प्रकाशित वाक्य 13 - बारेली पावरी

दोरीयामा गोथा दुय पशु

¹ तेत्यार मे एक चिल्ला काजे दोरीयामा गोथो निकवतेलु देख्यू, जेरा दोस सिंगळा एने सात मुंडका होता तेरा सिंगडापोर दोस राजमुगुट, एने तेरा मुंडका पोर परमेश्वरोन बुराईन नावोसी लिखलो होतो.

² जो चिल्ला मे देख्यू चो चिता सारखो होतो एने तेरु पाय रिछडान सारखो एने मूय वाघो सारखो होतो चू अजगर तेरा ताकत एने तेरा सिहासन एने मोटो होक तीनाक आप्या.

³ मे तेरा मुंडकामा गोथू एक पोर ओसू मोटू घाव लागलु देख्यू जोसू चो मारेन पोर छे, एने तेरो जीव लेनेन घाव वारू होय गोयो, आखी कोवीन माणसे तिना चिल्लान पोछोव वाहरायीन चाल पोळ्या.

⁴ माणसे अजगरोन पूजा कोऱ्या, काहाकि चे चिल्ला काजे आपनु होक आप देदलु होतु, एने यो कोयीन चिल्लान पूजा कोऱ्या, “इना चिल्लान सारखो कून छे? कून इना पुठी लोळाय सोकतलु?”

⁵ मोटला बुले बुलने एने बुराई कोरनेन कोरता तीनाक एक मूय आपाय गोयो, एने तीनाक बेचाळीस मोहना तोक काम कोरनेन होक आपाय गोयो.

⁶ तिंदरे जुव गोथो परमेश्वरोन बुराई कोरनेन कोरता मूय उगाळ्यु कि तिंदरे नावे एने तेरे तंबू मतलब सोरगमा रोयने वावान बुराई कोरे.

⁷ तीनाक यु बी होक आपाय गोयू कि चुखला माणसोसी लोळाये एने तिंदरे पोर जय हासील कोरे, एने तीनाक होर एक जातीन एने माणसे एने भाषा एने जाती पोर होक आपाय गोयो.

⁸ कोवीन चे आखा रोयने वावा, जिंदरे नावे तिना गाडरा काजे जीवनोन किताबमा लिखाय नी गोयो जू जोगोन पेहलेत टेमे घात होयलू छे, तिना चिल्लान पूजा कोरसे.

⁹ जेरा कानटा होसे चू सोमवे.

¹⁰ जीनाक बंदीमा पोळनो छे, चू बंदीमा पोळसे; जू तलवार सी मोरनो जुवे चू तलवार सी मोरसे. चुखला माणसोन धीरोज एने भुरसू इनामा छे.

धरतीमा गोथा निकोवला जोनावरे

¹¹ एने मे एक ओवी चिल्लो धोरतीमा गोथो निकेवतेलो देख्यू, तेरा गाडरा सारखो दुय सिंगडा होता, एने चू अजगर सारखू बुलतू होतु.

¹² चू तिना पेहला जोनावरोन आखू होक तेरे सामने कामोमा लावतू होतु; एने कोवी एने तेरेमा रोयने वावासी तिना पेहला चिल्लान, जेरु जीव लेने वावू वारू होय गोयलु होतु, पूजा कोरतू होतु.

¹³ चू मोटला-मोटला चिन्ह देखाळतू होतु, जा तोक कि माणसो सामने सोरगमा गोथू धोरती पोर बरसाव देतु होतु.

¹⁴ तिना निशाणीन वजेसी, जू तिना चिल्ला सामने देखाळनेन होक तीनाक आपाय गोयलु होतु, चू कोवीम रोयने वावा काजे भुलवाडतू होतु एने कोवीन रोयने वावासी कोयतु होतु कि जिना चिल्लान तलवार लागली होती चू जीव गोयलु छे, तेरी मूर्ती बोनाव्यू.

¹⁵ तीनाक तिना जोनावरोन मूर्तीमा जीव घालनेन होक आपाय गोयो कि चिल्लान मूर्ती बुलने बाज जाय, एने जोतरा माणसे तिना चिल्लान मूर्तीक पूजा नि कोरे, तीनाक छापू देवाळ देय.

¹⁶ चू नानला-मोटला, मातभोर-गरीब, आजादी-दास आखान जेवळ्यु हात नीती तिंदरा निंडावा पोर एक-एक छाप कोर देदा,

¹⁷ कि जीनाक जुळे तिना पोर छापू मतलब तिना चिल्लान नाव नीती तिंदरे नावोन आकळू होये, दिसरा कुदू लेन देन नि कोर सोके.

¹⁸ ग्यान इनामा छे, जिनान जुव दिमाक छे चू इना चिल्लान आकळाक जुळ लेये, कि चू माणसोन आकळू छे, एने तेरे आकळू छोव सोव सहासश्ष्ट छे.