प्रकाशित वाक्य 2 - बारेली पावरी

इफिसुस मोंगहीन मंडव्या

¹ इफिसोन मंडवीन दूतो काजे यो लिख, जे सात चांदण्या हेरा जेवळ्या हातोमा छे, एने सोनान सात दिवान इचमा फिरतलु छे, चू जो कोये कि.

² मे तारो काम, एने तारी मेहनत, एने तारा धीरो काजे जानतलु छे एने जो भी कि तू भुंडला माणसो काजे देख नी सोकतलु, एने जे आपना खुदो काजे प्रेषितोन कोयतेला छे, एने नी होय, तीनुक तू पारखीन झुटू देख्यू.

³ तू धीर धोरतलु छे, एने मारा नावोन कोरता दुख झेली झेलीन नि थाक्यू.

⁴ बाकीन मेसेक तारा खिलापमा यो कोयनो छे कि तू तारे पेहेले सारखो मोंग छुळ देदलु छे.

⁵ इनान कोरता फोम कोर कि तू कां गोथू पोळलु छे, एने मोन फिराव एने पेहेले सारखु काम कोर कोदि तू मोन नी फिरावे, ती मे तारेनचा आवीन तारा दिवटानु काजे तिंदरे जागे गोथू छेटू कोर दिस.

⁶ बाकीन होव, मारेमा जी वाते छे कि तू निकोलीयनोन कामो पोर सिगी कोरतेलू छे, तिंदरे पोर मे बी सिगी कोरतेलू छे.

⁷ जेरा कानटा होसे चू सोमवी लेये कि आत्मा मंडव्या काजे काय कोये, जो जय हासील कोरे, मे तीनु काजे तिना जीवनोन झाडोमा गोथू जो परमेश्वरोन सोरगो लोकमा छे, फोव खाणेन कोरीन आपीस.

स्मुर्ना-वेला पाळली मंडवी

⁸ स्मुरना मंडव्यान दूतो काजे यो लिख, “जो पेहेलू एने आखरी छे, जो मोर गोयलु होतु एने हिमी जीवतू होय गोयलो छे, चू यो कोये कि,

⁹ ‘मे तारा दुख एने गोरीबी काजे जानतलु छे (बाकीन तू धोन वावू छे,) एने जे माणसे आपना खुदो काजे यहुदि कोयतेला छे एने होय नी, बाकीन भुतडान मीटिंग छे, तिंदरे बुराई काजे बी जानतलु छे.’”

¹⁰ जे दुख तुसेक झेलणो पोळसे, तीनु काजे मा बिहे काहाकि देखू, भुतडू तुमरेमा गोथू काहनास काजे जेल खाणामा घालणेमा छे, काहाकि तुमु पारखाय जावू एने तुमु काजे दोस दाहळा तोक दुख झेलणो पोळसे जीव आपता तोक विश्वासी रोयजी, ती मे तुसेक जीवनोन मुकुट आपीस.

¹¹ जेरा कानटा होसे चू सोमवी लेये कि आत्मा मंडव्या काजे काय कोये, जो जय हासील कोरे, तीनु काजे दुसरी मोरोनसी नुकसान नी होये.

पीरगमून-समजोता कोरली मंडवी

¹² “पीरगमून मंडव्या दूतो काजे यो लिख जेरे जुव दुयधारी एने तेज तोलवार छे, चू यो कोये कि.

¹³ मे जो जानतलु छे कि तू चा रोयतलु छे, जा भुतडान सिहासन छे; तू मारा नावो पोर चात रोयतलु छे, एने मार पोर भुरसू कोरणेसी तीनु दुयूमा बी पोछु नी होट्यु, जीनामा मारा भुरसान लायक गोवाह अन्तिपास, तुमरे इचमा तिना जागा पोर खुन कोराय गोयू, जा भुतडू रोयतलु छे.”

