प्रकाशित वाक्य 19 - बारेली पावरी

सोरगोमा परमेश्वरोन स्तुती

¹ हेरेन ओवतेन सोरगोमा माणू मोटली गोरदी काजे यो उचला बुलोसी कोयतेला सोमव्यू, “हालेलुया, छुटकारू एने महिमा एने ताकत आमरा परमेश्वरो जून छे.

² काहाकि हेरा फेसलू खोरलु एने ठीक छे. चू तिनी मोटली वेश्यान, जी आपना व्यभिचारसी कोवी काजे भ्रष्ट कोरती होती, नियाव कोऱ्यु एने तेरे जुव गोथू आपना दासोन लुयोन बोदलु लेदलु छे.”

³ ओवतेन दुसरी कावार चे कोया, “हालेलुया, तेरा धोपनेन धुवाळू कायम निकवतू रोयसे.”

⁴ तेत्यार चोवीस पुढाऱ्या एने चारू जोनावरे पोडीन परमेश्वर काजे नोमोन कोऱ्या, जो सिहासन पोर बोसलु होतु, एने कोयू, “आमेन, हालेलुया.”

⁵ तेत्यार सिहासन मा गोथो एक बुल निकव्यू, “हे आमरा परमेश्वरसी आखा बिहीने वावा दासो, काय नानला, काय मोटला; तुमु आखा तेरी स्तुती कोरु.”

⁶ पोछो मोटली गोरदीन तोसो एने जादा पाणी तोसो बुल, एने गाजला सारखो मोटलो बुल सोमव्यू, “हालेलुया, काहाकि आमरू प्रभू आमरू परमेश्वर आखा गोथू ताकत वावू राज कोरतेलू छे.

⁷ आवू, आमु खुशी एने मोंगोन होयू, एने तेरी महिमा कोरु, काहाकि गाडरान वियाव आव लागलु छे, एने तेरी लाडी आपना खुदो काजे तीयार कोर लेदली छे.

⁸ हिनी काजे चुखलो एने चमकदार महीन मलमल पेहेरनेन होक आपाय गोयो” काहाकि तिना महीन मलमलोन मतलब चुखला माणसोन धोरमोन कामे छे.

⁹ तेत्यार सोरग दूत मेसे काजे कोयू, “यो लिख, कि सोयावा चे छे, जो गाडरान वियावोन खाणो खाणे बुलावला गोयला छे” पोछु चू मेसे काजे कोयू, “यो वचन परमेश्वरोन खोरलो वचन छे.”

¹⁰ तेत्यार मे हिनाक नोमोन कोरणेन कोरता तेरा पायो पोर पोड गोयू चू मेसे काजे कोयू, “देख, ओसू मा कोरे, मे तारो एने तारा भाशो साते वावू दास छे जू येसुन गोवायी देणेपोर पाकु छे परमेश्वर काजे नोमोन कोर; काहाकि येसुन गोवायी भविष्यवाणीन आत्मा छे.”

धोव्वा घुल्ला पोर सवार होयनो

¹¹ पोछु मे सोरगोन राज उगाडलु देख्यू, एने देख्यू कि एक धोव्वु घुल्लु छे; एने तिना पोर एने तेरे पोर बोस रोयलू छे, जू भुरसान लायक एने खोरलू कोवायतलु छे एने चू धोरमोन पुठी नियाव एने लोळायी कोरतेलू छे.

¹² तेरा डूवा आगठान ज्वाला छे, एने तेरा मुंडका पोर जाफात राजमुगुट छे बाकीन तिना पोर एक नाव लिखलो छे, जीनाक हिनाक छुळीन एने कुदू नी जानतलो.

¹³ चू लुय डूबाळला छिंदरा पेहेरलु छे एने तेरो नाव परमेश्वरोन वचन छे.

¹⁴ सोरगोन सेना धोव्वा घुल्ला पोर बोस रोयी एने धोव्वा एने चुखला मलमल पेहेरला तेरे पोछोव-पोछोव छे.

¹⁵ जाती-जाती काजे मारनेन कोरता तेरा मुयोमा गोथी एक धार वावी तोलवार निकवतली छे चू लुहळान राज दोंड लीन हिंदरे पोर राज कोरसे, एने आखा गोथो ताकतवान परमेश्वर भयानक रीसोन जलजलाहटन आंगुरोन रोसोन कुंडामा आंगुरोन रोस रोंदवसे.

¹⁶ तेरा छिंदरापोर एने तेरा जागा पोर यो नाव लिखलो छे, “राजान राजा एने प्रभून प्रभू.”

पशु एने तेरी सेनान हार होयनो

¹⁷ पोछु मे एक सोरग दूतो काजे सूर्या पोर उबरोयलु देख्यू चू मोटला बुलोसी आयळीन वादवान इचमा उळणे वावा आखा चिल्ला काजे कोयू, “आवू, परमेश्वरोन मोटला खाणोन कोरता एखठा होय जावू,

¹⁸ जीनासी तुमु राजान मास, सरदारोन मास, एने ताकत वावा माणसोन मास, एने घुल्लान एने तिंदरे पोर बोसलान मास, एने काय छुटकारू एने काय दास, काय नानला काय मोटला, आखा माणसोन मास खावू.”

¹⁹ तेत्यार मे तिना जोनावरे एने कोवीन राजान एने तेरी सेनान एने तिना घुल्ला पोर बोसने वावा एने तिंदरी सेनासी लोळायने वावा एखठा देख्यू.

²⁰ चो जोनावर, एने तेरे पुठी चू झुटू भविष्य कोरणे वावू धोराय गोयू जू हेरे सामने ओसलो निशाणी देखाळतू होतु जेरे लारे चू हिनुक भूलवाडयु जिना पोरसी तिना जोनावरोन छापू होतु एने जो हेरे मूर्तीन पूजा कोरता होता, जे दुयू जीवतला तिना आगठान झीलमा, जी गोंधकसी धोपतली छे, घालाय गोया.

²¹ रोयला माणसे तिना घुल्ला पोर बोसने वावान तोलवार सी, जी हेरा मुयोसी निकवती होती, माराय गोया; एने आखा चिल्ला तेरा माणसोसी आफराय गोया.