प्रकाशित वाक्य 18 - बारेली पावरी

बाबेलोन नाश

¹ हेरेन ओवतेन एक सोरग दूतो काजे सोरग गोथू उतरतेलु देख्यू, जीनाक मोटलु होक जोळलु होतु; एने कोवी तेरे विजावासी चोमकी उठी.

² चे मोटला बुलोसी आयळीन कोया, “पोळ गोयू, मोटलु बाबेल पोळ गोयलु छे, जो भुंडली आत्मान रोयनो, एने हर एक भुंडली आत्मान वस्ती, एने होर एक विटोवला एने भुंडला नी ते चिल्लान पांजरु होय गोयू.”

³ काहाकि हेरा व्यभिचारोन भयानक आंगुरोन रोस वोजेसी आखा जात्या पोळ गोयला छे, एने कोवीन राजा तिनी पुठी व्यभिचार कोरला छे, एने कोवीन व्यापारी तेरु सुख-विलासोन जादा होयनेसी धोनवान होयला छे.

⁴ पोछु मे सोरगे गोथू एक ओवी बुल सोमव्यू, “हे मारा माणसो, तीनामा गोथा निकवीन आवू कि तुमु तेरा पापोमा भागीदार नी होये, एने तेरी पिढामा गोथो काहनोस तूमरे पोर आव नी लागे.”

⁵ काहाकि हेरा पापोन ढीग सोरगे तोक पुग गोयलो छे, एने तेरो भुंडलो परमेश्वर काजे फोम आवलो छे.

⁶ जोसू चू तुमुक आपलु छे तोसोच हिना काजे आप, एने तेरा कामोन अनसारे हिनाक दुय गुणा बोदलाव देवू; जिना वाटकामा चू भोरीन आपलु होतु तीनामा हिनाक दुय गुणा भोर देवू.

⁷ जोतरी चू तेरी बोढाई कोऱ्यु कि एने सुख-विलास कोऱ्यु तोतरी हिनाक पिढा एने दुख आपु; काहाकि ची आपना मोनोमा कोये, “मे राणी होयली चे, बेटीस छे, रोंडायला नी होय; एने दुखोमा कोदि नी पोळो.”

⁸ इनान वोजेसी एकुत दाहळामा तिना पोर पिढा आव लागसे, मतलब मोरोन, एने दुख, एने काव; एने ची आगठामा नाश कोराय जासे, काहाकि हेरु नियाववावू प्रभू परमेश्वर ताकत वावू छे.

बाबेलोन कोरता दुख

⁹ “कोवीन राजा चे हेरे पुठी व्यभिचार एने सुख-विलास कोऱ्या, जेतार हिंदरो धोपनेन धुवाळू देखसु, ती हेरेन कोरता रोडसु एने छाती ठूकसु.

¹⁰ तेरा तोकलीतोन बिकोन मारे चे जादा नांबे उभरोहीन कोयसे, ‘हे मोटला नगर, बाबेलोन, हे पाक्का गाव, हाय, हाय, घोळी भोरमात तुसेक दोंड जोळ गोयलो छे’”

¹¹ “कोवीन व्यापारी हेरेन कोरता रोळसे एने कापसे काहाकि हिमी हिंदरु माल मोल मुले नि लेये,

¹² मतलब सोनो, चांदी, रत्न, मोती, एने मलमल, एने जामन्या, रेशमी, एने रातला रोंगोन कापळा, एने हर एक भातीन सुगोंद वावा लाकळा एने हात्तीण दातोन हर एक भातीन चीजे, एने मोहेंगला लाकळा एने पितोव एने लुहळान एने संगमोरमोरोन आखा भातीन चीजे,

¹³ एने दालचीनी, मोसाला, धुप, इत्तर, लोबान, आंगुरोन रोस, तेल, मोयदा, गोहू, गाय-बुले, गाडरा, बुकळा, घुल्ला, रोथ, दास, एने माणसोन जीव एने डील.

¹⁴ एने तारा मोनोक गोवे तोसो फोव तारेनचा गोथो जातो रोये, एने सोवादो एने भटकायला चीजे तारे गोथा नांबे होयला छे, एने चो पोछो कांखुर माईन नी जोळे.

¹⁵ इना चीजोन व्यापारी जे हेरे लारे धोनवान होय गोयला होता, तिंदरी तोकलीतोन बिकोन मारे नांबे उभा रोयसे, एने रोडता एने दुख कोरता जायीन कोयसे,

¹⁶ हाय, हाय, यु मोटलु गाव जो मलमल, एने जामन्या एने रातला रोंगोन छिंदरा पेहेरलु होतु, एने सोनो एने रोतनो एने मूर्तीसी सिंगार कोरलु होतु;

¹⁷ थुलिक वारोमा हेरो ओसलो भारी धोन नाश होय गोयो” हर एक नावाळी एने यात्री एने मासा मारन्या एने, जोतरा दोरयामा कोमायता होता, नांबे उबरोय रोया,

¹⁸ एने तेरु धोपनेन धुवाळू देखता जायीन आयळीन कोयसे, “काहनलो गाव इना मोटला गावोन तोसलो छे?”

¹⁹ एने आपना-आपना मुंडका पोर छोयळू नाखसे, एने रोडता जायीन एने कापता जायीन आयळी आयळीन कोयसे, “हाय, हाय, यो मोटलो गाव जेरो धोनोन लारे दोरीयान आखा जहाज वावा मालदार होय गोयला होता, घोळी भोरमा उजळी गोया.”

²⁰ “हे सोरग, एने चुखला माणसे, एने प्रेषितोन, एने भविष्य कोरता, तिना पोर खुशी कोरु, काहाकि परमेश्वर नियाव कोरीन तिनी जुव गोथू यु बोदलू लेदलु छे.”

बाबेलोन नाशोन आखरी टेम

²¹ पोछु एक ताकत वावू सोरग दूत मोटली घट्टीन पुळन तोसु एक दोगळू चूट्यु, एने यो कोयीन दोरीयामा नाख देदू, “मोटलो गाव बाबेलोन तोसोच मोटला ताकतसी पाळाय जासे, एने ओवतेन हेरो कोबी बी पोतू नि लागे.

²² वीना वाजाडणे वावा, एने गीत गावणे वावा, एने पावी वावां एने फेपाऱ्या फुकने वावान बुल पोछु कोबी सोमवाय नि पोळे; एने काहना उगमोन काहनुस कारागीर बी पोछु कोबी तुसे काजे नि जोळे; एने घट्टीन चालनेन आवाज कोबी तारेमा सोमवाय नी पोळे;

²³ एने दिवान विजावो पोछो कोबी तारेमा नि चोमके, एने लाडू लाडीन बुल पोछु कोबी तारेमा सोमवाये नि; काहाकि तारा व्यापारी कोवीन प्रधान होता, एने तारा कुहराय सी आखा जात्या भुलवाय गोयला होता.

²⁴ भविष्य कोरता एने चुखला माणसे, एने धोरती पोर आखा खुन कोरलान लुय तीनुमा देखाय पोळ्यो.”