प्रकाशित वाक्य 5 - बारेली पावरी

मुहरबंद किताब काजे कुन खूल सके?

¹ जू सिहासन पोर बोस रोयू होतु, मे हेरा जेवळ्या हातोमा एक किताब देख्यू जी माहिय एने बारथे लिखली होती, एने ची सात सिक्का लागाळीन बोंद कोराय गोयली होती.

² पोछु मे एक ताकत वावा सोरग दूतो काजे देख्यू जू उचला बुलोसी यु प्रचार कोरतू होतु, “इना किताबोन उगाळने एने तेरा छापा तुडनेन लायक कुन छे?”

³ बाकीन नी सोरगोमा, नी धोरती पोर, नी धोरतीन नेचो नी इना किताबो काजे उगाळनेन एने तीना पोर नोजोर नाखनेन लायक निकव्यू.

⁴ तेत्यार मे आयळी आयळीन रोडने बाज गोयू, काहाकि इना किताबोन उगाळने नि ती तीना पोर नोजोर नाखनेन लायक कुदु नी जोळ्यो.

⁵ इनापोरसी तिना पुढाऱ्या मायला एक मेसे काजे कोयू, “मा रोडे; देख, यहुदान जाती मायलु चू एक सिह जू दाऊदन खास छे, तिना किताबोन उगाळने एने तेरा सात छापा तुडनेन कोरता जीत गोयलु छे.”

⁶ तेत्यार मे तिना सिहासन एने चार जोनावरे एने तीनु पुढाऱ्यान इचमा, जोसो एक खुन कोरलु गाडरो उबरोयलु देख्यू. तेरा सात शिंगडा एने सात डूवा होता; जे परमेश्वरोन सात आत्मा छे जे आखी कोवी पोर मुकली रोया.

⁷ चू आवीन तेरे जेवळ्या हातोमा गोथू जू सिहासन पोर बोसलू होतु, ची किताब ली लेदू.

⁸ तेत्यार चू किताब ली लेदू, ती ते चार जोनावरे एने चोवीस पुढाऱ्या तिना गाडरा ओगोव पोड गोया, तीनामा गोथा होर एकोन हातमा फेपाऱ्या एने धुप, जो चुखला माणसोन प्रार्थना छे, एने भोरलो सोनान वाटका होता.

⁹ चे यो नोवलो गीत गावणे बाज गोया, “तू इना किताब काजे लेणे, एने तेरा छापा काजे उगाळनेन लायक छे; काहाकि तू जीव आपीन तारा लुयसी होर एक जाती एने भाषान एने माणसे एने जात्यामा गोथू परमेश्वरोन कोरता माणसो काजे मुले ली लेदलु छे,

¹⁰ एने तीनुक आमरा परमेश्वरोन कोरता एक राज एने पुजारू बोनाव्यू; एने चे कोवी पोर राज कोरतेला छे.”

सरोगदुतोन लारे गाडरान बोडाय

¹¹ जेतार मे देख्यू, ती तिना सिहासन एने चे जोनावरे एने तिना प्राचीनोन चारू धोळे एने जादा सोरगो दूतोन बुल सोमव्या, जेरी गिनती लाखो एने करोडो होती,

¹² एने चे उचला बुलोसी कोयता होता, “खुन कोराय गोयलु गाडरुत, ताकत एने धोन एने ग्यान एने ताकतवान एने मान एने गौरव एने धन्यवादन लायक छे.”

¹³ पोछु मे सोरगोमा एने कोवी पोर एने कोवीन नेचू एने दोरीयान आखा एखठा कोरला चीजो काजे, एने आखा काजे जे हेरेमा छे, यो कोयतलु सोमव्यू, “जो सिहासन पोर बोस रोयू तेरु एने गाडरान धन्यवाद एने मान एने गौरव एने राज कायम रोये.”

¹⁴ एने चारू जोनावरे आमेन कोया, एने पुढाऱ्या भीमा पोडीन नोमोन कोऱ्या.