रोमी 11 - बारेली पावरी

इस्राईल पोर परमेश्वरोन दया

¹ इनान कोरता मे कोयो कि काय परमेश्वर आपनी प्रजा काजे छुळ देदू? कांखुर माईन नीती! मे बी इस्राईली छे; अब्राहाम पोयदावारी एने बिन्यामीनोन पिढीमा गोथू छे.

² परमेश्वर आपनी इनी प्रजा काजे नी छुळ्यु, जीनुक चू पेहेलेन जान रोयू, काय तुमु नी जानतला कि पवित्र शास्त्र एलियान बारामा काय कोयतेला, कि इस्राईलोन खिलापमा परमेश्वर काजे विनता कोरतेलु?

³ हे प्रभू, चे तारा भविष्य कोरताण खुन कोरतेला, एने तारी वेदी काजे पाळ देतला छे; एने मे एखलुत वाच रोयू एने चे मारा जीवो काजे हेरने बाज रोया.

⁴ बाकीन परमेश्वर जुव गोथो काय जोवाब जोळ्यू? मे आपनेन कोरता सात होजार माणसो काजे मेक रोयू जे बाल ओगोव मांडा नी टेकायला होय.

⁵ वारला इनी रितीसी इनी टेमे बी, दयासी नेवाळला काहीन माणसे आखरी छे.

⁶ ओगर यो दयासी होयलो छे, ती ओवी कामोसी नी; नी ते गिन एने दया नी रोयी.

⁷ इनान कोरता बोदलु काय होयू? यो कि इस्राईल जिनान हेरमा होता चो तीनुक नी जोळ्यू; बाकीन नेवाळला काजे जोळ्यो एने बाकी माणसोजू काजे वातडा कोर देदा.

⁸ जोसो लिखलो छे परमेश्वर तीनुक आज तोक भारी निंदन आत्मा नाख रोयु एने ओसा डूवा आप्यू जे देखे नी एने ओसा कानटा आप्यू जे नी सोमवे.

⁹ एने दाऊद कोयतेला, “तिंदरो खाणो तिंदरेन कोरता जाव एने फांद एने काठलो एने दोंडोन वोजा बोन जासे.

¹⁰ तिंदरा डूवा पोर आंदारो छावाय जाय कि चे नी देखे एने तुमु कायम तिंदरा वासा काजे वाकाळलु राख.”

इस्राईलोन मना करनो

¹¹ आखरी मे कोयो कि काय चे इनान कोरता ठूकर खाईन हिट पोळ्या? कोबी नी, बाकीन तिंदरो पोळनेन वोजा दिसरा जातीक छुटकारू जोळे, कि इस्राईल काजे कुहराय आवे.

¹² इनान कोरता हिमी तिंदरो पोळनो जोगोन कोतरा धोन एने तिंदरो कोमी दिसरा जातीन कोरता मालमत्तान वोजा होयो, ती होयो तिंदरे जुव लोकेत होयनेसी काय काहीन नी होयो.

¹³ मे तुमु दिसरा जातीन माणसो काजे ये वाते कोयो कि जेतार कि मे दिसरा जातीन कोरता सेवक छे ती मे आपनी सेवान बोढाई कोरणे बाज रोयू.

¹⁴ काहाकि काहना रितीसी मे आपना परिवारोमा कुहराय पोयदा कोरीन तिंदरेमा काहना एकान छुटकारू कोरावो.

¹⁵ काहाकि जेतार तीनुक छुळ देणो जोगोन भेसकायनेन वजा होयो ती काय दिसरो स्वीकारलो मोरलामा गोथो जीव उठनेन बोराबोर होये?

¹⁶ जेतार भेटोन पेहेले पेडो चुखलो ठेऱ्यो, ती आखू कूसनलु पिठू बी पवित्र छे, एने जेतार मुवे पवित्र ठेहऱ्या ती डाव्या बी ओसात छे.

¹⁷ पुन ओगर काहना डाव्या काटनेमा आव्यो, एने तू जंगली जेतुन बोनीन तिंदरेमा छाटाय गोयो, एने जेतुनोन मुव थुलोक नोरमायीन भागीदार होय गोयलो छे.

