प्रकाशित वाक्य 11 - बारेली पावरी

दुय गोवाह

¹ एने मेसेक मापने कोरीन एक माप आपाय गोयू, एने काहनुस कोयू, “उठ, परमेश्वरोन मंदीर एने वेदी, एने तीना मायला आराधना कोरणे वावा काजे माप ले.”

² बाकीन मंदीरोन बारथेलो आंगनो छुळ दे; तीनाक मा मापे काहाकि चो दिसरा जाती काजे आपाय गोयलो छे, एने चुखला गाव काजे बेचाळीस मोहना तोक रोंदवसे.

³ मे दुय गोवाणु काजे यु होक आपीस कि गोनटो पांघोरला एक हजार दुय सोव साठ दाहळा तोक भविष्यवाणी कोरे.

⁴ जे चेत जेतुनोन दुय झाडे एने दिवटा छे, जो कोवीन प्रभून ओगोव उबरोहतलु छे.

⁵ कोबी कुदु हिनाक दुख देणे हिंडे, ती तिंदरा मुयोमा गोथो आगठो निकवीन तिंदरा दुष्मोन काजे नाश कोर देतली छे; एने कुदु कोबी हिनुक नुकसान कोरणे हिंडे, ती छाचलीन इना रितीसी मार नाखसे.

⁶ तीनुक होक छे कि सोरग काजे बोंद कोरे, कि हिंदरी भविष्यवाणीन दाहळामा पाणी नी पोळे; एने तीनु काजे आखा पाणी पोर होक छे कि हिनाक लुय बोनावे, एने जेतार-जेतार जुवे तेत्यार-तेत्यार कोवी पोर होर एक भातीन पिढा लावे.

⁷ जेतार चे आपनी गोवायी आप सोके, ती चो जोनावर जिना उंडा खाडामा गोथू निकवसे तिंदरे पुठी लोळायीन तीनुक जीकसे एने हिनुक मार नाखसे.

⁸ तिंदरो धोळ तिना मोटला गावोन चौकमा पोळ रोयसे, यो आत्मिक रुपोसी सदोम एने मिसरी कोवायतेलो छे, जा हिंदरु प्रभू बी ख्रुस पोर चोळाय गोयलु होतु.

⁹ आखा माणसे एने कुल एने भाषा एने जात्यान माणसे तिंदरा धोळोक साळे तीन दाहळा तोक देखता रोयसे, एने तिंदरा धोळ काजे मोळवाट्यामा मेकने नी देये.

¹⁰ कोवीम रोयने वावा हिंदरे मोरनेसी खुशीमा एने मगन रोयसे, एने एक दिसरानचा भेट मूकलसे, काहाकि जे दुय भविष्य कोरणे वावा कोवीन रोयने वावानु काजे तोकलीत आपता होता.

¹¹ बाकीन साळे तीन दाहळान ओवतेन परमेश्वर जुव गोथो परमेश्वरोन स्वास हिंदरेमा बोस गोयू, एने चे आपना पायो पोर उबरोय गोया, एने तीनाक देखने वावा पोर जादा बिक देखाय पोडी.

¹² तेत्यार हिनु काजे सोरगोमा गोथू एक मोटलु बुल सोमवाय पोळ्यु, “न्या उपोर आवू” यो सोमवीन चे वादवा पोर बोसीन आपना दुष्मोन काजे देखता-देखता सोरग पोर चोळ गोया.

¹³ ओवतेन तिने टेमे एक मोटलो भूकंप होयो, एने गावोन दोसवू भाग पोड गोयू; एने तीना भूकंपसी सात हजार माणसे मोर गोया एने बाकी बिह गोया एने सोरगोन परमेश्वरोन महिमा कोऱ्या.

¹⁴ दुसरो सोंकट बित गोयो; देखू, तिसरो सोंकोट तेत्यारुत आवने वावू छे.

सातवो फेपाऱ्यो

¹⁵ तेत्यार सातवू सोरग दूत फेपाऱ्यो फुक्यू, ती सोरगोमा एरा बारामा मोटला-मोटला बुले होयने बाज गोया, “जोगोन राज आमरा प्रभून एने हेरा मसिह होय गोयो, एने चू कायम राज कोरसे.”

¹⁶ तेत्यार चोवीस पुढाऱ्या जे तिंदरा परमेश्वरोन सामने आपना-आपना सिहासन पोर बोसला होता, उबळा पोळीन परमेश्वर काजे नोमोन कोरीन,

¹⁷ यो कोयने बाज गोया, “हे ताकत वावू प्रभू, जू छे एने जू होतु, आमु तारो धन्यवाद कोरजे कि तू तारा मोटला ताकत काजे कामोमा लावीन राज कोरलु छे.

¹⁸ दिसरा जाती रीस कोऱ्या, बाकीन तारी रीस आव लागी एने ची टेम आव लागली छे कि मोरलान नियाव कोराय जाय, एने तेरा दास भविष्य कोरता एने चुखला माणसो काजे एने तीनु नानला मोटला काजे जे मारा नावोसी बिहीतेला बोदलु लेवाय जाय, एने कोवीक बिगडने वावाक नाश कोराय जाय.”

¹⁹ तेत्यार परमेश्वरोन यो मंदीर सोरगमा छे, उगळी गोयो, एने तेरा मंदीरमा तेरी वायदान संदूक देखाय पोळ्यो; एने वीजव्या एने बुल एने गाजनो एने भूकंपो होयो एने मोटला गारा पोळ्या.