रोमी 12 - बारेली पावरी

परमेश्वर काजे जीवतलो बलिदान

¹ इनान कोरता हे भाशो एने बोहनिश्या, मे तुमु काजे परमेश्वरोन दया फोम आपीन विनता कोरो कि आपना डीलो काजे जीवतला, एने चुखला एने परमेश्वर काजे गोवणे वावा चीजे बलिदान कोरीन चोळावू यित तुमरी आत्मिक आराधना छे.

² इना संसारोन तोसा मा बोनु, बाकीन तुमरो मोन नोवला होयनेसी तुमरी चाल-चलन बी बोदेलतो जाय, जिनासी तुमु परमेश्वरोन वारली एने गोवणे वावो, एने पाकी मोर्जी अनुभव सी मालूम कोरता रोयू.

आत्मिक वरदानोसी परमेश्वरोन सेवा

³ काहाकि तिना दयान वजेसी मेसेक जोळलो छे, तुमरे माईन होर एक जोना काजे कोयो कि जोसो सोमजनो जुवे तिनासी बोढीन कुदू बी खुदो काजे नि सोमजनो जुवे; बाकीन जोसू परमेश्वर होर एक भुरसान परिणामन अनसारे वाट देदलु छे, तोसुत वारला दिमाक साते आपनु काजे सोमजू.

⁴ काहाकि जोसो आमरा एक डीलोन लोकेत हिस्सू छे, एने आखा हिस्सान एक सारखो काम नी होय.

⁵ तोसोत आपनु जे लोकेत जोना छे, मसिहमा एक डील बोनीन आपोसमा एक दिसरा वाटू छे.

⁶ जेतार कि तिना दयान अनसारे जो आमुक आपायलो छे, आपनुक ओलोग-ओलोग वरदान जोळलो छे, ती जीनुक भविष्यवाणीन दान जोळलो होसे, चो भुरसान परीनामोन अनसारे भविष्यवाणी कोरु;.

⁷ ओगर सेवा कोरनेन दान जोळलो होय ती सेवा कोरतू रोय; ओगर कुदू सिकाळने वावु होय ती सिकाळतु रोये;.

⁸ जू प्रचारोक होय चू प्रचार कोरतू रोये; दान आपने वावु मोनोसी आपे; जो ओगवाई कोरे, चू आनंदसी कोरे; जू दया कोरे, चू खुशीमा कोरे.

मसिही व्यहवार

⁹ मोंग चुखलो जुवे बुराई पोर सिगी कोर; वारलो कोरता रोयू,

¹⁰ भाशो-भाशोन मोंगसी एक दिसरा पोर दुस्ती कोरु आपोसमा मान सन्मान कोरणे एक दिसरा पुठी बोढता जावू.

¹¹ कोशिश कोरणेमा उजगाय मा कोरु; आत्मामा भोरायला रोयू; प्रभून सेवा कोरता रोयू.

¹² आसमा खुश रोयू; दुखोमा नी बिहीता उबरोयू, प्रार्थना हमेशा कोरता रोयू.

¹³ चुखला माणसो काजे जो काहीन जरुरत होसे, तीनामा तिंदरी मदत कोरु; भोलाई कोरणे हमेशा तीयार रोयू.

¹⁴ आपनुक वेला पाळणे वावाक आशिष आपु; श्राप झुन आपता.

¹⁵ खुशी कोरणे वावा साते खुशी कोरु, एने रोडने वावा साते रोडू.

¹⁶ आपसमा एक सारखो मोन मेकू; मोटमोटी वातो पोर मोन मा लागाळू बाकीन गोरीबोन साते; रोयू; आपनी नोजोरमा बुद्धिमान मा बोनु.

¹⁷ “बुराईन बोदले बुराई मा कोरु; जी वाते आखा माणसोन साते वारली छे तिंदरी चिंता कोऱ्या कोरु.

¹⁸ या तोक होय सोके, तुमुक होये तेत्यार आखा माणसो पुठी हिव मेवीन रोयू.”

¹⁹ हे मोंगावा बोदलु नी लेनो, बाकीन परमेश्वरोन रीसो काजे टेम आपु काहाकि लिखलो छे, “बोदलू लेनो मार काम छे, प्रभू कोये कि मे बोदलु आपीस.”

²⁰ बाकीन तारू दुष्मोन भूकलू होसे ती तीनाक खाणो खावाळ, ओगर तीसलु होसे ती तीनाक पाणी पाव, काहाकि ओसो कोरणेसी तू तिंदरे मुंडका पोर आगठान इंगावान ढीग लागाळीस.

²¹ बुराइसी मा हारू, बाकीन वारलासी बुराई काजे जीत लेवू.