प्रकाशित वाक्य 12 - बारेली पावरी

बायोर एने मोटलु

¹ ओवतेन सोरगोमा एक मोटलु चिन्ह देखाय पोळ्यो, मतलब एक बायोर जी सूर्यो पांघरली होती, एने चांद तेरे पायो तोवे होतु एने तेरा मुंडका पोर बारा चांदण्यान मुकुट होतु.

² ची भारपाये होई, एने आयळती होती, काहाकि पोखळायनेन पिळामा होती.

³ एक एने चिन्ह सोरगोमा देखाय पोळ्यु; एने देखू एक मोटलु रातलु अजगर होतु, जेरा सात मुंडका एने दस सिंगडा होता, एने तेरा मुंडका पोर सात राजमुगुट होता.

⁴ तेरो चो मूय वादवान तारा काजे एक तिहाई काजे हापकीन धोरती पोर घाल देदू, चू अजगर तीना बायरोन सामने यो च्या होती उबरोय गोयू कि जेतार ची पुऱ्या काजे जोने ती तिना पुऱ्या काजे गिव जाय.

⁵ ची पुऱ्याक जोनी जू लुहळान दोंड लीन आखा जाती पोर राज कोरणे पोर होतु, एने चो पुऱ्यो एक परमेश्वर जुव एने तेरा सिहासन पोर चूटीन पुगाळाय गोयो;

⁶ एने ची बायोर बोयळा भूनी ढास गोयी जा परमेश्वरोन भूनी गोथी तेरेन कोरता एक जागा तोयार कोराय गोयली होती कि चा एक हजार दुय सोव साठ दाहळा तोक पावाय जाय.

अजगर सोरगोम गोथो बारथे नाखाय गया

⁷ एने सोरगमा लोळाय होयी, मिकाईल एने तेरा सोरग दूत, अजगर पुठी लोळायने निकव्या; एने अजगर एने तेरा दुते तेरे पुठी लोळाया,

⁸ बाकीन जीत नी होयी एने सोरगमा तिंदरेन कोरता पोछि जागा नी रोयी.

⁹ तेत्यार चा मोटलु अजगर, मतलब, चू जुनलू घोळसु जू इबलीस एने भुतडू कोवायतलु छे एने आखो जोगोन भळकावने वावू छे, धोरती पोर पाळाय गोयू, एने तेरा दूत तेरे पुठी पाळ गोया.

¹⁰ एने मे सोरगमा गोथू यु मोटलु बुल आवतेलु सोमव्यू, “हिमी आमरू परमेश्वरोन छुटकारू एने ताकत एने राज एने तेरा मसिहन होक प्रगट होयलो छे, काहाकि आमरा भाशो पोर गुणू लागाळने वावू यु रात दाहळू आमरा परमेश्वर ओगोव तिंदरे पोर गुणू लागाळ्या कोरतू होतु, पाळाय गोयलु छे.”

¹¹ चे गाडरान लुयोन वोजेसी एने आपना गोवायीन वचनोन वोजेसी तिना पोर जयवंत होया, एने चे आपना जीवो काजे मोंगावू नी जाण्या, या तोक कि मोरोन बी सोहोनेन कोर लेदा.

¹² इनान वोजेसी हे सोरग एने तीनामा रोयने वावा, मगन छे; हे धोरती, एने दरियु, तुमरे पोर हाय, काहाकि भुतडू मोटला रीसो पुठी तुमरे जुव उतरीन आवलु छे, काहाकि जानतलु छे कि तेरु थुलिक टेम रोय-रोय.

वेला पाळली बायोर

¹³ जेतार अजगर देख्यू कि मे धोरती पोर नाखाय गोयलु छे ती तिनी बायर काजे जी पुऱ्या जोनली होती, विताड्यू.

¹⁴ बाकीन तिनी बायर काजे मोटला घुवळान दुय पाखळा आपाय गोया कि घोळसान ओगोव गोथू उळीन बोयळामा तिनी जागाम पुग जाय, जा चू एक टेम एने टेमोन, एने आदा टेम तोक पावाय जाय.

¹⁵ एने घोळसु तिनी बायरो पोछोव आपने मुये कोरीन नोदी सारखो पाणी वोयाळ्या कि हिनाक इना नोदी गोथो वोयाळ दे.

¹⁶ बाकीन धोरतीन तिनी बायरोन मदत कोऱ्या एने आपनो मूय उगाळीन तिनी नोदी काजे जू अजगरोन तेरा मुये उगाळलु होतु पी गोयू.

¹⁷ तेत्यार अजगर बायरो पोर रीसवाय गोयू एने तेरी बाकी पुऱ्या पुठी जू परमेश्वरोन आग्या काजे मानतला एने येसुन गोवायी आपनेपोर स्थिर रोये,

¹⁸ लोळायने कोरीन गोया, एने चू दोरीयान रेवतापोर जायीन उबु रोय गोयू.