प्रकाशित वाक्य 4 - बारेली पावरी

सोरगोमा चित्र देखायनो

¹ इनी वातोन ओवतेन जेतार मे नोजोर नाख्यू ती काय देख्यू कि सोरगोमा एक झोपलू उगेडलु छे, एने जीनाक मे पेहेला फेपाऱ्यान बुल सी आपने पुठी वात कोरतेलू सोमवलू होतु, चू कोये, “न्या उपोर आव लाग; एने मे चे वाते तुसेक देखाळीस, जेरो इनी वातोन ओवतेन पुरो होयनो जोरुरी छे.”

² बाकीन मे आत्मामा आव लाग्यू एने काय देखो कि एक सिहासन सोरगोमा मेक मेक्यू, एने तिना सिहासन पोर कुदू बोस रोयू.

³ जो हीनापोर बोस रोयू चो योशोब एने मनिक्य सारखो देखाय पोळलो छे, एने तिना सिहासनोन चारू धोळे सात रोंगोन तोसो एक वादवान सेराटू देखाय पोळलु छे.

⁴ तीना सिहासनोन चारू धोळे चोवीस सिहासन छे; एने तिना सिहासन पोर चोवीस जूनला धोव्वा डोगला पेहेरला बोस रोया, एने तिंदरा मुंडका पोर सोनान मुकुट छे.

सोरगोमा आराधना

⁵ तिना सिहासन मा गोथा विजव्या एने मोटलु ओवाज निकवतला छे एने सिहासनोन सामने आगठान सात दिवा धोप रोया, चे परमेश्वरोन सात आत्मा छे,

⁶ एने तिना सिहासनोन सामने माणू बिलोराण तोसो आरसा तोसो दोरीयु छे, सिहासनोन इचमा एने सिहासनोन चारू धोळे चार जोनावरे छे, तिंदरे ओगोव पोछोव डूवात डूवा छे.

⁷ पेहेलू जोनावर सिह सारखू छे, एने दिसरू जोनावर केवळा सारखू छे, एने तिसरो जोनावरोन मूय माणसो सारखो छे, एने चौथो जोनावर उळतला घुवळ सारखो छे.

⁸ चारू जोनावरोन छोव-छोव पाखळा छे, एने चारू धोळे एने माहिय डूवात डूवा छे; एने चे रात दाहळू बिना आराम कोरे यो कोयता रोयतला, “चुखलो, चुखला, चुखला प्रभू परमेश्वर, आखा गोथू ताकत वावू, जू होतु एने जू छे एने जु आवने वावू छे.”

⁹ जेतार चे जोनावरे तिंदरा जू सिहासन पोर बोस रोयला छे, एने जू कायम जीवतलु छे, गौरव एने मान एने धन्यवाद कोरसे;

¹⁰ तेत्यार चोवीस प्राचीन सिहासन पोर बोसने वावान ओगोव पोड जासे, एने चू जू कायम जीवतलु छे नोमोन कोरसे; एने चे आपना-आपना मुकुट सिहासनोन ओगोव यो कोयता जायीन मेक देसे,

¹¹ “हे आमरा प्रभू एने परमेश्वर, तुत गौरव एने मान एने ताकत लायक छे; काहाकि तूत आखा चीजे सोजाडयु एने चे तारीत मोर्जीसी सोजाडाय गोया”.