प्रकाशित वाक्य 3 - बारेली पावरी

सरदीस-मोरली मंडवी

¹ सर्दीसोन मंडव्यान दूतो काजे यो लिख, “जेरे जुव परमेश्वरोन सात आत्मा एने सात चांदण्या छे, चू यो कोये कि मे तारा कामो काजे जानतलु छे तू जीवतलु ते कोवायतलु छे, बाकीन मोरलु छे.”

² जागतू होय, एने तीनु चीजो काजे जे बाकी रोय गोयला छे एने जे नाश होयने पोर छे, तीनु काजे पाका कोर; काहाकि मे तारेन कोरता, तारा कानला कामो काजे मारा परमेश्वरोन साते पुरो नी देख्यू.

³ इनान कोरता फोम कोर कि तू कोसली शिक्षा हासील कोरलु छे एने सोमवलू होतु, एने तीनामा बोनीन रोय एने मोन फिराव कोदा माईन तू जागतू नी रोये ती मे चुटा सारखो आव लागीस, एने तू कोदि नी जान सोके कि मे कानले टेमे तारेनचा आव लागीस.

⁴ बाकीन होव, सर्दीसमा तारेनचा कहनास ओसा माणसे छे, चे तिंदरा-तिंदरा छिंदरा विटोव नी कोऱ्या, चे धोव्वा छिंदरा पेहेरीन मारे साते हिंडसे, काहा जे इनान लायक छे.

⁵ जे जय हासील कोरे तीनुक इना रितीन धोव्वा छिंदरा पेरावसे, एने मे तेरो नाव जीवनोन किताबमा गोथो कानला रितीसी नी निकावो; बाकीन हेरो नाव आपनु बास एने आपना सोरग दूतो सामने मान लीस.

⁶ जेरा कानटा होसे चू सोमवी लेये कि आत्मा मंडव्या काजे काय कोये.

फिलादिलफिया-भुरसान लायक मंडवी

⁷ फिलादिलफियान मंडव्यान दूतो काजे यो लिख, “जे चुखला एने खोरला छे, एने जे दाऊदन कुच्या राखतलु छे, जेरा उगळला काजे कुदु बोंद नी कोर सोके एने बोंद कोरला काजे कुदू उगाळी नी सोकतो चू यो कोये कि,

⁸ मे तारा कामो काजे जानतलु छे देख, मे तारे सामने एक झोपलू उगाळलु छे, जीनाक कुदू बोंद नी कोर सोकतलो; तार ताकत इतरोकुत छे, ते बी तू मारा वचन काजे पावलु छे एने मारा कामोक मोना नी कोऱ्यु.”

⁹ “देख, मे भुतडान तीनु स्वभाव वावानुक काजे तारा ताबामा कोर दिस जे यहुदि बोनीन बोसला छे, बाकीन होय नी तेत्यार झूट बुलतला छे-देख, मे ओसो कोरिस कि चे आवीन तारा पायो पोर पोळसे, एने यो जान लेसे कि मे तुमरे पोर मोंग कोरलु छे.

¹⁰ तू मारा डीलोन वचन काजे उभराख रोयू, इनान कोरता मी बी तुसेक पारखोन तिने टेमे वाचाडीन राखीस, जू धोरतीन रोयने वावान पारखनेन कोरता आखा जोगो पोर आवने वावु छे.

¹¹ मी तेत्यारुत आवने वावु छे; जो काय तारे जुव छे तीनाक रुकायीन मेक कि कुदू तारू मुकुट हापकी नि लेये”.

¹² “जो जय हासील कोरे हीनाक मे मारा परमेश्वरोन मंदीरमा एक खांबु बोनावीस, एने पोछु कोबी बारथे नी निकवे; एने मे मारा परमेश्वरोन नाव एने मारा परमेश्वरोन नोगोर मतलब नोवलो यरुशलेमोन नाव, जो मारा परमेश्वर जू गोथो सोरग गोथो उतरणे वावो छे एने मारो नोवलो नाव तिना पोर लिखीस.

¹³ जेरा कानटा होसे चू सोमवी लेये कि आत्मा मंडव्या काजे काय कोये.”

लौदीकिया-गुनगुनी मंडवी

¹⁴ लौदीकियान मंडव्यान दूतो काजे यो लिख, “जो आमेन एने भुरसान लायक एने खोरलो गोवा छे, एने परमेश्वरोन कोवीन खास वोजा छे, चू यो कोये कि

¹⁵ मे तारा कामो काजे जानतलु छे कि तू ते सेवू छे एने नी तातलु, भोलो होयतो कि तू सेवू नीती तातलु रोयतू.”

¹⁶ इनान कोरता कि तू कुकनु छे, एने नी सेवू छे एने नी तातलु, मे तुसेक मारा मुयोमा गोथू उखोवने पोर छे.

¹⁷ तू कोये कि मे मालदार छे एने धोनवान होय गोयलु छे, मेसेक कानला चीजोन कोमी नी होय; एने यो नी जानतू कि तू अभागा एने वीटवलु गोरीब एने आंदवू एने उगाळलु छे.

¹⁸ इनान कोरता मे तुसेक समती आपो कि आगठामा तातो कोरलो सोनो मारे जुव गोथू मुले ली ले कि तू धोनवान होय जाय, एने धोव्वा डोगला लीले कि तुसेक पेहेरीन तुसेक आपना उगाळलान लाज नी आवे, एने तारा डूवामा लागाळनेन कोरता सुरमू लीले कि तू देखणे बाज जाय.

¹⁹ मे जिना-जिना पोर मोंग कोरो, तीनु आखा काजे (दुख) एने (तकलिप) आपो कि, इनान कोरता वारला कामे होय एने मोन फिरावे.

²⁰ देख, मे झोपला पोर उब रोयीण ठूकने बाज रोयू, अगर कुदू मारो ओवाज सोमवीन झोपलू उगाळसे, तेत्यार मे तेरेनचा माही आवीन तेरे पुठी खाणो खाइस एने चू मारे पुठी.

²¹ जो जय हासील कोरे, मे तीनाक मारे पुठी मारा सिहासन पोर बोसाळीस, जोसू मे बी जय हासील कोरीन मारा बासो पुठी तेरा सिहासन पोर बोठ गोयू.

²² जेरा कानटा होसे चू सोमवी लेये कि आत्मा मंडव्या काजे काय कोये.