¹⁸ ती डाव्या पोर घोमंड कोरनो; एने ओगर तू घोमंड कोरे ती जानीन रोय कि तू मुवो काजे नि बाकीन मुवे तुसेक सोमवावतली छे.

¹⁹ एने तू कोयीस, “डाव्या इनान कोरता काटाय गोया कि मे छाटाय जाम.”

²⁰ वारलो छे, चे ते अविस्वासीन वजेसी काटाय गोया, बाकीन तू भुरसू सी पाकु रोयतलु इनान कोरता अभिमानी मा होये, बाकीन बिक मान.

²¹ काहाकि जेतार परमेश्वर आपसात डाव्या काजे नि छुळ्यु ती तुसेक बी नि छुळे.

²² इनान कोरता परमेश्वरोन मोंग एने काठलो पण देख, जे पोड गोया तिंदरे पोर काठलो छे बाकीन तारे पोर मोंग, हिमी तू तिनामा पाकु रोय, नीती तुसेक बी काट नाखसे.

²³ चे बी ओगर अविस्वास मा नि रोये, ती छाटाय जासे; काहाकि परमेश्वर तीनुक ओवी छाट सोकतेलू.

²⁴ काहाकि हिमी तू इनू जेतुनमा गोथा जे स्वभावमा जंगली छे, काटाय गोया एने स्वभावोन खिलापमा वारला जेतुनमा छाटाय गोयू, ती ये जे स्वभाव डाव्या छे, आपनात जेतुनमा काहणी छाटाय जाय.

आखा इस्राइलोन छुटकारू

²⁵ हे भाशो, कांखुर माइन ओसो होये कि तुमु खुद काजे एक ग्यानी सोमजी लेये; इनान कोरता मेसेक नि लागतो कि तुमु इना भेदो सी ओनजानला रोये कि जेतार तोक दिसरा जाती पुरा रितीसी आवे नि तेत्यार तोक इस्राईलोन एक हिस्सू ओसुत काठलु रोयसे.

²⁶ एने इना रितीसी आखा इस्राईलोन छुटकारू जोळसे जोसो लिखलो छे, “छुळावने वावु सियोनमा गोथू आवसे, एने अभक्ती काजे याकुबोनचा गोथू नांबे कोरसे;

²⁷ एने दिसरा साते मारू युत वायदू होयसे, जेतार मे दिसरा पापोक छेटू कोर दिस.”

²⁸ वारली खोबरोन भाव सी ते तुमरेन कोरीन चे परमेश्वरोन दुष्मोन छे, बाकीन नेवाळलान बदलामा चे बाप दादान वजेसी मोंगावा छे.

²⁹ काहाकि परमेश्वरोन वरदान एने बुलावणो पाको छे.

³⁰ काहाकि जोसा तुमु पेहले परमेश्वरोन आग्या नि मान्या, बाकीन हिमी तिंदरा आग्या नि माननेसी तार पोर दया होयी;.

³¹ तोसोच चे बी हिमी आग्या नि मान्या, कि तुमरे पोर जी दया होय रोयी इनासी तिंदरे पोर बी दया होये.

³² काहाकि परमेश्वर आखा काजे आग्या तुडने सी बोंदी बोनावीन मेक रोया, काहाकि चू आखापोर दया कोरे.

परमेश्वरोन बोढाई

³³ आहा, परमेश्वरोन धोन एने ओकोल इनी ग्यान काय योत उंडा छे, तेरा विचार कोसा महान एने तेरी वाट कोसी अगम्य छे!.

³⁴ “प्रभून ग्यान काजे कून उवखलो? एने तेरु मंत्री कून होयू?”

³⁵ काय कून पेहलेन तीनाक काहीन आपलु छे जेरु बदलु तीनाक आपायसे?

³⁶ काहाकि तिनानचा गोथो, एने तिनान लारे, एने तिनान कोरता आखो काहीन छे तेरी महिमा कायम होयती रोयसे. आमेन.