प्रकाशित वाक्य 6 - बारेली पावरी

पेहलू छापू-धोव्वा घुल्ला पोर जाणो

¹ पोछु मे देख्यू कि गाडरो सात सिक्का माहीन एक काजे उगाळ्यु; एने तीनु चार जोनावरो माईन एकान गाजला सारखो बुल सोमव्यू, “आवू.”

² मे नोजोर नाख्यू, एने देख्यू, कि एक धोव्वु घुल्लू छे, एने तेरे पोर बोसलु धोंदली लीन; एने तीनाक एक मुकुट आपाय गोयू, एने चू जय कोरतेलू निकव्यू कि एने बी जय हासील कोरे.

दुसरु छापू-लोळाय

³ जेतार चू दुसरी छापू उगाळ्यु, ती मे दुसरा जोनावर काजे यो कोयतलो सोमव्यू, “आव.”

⁴ ओवतेन एक एने घुल्लू निकव्यू जू रातला रोंगोन होतु; तीना पोर बोसने वावाक यो होक आपाय गोयो कि कोवी पोर गोथू शांती चूट लेय, काहाकि माणसे एक दिसरान खुन कोरे; एने तीनाक एक मोटली तलवार आपाय गोयली.

तिसरू छापू-काव

⁵ जेतार चू तिसरू छापू उगाळ्यु, ती मे तिसरा जोनावर काजे यो कोयतलु सोमवायु, “आव” मे नोजोर नाख्यू, एने देखू, एक कावू घुल्लू छे, एने तिना पोर बोसने वावान हातोमा ताकळी छे;

⁶ एने मे तिना चार जोनावरोन इचमा गोथू एक बुल यो कोयतलु सोमव्यू, “दिनारोन तीन कांगनी भोर गोहू, एने दिनारोन तीन कांगनी जुवार, बाकीन तेल एने आंगुरोन रोसोन नुकसान झुन कोरता.”

चौथू छापू-मोरनो

⁷ जेतार चू चौथी छापू उगाळ्यु, ती मे चौथा जोनावरोन बुल यो कोयतलु सोमव्यू, “आव.”

⁸ मे नोजोर नाख्यू, एने देखू, एक पेव्वू घुल्लू छे; एने तेरे पोर बोसलान नाव मोरनो छे, एने अधोलोक तेरे पोछो-पोछो छे; एने तीनुक धोरतीन एक चौथाइ पोर यु होक आपाय गोयू कि तलवार, एने काव, एने मरी, एने धोरतीन बोयडा मायला जोनावरोन लारे माणसो काजे मार नाखे.

पाचवू छापू-शहीद

⁹ जेतार चू पाचवू छापू उगाळ्यु, ती मे वेदीन नेचू तिंदरा जोनावरे काजे देख्यू जो परमेश्वरोन वचनोन वोजेसी एने तिना गोवायी वोजेसी जे चे आपला होता माराय गोयलु होतु.

¹⁰ चे मोटला बुलोसी आयळीन कोया, “हे स्वामी, हे चुखला एने खोरला, तू कोत्यार तोक न्याय नी कोरे? एने धोरतीन रोयने वावासी आमरा लुयोन बोदलु कोत्यार तोक नि लेये?”

¹¹ तीनुमा गोथो होर एक जोना काजे धोव्वा छिंदरा आपाय गोया, एने तीनु काजे कोवाय गोयो कि एने थुलिक वार तोक आराम कोरु, जेतार तोक कि तुमरे साते वावा दासे एने भाशे ये आमरे सारखा माराय जाणे वावा छे तिंदरी बी गिनती पुरी नि होय.

साहावी चुपू-आतंक

¹² जेतार चू सहावू छापू उगाळ्यु, ती मे देख्यू कि एक मोटलो भूंकप होयो, एने सूर्यो कांबवान तोसु कावू होय गोयू, चांद लुयोन सारखू होय गोयो.

¹³ वादवा मायला तारा कोवी पोर पोड गोया जोसो मोटली आंजीसी हालीन गुलोरोन झाडोमा गोथो काचला फोव पोळतेला छे.

¹⁴ वादवो असो सोरकी गोयो जोसो चिट्ठी गुंडावनेसी सोरकी जातलो छे, एने होर एक बोयडा, एने टापू हिंदरा-हिंदरा जागामा गोथा टोव गोया.

¹⁵ तेत्यार धोरतीन राजा, एने प्रधान, एने सरदार, एने धोनवावा एने ताकत वावा माणसे, होर एक दास एने होर एक बोयडान खोळामा एने दोगळामा जायीन डूकाय गोया,

¹⁶ एने बोयडा एने दोगळासी कोयने बाज गोया, “आमरेपोर पोड जावू; एने आमुक हिंदरा मुयोसी यु सिहासन पोर बोस रोयू, एने गाडरान दोंडसी डूकाळ लेवू.

¹⁷ काहाकि हिंदरा दोंडोन भयानक दाहळू आव लागलु छे, हिमी कून उभरोय सोकतलो”?