प्रकाशित वाक्य 17 - बारेली पावरी

बायोर एने रतला रोंगोन पशु

¹ जिना सात सोरग दूतोनचा चे सात वाटका होता, तीनामा गोथू एक आवीन मेसे काजे यो कोयू, “उरू आव, मे तुसेक हिनी मोटली वेश्यान दोंड देखाळो, जी जादात पाणी पोर बोसरोयली छे.

² जेरे पुठी कोवीन राजा व्यभिचार कोऱ्या, एने कोवीम रोयने वावा तेरा व्यभिचारोन मोंदसी छाक गोयला होता.”

³ तेत्यार चू मेसेक आत्मामा बोयळामा लीन गोयू, एने मे रातला रोंगोन जोनावर पोर, जो बुराईन नावोसी भोरायलु होतु एने तेरा सात मुंडका एने सात सिंगडा होता, एक बायर काजे बोसली देख्यू.

⁴ जी बायर जामन्या एने रातला रोंगोन छिंदरा पेहेरली होती, एने सोनो एने मोहेंगला किड्या एने मोतीसी सिंगारली होती, एने तेरा हातोमा एक सोनान वाटको होतो जो भुंडला चीजोसी एने तेरा व्यभिचारसी एने विटेवला चीजोसी भोरलु होतो.

⁵ तेरा माथा पोर यो नाव लिखलो होतो, “भेद-मोटला बाबेलोन कोवीन वेश्यान एने भुंडला चीजोन आया.”

⁶ मे तिनी बायर काजे चुखला माणसोन लुय एने येसुन गोवान लुय पिणेसी छाकली देख्या; तिनीक देखीन मे नोवलाय गोयू.

बायोर एने जानवर मतलब

⁷ तेत्यार चू सोरग दूत मेसे काजे कोयू, “तू काहा वाहाराय रोयु? मे तिनी बायर एने तिनी जोनावरोन, जीना पोर ची बोस रोय होती एने जेरा सात मुंडका एने दोस सिंगडा छे तुसेक भेद देखाळो.

⁸ जो जोनावर तू देखलू छे चू पेहेले ते होतु बाकीन हिमी नी होय, एने उंडा खाडामा गोथू निकवीन विनाशमा पोळसे; एने कोवीम रोयने वावा जिंदरो नाव जोगोन घोडनेन टेमे जीवनोन किताबमा लिखाय नी गोयो, तिना जोनावरोन जी दशा देखीन कि पेहेले होतु एने हिमी नी होय एने पोछु आव लागसे, नोवलाय कोरसे.”

⁹ जिना दिमाकोन कोरता जीनामा ग्यान छे, जीत टेम छे, चे सात मुंडका सात बोयडा छे जीना पोर ची बायोर बोस रोयी.

¹⁰ चे सात राजा बी छे, पाच ते होय गोयला छे, एने एक हिमी छे, एने एक हिमी तोक आव्यु नी, एने जेतार आवसे ती काहीन टेमे तोक हेरो रोयनो जोरुरी छे.

¹¹ जो जोनावर पेहेले होतो, एने हिमी नी होय, चू खुद आठवो छे एने तीनु सातोमा गोथू पोयदा होयू, एने नाशमा पोळसे.

¹² जे दोस सिंगडा तू देख्यू चे दोस राजा छे बाकीन हिनुक हिमी तोक राज नी जोळ्यो, बाकीन तीना जोनावरोन पुठी घोळीभोरोन कोरता राजान तोसो होक जोळसे.

¹³ जे आखा एक मोन होयसे, एने चे आपनी-आपनी ताकत एने होक तिना जोनावर काजे आपसे.

गाडरान कोरता विजय

¹⁴ चे गाडरा पुठी लोळायसे, एने गाडरो तिंदरे पुठी जय हासील कोरसे, काहाकि चू प्रभून प्रभू एने राजान राजा छे, एने जे बुलावला एने नेवाळला एने विस्वासी छे, चे तेरे पुठी छे; चे बी जय हासील कोरसे.

¹⁵ पोछु चू मेसे काजे कोयू, “जो पाणी तू देख्यू, जीना पोर वेश्या बोस रोयी, चे ते माणसे एने गोरदी एने जात्या एने भाषा छे.”

¹⁶ “जे दोस सिंगडा तू देख्यू, चे एने जोनावर तिनी वेश्यापुठी दुष्मोनी राखसे, एने तिनीक लाचार एने उगाळली कोर देसे, एने तेरो मास खाय जासे, एने तिना आगठामा धोपाळ देसे.

¹⁷ काहाकि परमेश्वर तिंदरा मोनोमा यो घालसे कि चे तेरी मोर्जी पुरी कोरे, एने जेतार तोक परमेश्वरोन वचन पुरो नी होये, तेत्यार तोक एक मोन होयीन आपनो राज जोनावर काजे आप दे,

¹⁸ ची बायर, जीनीक तू देखलू छे, ची मोटलु नोगोर छे जे कोवीन राजापोर राज कोरतेली छे.”