोरे, ती बिह, काहाकि तलवार वायबार लेदलु नी होय; एने परमेश्वरोन सेवक छे कि तेरा रीसोन अनसारे भुंडा काम कोरणे वावाक दोंड आपसे.

⁵ इनान कोरता अधीन रोयनो नि निस्तु तिना रीसोन भिक सी जोरुरी छे, बाकीन ग्यान बी जी गोवायी आपतली छे.

⁶ इनान कोरीन फावू बी आपु काहाकि दोंड आपनेवावू परमेश्वरोन सेवक छे, एने हमेशा काममा रोयू.

⁷ इनान कोरता होर एक फावू आप्या कोरु; जीनुक फावू जुवे, तीनाक फावू आपु; जीनाक वसुली जुवे, तीनाक वसुली आपु; जीनाक बिहनो जुवे, तीनाक बिहू; जिंदरो मान सन्मान कोरनो जुवे, तिंदरो मान कोरु.

आपना साते वावासी मोंग करनो

⁸ आपोसमा मोंग काजे छुळीन ओवी कानली वातोमा कुदान कोरजदार मा रोयू; काहाकि जू दिसरा पोर मोंग कोरतेलू, चू नियम शास्त्र काजे पुरो पावलु छे.

⁹ काहाकि यो कि “व्यभिचार नी कोरनो, खुन नी कोरनो, चुरी नी कोरनो, लालच नी कोरनो,” इनू काजे छुळीन ओवी कानली बी आग्या होय ती आखान मतलब इनी वातोमा जोळतलो; “आपना साते वावा पोर खुदो सारखो मोंग कोरु.”

¹⁰ मोंग सातेवावान काहीन बुराई नी कोरतेला, इनान कोरता मोंग कोरनो नियम शास्त्र काजे पुरो कोरतेला छे.

येसुक काजे पेहेर लेनो

¹¹ टेमो काजे पारखीन ओसात कोरता रोयू कि तुमरेन कोरता निंदोमा गोथी जाग उठनेन घोळी आवीन पुग गोयली छे; काहाकि जिनी टेमे आपनो भुरसू कोरता होता, तिनी टेमोन विचारोसी हिमी आमरू छुटकारू साते छे.

¹² रात लोकेत होय गोयली छे, एने दाहळू निकवनेत वावू छे; इनान कोरता आपनु आंदारलान कामो काजे छुळीन विजावान हत्यार बांध लेवू.

¹³ जोसो दाहळा काजे शोभा आपतलु, तोसोच आपनु बी सुधा चाल चालनो, नी कि खाण्या पिण्या एने मोंदळ्या एने मोटकाईमा नी भुंडला विचारमा एने काम कोरनेन मोर्जीमा, एने नी झोगळामा एने नी रीस धोरणेमा.

¹⁴ बाकीन प्रभू येसु मसिह काजे पेहेर लेवू, एने डीलोन मोर्जी काजे पुरो कोरनेन इलाज मा कोरु.