प्रकाशित वाक्य 22 - बारेली पावरी

जीवनोन पाणीन नदी

¹ एने चू मेसेक बिल्लौर सारखो झोलोगतलो, जीवनोन पाणीन नोदी देखाळ्यू, जो परमेश्वर एने गाडरान सिहासनसी निकवीन.

² तिनान गावोन सोळकोण इचमा वोयती होती. नोंदीन इने धोळे एने पोले धोळे जीवनोन झाड होतु; तेरेमा बारा भातीन फोव लागता होता, एने चो होर मोयनामा फोवतो होतो; एने तिना झाडोन पानटासी जाती-जातीन माणसे वारू होयता होता.

³ पोछु श्राप नी होये, एने परमेश्वरोन एने गाडरान सिहासन तिना गावमा रोयसे एने हेरा दास हेरी सेवा कोरसे.

⁴ चे तेरो मूय देखसे, एने हेरो नाव आपना निंडावा पोर लिखलो रोयसे.

⁵ पोछि रात नी होये, एने तिना दिवा एने दाहळान विजावान गोरोज नी रोये, काहाकि प्रभू परमेश्वर हिनुक विजावो आपसे, एने चे कायम राज कोरसे.

येसु मसिहन पोछो आवनो

⁶ पोछु चू मेसे काजे कोयू, “जे वाते भुरसान लायक एने खोरला छे प्रभू, जो भविष्य कोरतान आत्मान परमेश्वर छे, आपना सोरग दूतो काजे इनान कोरता मूकल्या कि आपना दासो काजे चे वाते, जिंदरो तेतारुत होयनो छाचलीन छे, देखाळ.”

⁷ “देख, मे मामार आवने वावू छे, सोयावा चे छे, जे इना किताबोन भविष्यवाणीन वाते मानतलु छे.”

⁸ मे चू योहान छे, जू जे वाते सोमवतलु एने देखतू होतु जेतार मे सोमव्यू एने देख्यू, ती जू सोरग दूत मेसेक जे वाते देखाळतू होतु, मे तेरा पायो पोर नोमोन कोरनेन कोरता पोळ गोयू.

⁹ बाकीन चू मेसे काजे कोयू, “देख, ओसू मा कोरे; काहाकि मे तारा, एने तारा भाशोन भविष्य कोरता, एने इना किताबोन वातोन मानने वावान साते दास छे परमेश्वर काजे नोमोन कोर.”

¹⁰ पोछु चू मेसे काजे कोयू, “इना किताबोन भविष्यवाणीन वातो काजे बोंद मा कोरे; काहाकि टेम साते छे.

¹¹ जू अन्याय कोरतेलू छे, चू अन्यायुत कोरतू रोये; एने जू भुंडलु छे, चू भुंडलुत बोनीन रोये; एने जू धोरमी छे, चू धोरमी बोनीन रोये; एने जू पवित्र छे; च चुखला बोनीन रोये.”

येसु मसिही मंडवीन कोरता गोवाह

¹² “देख, मे तेतारुत आवने वावू छे; एने होर एकोन कामोन अनसारे बोदलु आपनेन कोरता प्रतीफोव मारजुव छे.

¹³ मे अल्फा एने ओमेगा, पेहेलु एने आखरी छे.”

¹⁴ “सोयावा चे छे, जे आपना छिंदरा धुवलेतला छे, काहाकि तीनुक जीवनोन झाडोनचा आवनेन होक जोळसे, एने फाटकोण गोथा आवीन गावमा भोरायसे.”

¹⁵ बाकीन कुत्रा, एने कुहरायने वावा एने व्यभिचार कोरणे वावा एने खुन कोरणे वावा एने मूर्ती पुजा कोरणे वावा एने होर एक झुटोसी मोंग कोरणे वावा एने गाळने वावू बारथे रोयसे.

¹⁶ “मेसेक येसु तेरा सोरग दूतो काजे इनान कोरता मूकल्यु कि तुमरे ओगोव मंडव्यान बारामा इनी वातोन गोवायी आपे मे दाऊदन मुव एने पिढी, एने सोंदारेन चोमोकने वावी चांदणी छे.”

¹⁷ आत्मा एने लाडी दुयो कोयतेली छे, “आव” एने सोमवने वावू बी कोये, “आव” जू तीसलु छे चू आवे, एने जीनाक कुदा काजे जुवे चू जीवनोन पाणी सेंतमेंत ले.

चेतावनी

¹⁸ मे होर एक काजे, जो हीना किताबोन भविष्यवाणीन वाते सोमवाळतलो छे, गोवायी आपो, कोदि काहनुस माणूस इनी वातोमा काहीन वाते बोढावे ती परमेश्वर तिना पिळा काजे, जी इना किताबमा लिखली छे, तीना पोर बोढावसे.

¹⁹ कोदि कुदू इना भविष्यवाणी किताबोन वाते मा गोथू काहीन निकाव नाखे, ती परमेश्वर तिना जीवनोन झाड एने चुखला गावोमा गोथू, जेरो वर्णन इना किताबमा छे तेरु वाटू निकाव देसे.

²⁰ जू इना वातोन गोवायी आपतलु छे चू यो कोये, “होव, मे मामार आवने वावू छे.” आमेन. हे प्रभू येसु आव.

²¹ प्रभू येसुन दया पवित्र माणसोन साते रोये. आमेन.