फिलिप्पि 4 - बारेली पावरी

पौलुसोन सलाह

¹ इनान कोरता हे मारा मोंगावा भाशो जीनामा मारो मोन लागलो रोयतेलो छे, जो मारो खुशी एने मुकुट होये, हे मोंगावा भाशो प्रभूमा इना रितीसी बोनला रोयू.

² मे युवदी काजे बी सोमजाडो एने सुंतखे काजे बी कि चे प्रभूमा एक मोनोसी रोये.

³ जे खोरला साथीदारमा तुसे काजे बी विनता कोरो कि तू तीनु बायराण मदत कोर, काहाकि चे मारे साते वारली खोबर कोयनेमा क्लेमोस एने दिसरा साती साते मेहनत कोऱ्या, जिंदरो नाव जीवनी किताबमा लिखायलो छे.

हमेशा खुश रोयू

⁴ प्रभूमा हमेशा खुशीमा रोयू; मे ओवी कोयो खुशीमा रोयु,

⁵ तुमरी नोरमाय आखा माणसोमा प्रगट होये. प्रभू साते छे.

⁶ कानलीत वातोन चिंता मा कोरू; बाकीन होर एक वातोमा तुमरो मांगनो, प्रार्थना एने विनतान लारे धन्यवाद साते परमेश्वर ओगोव उबराखाय जाय.

⁷ तेत्यार परमेश्वरोन शांती जू आखा सोमोजसी पुरो छे तुमरो मोन एने तुमरू विचार काजे मसिह येसुमा सोमवीन राखसे.

इनी वातो पोर मन लागाळू

⁸ इनान कोरता हे भाशो जे-जे वाते खोरला छे, एने जे-जे वाते आदोरोन छे, एने जे-जे वाते सही छे, एने जे-जे वाते चुखला छे एने जे-जे वाते वारू एने जे-जे वाते मोन भावनि, मतलब जा बी वारला गुणे एने बोढाईन वाते छे तीना पोर ध्यान लागाळू.

⁹ जे वाते तुमु मारेसी सिकला छे एने ग्रहण कोरला छे, एने सोमव्या, एने मारेमा देख्या, तिंदरोत पालन कोऱ्या कोरु, तेतार परमेश्वर जु शांतीन झोरु छे, तुमरे साते रोयसे.

¹⁰ मे प्रभूमा घोनु खुश छे कि हिमी ओतरा दाहळान बाद तुमरी चिंता मारा बारामा पोसी जाग गोयली छे, छाचलीन तुमु काजे पेहेले गोथो एरू विचार होतु, बाकीन तुमु काजे टेम नी जोळी.

¹¹ यो नी कि मे मारी कोमजुरी वजेसी यो कोयो, मे यो सीखाळतलु छे कि जिना हालोतमा छे; तीनामा खुश रोयू.

¹² मे दिन होयने बी जानतलु छे एने बोढनो बी जानतलु छे, आखी वात एने आखी हालोतमा मे आफेरलू रोयनेन, भूकलू रोयने, बोढने एने कोम होयनो बी सिकलू छे.

¹³ जू मेसे काजे ताकत आपतलु छे तीनामा मे सोब काय कोर सोकतलु.

¹⁴ ते बी तुमु भोलो कोऱ्या कि मारा साती बोन्या.

¹⁵ हे फिलीप वावा तुमु खुदोक मालूम छे कि वारली खोबर प्रचारोन पेहेले जेतार मे मकीदुनीयामा गोथू गोयू, तेत्यार तुमु काजे छुळीन ओवी काहणी मंडवीमा लेन देनोन बारामा मारी मदत नी कोऱ्या.

¹⁶ इना रितीसी जेतार मे थेस्सलुनीका होतु तेत्यार बी तुमु मारी कोमी काजे पुरी कोरनेन कोरता एक कावा काय दुय कावा काहीन मुकेल्ला होता.

¹⁷ यो नी कि मेसेक दान जुवे बाकीन मेसेक ओसो फोव जुवे जो तुमरा फायदान कोरता बोढतो जाय.

¹⁸ मारे जुव सब काय छे बाकीन घोन सोवटा बी छे; जे चीजे तुमु इपफ्रुदीतुसन हाते मुकेलला होता तीनुक लीन मे खुश होय गोयलु छे, चो ते सुखोन गोंद लेनेन लायक बलिदान छे, जो परमेश्वर काजे वारलो लागे.

¹⁹ मारू परमेश्वर बी आपना तीना धोनोन अनसारे जी महिमा साते मसिह येसुमा छे तुमरी होर एक कोमी काजे पुरो कोरसे.

²⁰ आपना परमेश्वर एने बासोन महिमा कायम होयती रोये, आमेन.

नमस्कार एने आशिष

²¹ होर एक चुखला जना काजे जे मसिह येसुमा छे नमस्कार कोयु. जे भाशे मारे साते छे तुमु काजे नमस्कार कोय रोया.

²² आखा चुखला माणसे विशेष कोरीन जो केसरोन घोरानान छे तुमु काजे नमस्कार.

²³ आमरे प्रभू येसु मसिहन दया तुमरी आत्मान साते रोये.