¹⁴ बाकीन मेसेक तारा खिलापमा काहीन वाते कोयनो छे, काहाकि तारेनचा काहनास ओसा छे, जे बिलामोन शिक्षा काजे मानतला छे, जू बालाक काजे इस्राईलोन ओगोव ठूकरोन वोजा राखणे सिकाळयु, कि चे मोरला पोर चोळावला चीजे खाय एने व्यभिचार कोरे.

¹⁵ तोसोत तारेनचा काहनास ओसा छे, जे निकोलीयनोन शिक्षा काजे मानतला छे.

¹⁶ आखरी, मोन फिराव, नीती मे तारेनचा तेतारुत आवीन मारा मुयोन तोलवार सी तिंदरे पुठी लोळायीस.

¹⁷ जेरा कानटा होसे चू सोमवी लेये कि आत्मा मंडव्या काजे काय कोये. जो जय हासील कोरे, तीनु काजे मे डूकाळला मोनोमा गोथो आपीस, एने तीनाक एक धोव्वु दोगळू बी आपीस; एने तिना दोगळा पोर एक नाव लिखलो रोयसे, जीनाक एरू लेणे वावा सिवाय कुदू नी जाणे.

थुआतीरा-भ्रष्ट मंडवी

¹⁸ थुआतीरा मंडव्या दूतो काजे यो लिख, “परमेश्वरोन पुऱ्यु जेरा डूवा आगठान ज्वालान तोसो, एने जेरा पाय वारला पितोवोन तोसा छे, चू यो कोये कि,

¹⁹ मे तारा कामे, तारू मोंग एने भुरसू एने सेवा एने धीर, जानतलु छे, एने यो बी कि तारा पोछला कामे पेहेले गोथा बोढीन छे.”

²⁰ बाकीन मेसेक तारा खिलापमा यो कोयनो छे कि तू ची बायर इजबेल काजे रोयने देतलु छे ची आपना खुदो काजे भविष्य कोरणे वावी कोयतेली छे, एने मारा दासो काजे व्यभिचार कोरणे एने मुर्त्यान ओगोव चोळावला चीजे खाणेन सिकाळीन फोसाळतली छे.

²¹ मे हिनी काजे मोन फिरावनेन कोरीन टेम आप्यू, बाकीन ची तेरा व्यभिचारसी मोन फिरावने नी कोरे.

²² देख, मे हिनी काजे पिढ्यापोर घालो; एने जे हेरे पुठी व्यभिचार कोरतेला छे कोदि चे भी हीनासी मोन नि फिरावे ती मे हीनु काजे मोटला दुखोमा नाखीस.

²³ मे हेरा पुऱ्या काजे मार नाखीस; तेत्यार आखा मंडव्या जान लेसे कि मोन एने मोन पारखने वावू मेत छे, एने मे तुमु होर एक काजे तेरे कामोन अनसारे बोदलु आपीस.

²⁴ बाकीन तुमु थुआतीरा रोयला माणसो काजे, जोतरा इना शिक्षा काजे नी मानतला एने ती नी वात काजे जीनुक भुतडान उंडली वाते कोयतेला छे नी जानतला, यो कोय कि मे तुमरे पोर एने भार नी मेको.

²⁵ बाकीन होव, जो तुमरे जुव छे तीनाक मारे आवने तोक रुकीन मेकू.

²⁶ जे जय हासील कोरे एने मारा कामोन अनसारे आखरी तोक कोरता रोये, मे हिनुक जाती जातीन माणसो पोर होक आपीस,

²⁷ एने चे लुहळान राज दोंड लीन तिंदरे पोर राज कोरसे, जिना रितीसी कुमायळान धुवान टाहरा चुरचूर होय जातला छे. मे बी ओसलु होक मारा बासो जुव गोथू हासील कोरलु छे.

²⁸ एने मे हिनुक सोंदारेन चांदणी आपीस.

²⁹ जेरा कानटा होसे चू सोमवी लेये कि आत्मा मंडव्या काजे काय कोये.