प्रकाशित वाक्य 14 - बारेली पावरी

मेम्नो एने 1,44000 माणसे

¹ ती मे नोजोर नाख्यू, एने देखू, चू गाडरु सियोन बोयळा पोर उबरोय रोयू, एने तेरे पुठी एक लाख चौरेचाळीस हजार जोन से जेरे निंडावा पोर तेरो एने तेरा बासोन नाव लिखलो होतो.

² एने सोरगसी मेसेक एक ओसू बुल सोमवाय गोयू जू पाणी घोणा सोवटा गारान एने मोटला गाजने सारखू बुल होतु, एने जू बुल होतु, एने जू बुल मे सोमव्यू चू ओसू होतु माणू विना वाजाडने वावू विना वाजाड रोया.

³ चे सिहासनोन सामने एने चारू जोनावरे एने पुढाऱ्यान ओगोव एक नोवलो गीत गाव रोया होता, चे एक लाख चौरेचाळीस हजार जना काजे कोवीमा गोथू मुले लेवाय गोयलु होतु, कुदू चो गीत नी सिक सोकतू होतो.

⁴ चे ये छे जे बायरा पुठी विटोव होया, बाकीन कुवारु छे; जे चेत छे कि जा का गाडरो जातलो छे, चे तिनान पोछोव चाल पोळतेला; जे ते परमेश्वरोन कोरता पेहेला फोव होयनेन कोरता माणसोमा गोथो मुले लेवाय गोयला छे.

⁵ तिंदरा मुयोसी कोदि झूट नी निकव होतो, चे निरदोष छे.

तीन सोरगोदुतोन घोषणा

⁶ पोछु मे एक एने सोरग दूतो काजे वादवान इचमा उळतलो देख्यू, जेरे जुव कोवी पोर रोयने वावान होर एक जाती, एने पिढी एने भाषा, एने माणसो काजे सोमवाळनेन कोरता ओमोरकाईन वारली खोबर होतु.

⁷ चू मोटला बुलोसी कोयू, “परमेश्वर सी बिहू, एने तेरी महिमा कोरु, काहाकि तेरु नाश कोरणेन टेम आव लागली छे; एने तेरु भजन कोरु, जू सोरग एने धोरती एने दोरीयान एने पाणीन झोरे बोनाव्यू.”

⁸ एने एरेन ओवतेन एक एने, दिसरू, सोरग दूत यो कोयतू जायीन आव्यु, “पोळ गोयू, चू मोटलु बाबेलोन पोळ गोयू, जू आपना भुंडला विचार कोऱ्यु रीसोन आंगुरोन रोस आखी जात्या काजे पिवाळली छे.”

⁹ पोछो इंदरे ओवते एक एने, दिसरू सोरग दूत मोटला बुलोसी यो कोयतू जायीन आव्यु, “जो कुदू तिना चिल्लान एने तेरी मूर्तीन पूजा कोरे, एने आपना माथा नीती आपने हातो पोर तिनान छापू लेये.

¹⁰ चू परमेश्वरोन रीसोन आंगुरोन रोस, जो तेरा वाटकामा घालाय गोयलो छे, पिसे एने चुखला सोरग दूतोन सामने एने गाडरान सामने आगठो एने गंधकोण वेलामा पोळसे.”

¹¹ “तिंदरा तोकलीतोन धुवाळू कायम उळतू रोयसे, एने जू तिना चिल्लान एने मूर्तीन पूजा कोरतेला, एने जे हेरा नावोन छाप लेतला छे, तीनुक रात दाहळे चेन नी जोळे.”

¹² चुखला माणसोन धीर इनाम छे, जो परमेश्वरोन आग्याणु काजे मानतला एने येसु पोर भुरसू कोरतेला छे.

¹³ पोछु मे सोरगोमा गोथू यो बुल सोमव्यू, “लिख, जे मोरला प्रभूमा मोरतला छे चे हिमी गोथा सोयावा छे” आत्मा कोये, “होव, काहाकि चे आपना आखा मेहनतसी आराम कोरसे, तिंदरा कामे हिंदरे साते जात रोयतला छे.”

धरतीन धोन काजे काटनो

¹⁴ मे नोजोर नाख्यू एने देखू, एक विजावो वादवो छे, एने तिना वादवा पोर माणसोन पुऱ्या सारखो एने बोस रोयू, जेरा मुंडका पोर सोनान मुकुट एने हातोमा धार वावू दातवु छे.

¹⁵ एने एक एने सोरग दूत मंदीरमा गोठू निकवीन, जू वादवा पोर बोसलु होतु, मोटला बुलोसी आयळीन कोयू, “आपनु दातवू लागाळीन वेरनी कोर, काहाकि वेरनीन टेम आव लागली छे, इनान कोरता कि धोरतीन खेतोमा पाक गोयलो छे.”

¹⁶ आखरी, जू वादवा पोर बोसलु होतु चू कोवी पोर आपनु दातवू लागाळयू, एने कोवीन वेरनी कोराय गोयी.

¹⁷ पोछु एने एक सोरग दूत तिना मंदीरमा गोथू निकव्यू जू सोरगोमा छे, एने तेरे जुव बी धार वावू दातवू होतु.

¹⁸ एने एक एने सोरग दूत जीनाक आगठापोर होक होतु, वेदीमा गोथू निकव्यू, एने जेरे जुव धार-धार दातवू होतु तिना पुठी उचला बुलोसी कोयू, “आपना धारदार दातवू लागाळीन कोवीन आंगुरोन वेलान गुछा काट लेवू काहाकि तिंदरा आंगुरोन वेला पाक गोयला छे.”

¹⁹ तेत्यार चू सोरग दूत कोवी पोर आपनु दातवू लागाळयू एने कोवीन आंगुरोन वेलान फोव काटीन आपना परमेश्वरोन रीसोन मोटला कुंडामा घालाय गोयो.

²⁰ एने सोहोरोन बारथे तिना रोसोन कुंडामा आंगुर रोंदवाय गोया, एने रोसोन कुंडामा गोथो ओतरो लुय निकव्यो कि घुल्लान लगाम तोक पुग्यो, एने एकसोव कूस तोक वाये गोयो.