फिलिप्पि 2 - बारेली पावरी

मसिही विनम्रता

¹ आखरी, अगर मसिहमा काहीन शांती, एने मोंगसी हिंमत एने आत्मान सहभागीता, एने गिन एने दया छे.

² ती मारी यी खुशी पुरी कोरु कि एक मोनोसी रोयू एने एकुत मोंग एने एकुत मोन एने एकुत योजना राखू.

³ विरोध नीती झुटी बोढाईन कोरता काय मा कोरु, बाकीन एक दिसरा काजे आपनेसी वारू सोमजू.

⁴ होर एक आपना खुदोन हितोन कोरता नी; बाकीन दिसरान हितोन कोरीन चिंता कोरु.

मसिहीन दीनता एने महानता

⁵ जोसो येसु मसिहन स्वभाव होतु तोसोत तुमरो बी होयो;

⁶ जू परमेश्वरोन स्वरूप सारखो होयीन बी परमेश्वर सारखो होयनेन बी आपना ताबामा मेकनेन चीज नी सोमज्यु.

⁷ बाकीन आपसुत ओसो शून्य कोर देदु एने दासोन रूप धारण कोऱ्यु एने माणसोन सारखु होय गोयू.

⁸ एने माणसोन रुपमा आवीन आपनो खुदो काजे दिन कोर देदू एने न्या तोक आग्याकारी रोयू कि ख्रुसोन मोरोन बी सोहोन कोऱ्यु.

⁹ इना वोजेसी परमेश्वर तीना काजे घोनु महान बी बोनाव्यू एने तीनाक चो नाव जो आखा नावोमा मोटो छे.

¹⁰ कि जू सोरगोमा एने धोरती पोर एने धोरतीन नेचो छे, चे आखा येसुन नावो पोर घुटना टेके.

¹¹ एने परमेश्वर बासोन महिमान कोरता होर एक जीब कबूल कोर लेये कि येसु मसिह प्रभू छे.

विजावा सारखा चमकू

¹² इनान कोरता हे मोंगावा जिना रितीसी तुमु हमेशा आग्या मानता आवला छे तोसोत हिमी बी निस्तु मारे साते रोयता जायीन नि बाकीन खास कोरीन हिमी मारे नांबे रोयनेसी बी बिहीता एने कापता जायीन आपना-आपना छुटकारान काम पुरा कोरता जावू.

¹³ काहाकि परमेश्वर ओतरू छे जू तेरी खुदोन मोर्जीन कोरता तुमरा मोनोमा मोर्जी एने काम, दुयू वातो काजे कोरनेन ओसोर नाख्यू.

¹⁴ आखो काम बिना कुरकुर कोरे एने बिना विवादोन कोऱ्या कोरु.

¹⁵ काहाकि तुमु निरदोष एने वारला होयीन गांडा एने एक हेट्या माणसोन इचमा परमेश्वरोन चुखला पुऱ्या बोनला रोये जिनान इचमा तुमु जीवनोन वचन लीन जोगोमा धोपतला दिवान सारखो देखाय पोळतेला छे.

¹⁶ कि मसिहन दाहळामा मेसेक मोटाय कोरनेन मतलब रोये कि नी मारो दोवळनो नी मारी मेहनोत कोरनो वायबार होयो.

¹⁷ अगर मेसे काजे तुमरो भुरसान बलिदान एने सेवा साते मारो लुय बी वोयाळनो पोळे ते बी मे खुशीमा छे एने तुमरे आखान साते खुशी कोरो.

¹⁸ तोसात तुमु बी खुशीमा रोयू एने मारे साते खुशी कोरु.

तीमथीन सराहना

¹⁹ मेसेक प्रभू येसुमा आस छे कि मे तीमथीस काजे तुमरेनचा छाटू मुकलीस, काहाकि तुमरा हाल सोमवीन मेसेक शांती जोळे.

²⁰ काहाकि मारेंचा ओसला स्वभावोन कुदू नी होय जू चुखला मोनोसी तुमरी चिंता कोरे.

²¹ काहाकि आखा आपना स्वार्थ काजे हेरता रोयतला छे, येसु मसिहन नि.

²² बाकीन तीना काजे ते तुमु पारखी एने जानी बी रोया कि जोसू पुऱ्यु बास साते कोरतेलू तोसोत वारली खोबरोन कोयनेमा मारे साते मेहनत कोरतेलु.

²³ इनान कोरता मेसेक आस छे कि जोबी मेसेक मालूम पोळसे कि मारो काय हाल होयसे तेत्यारुत मे तीना काजे छाटू मुकली दिस.

²⁴ एने प्रभूमा मेसेक भुरसू छे कि मे भी छाटू आवीस.

इपफ्रुदीतुसोन सराहना

²⁵ बाकीन मे इपफ्रुदीतुस काजे जू मारू भाश एने साथीदार एने साती लोळायन्यू एने तुमरू दूत एने गोरोजोन वातोमा मारी सेवा कोरणे वावू सेवक छे, तुमरेनचा मुकोलनो गोरोजोन सोमज्यू.

²⁶ काहाकि तेरो मोन तुमरे आखामा लागलो होतो इना रितीसी चू दुखी रोयतू होतु काहाकि तुमु तेरी बिमारीन हाल सोमवला होता.

²⁷ छाचलीन चू बिमार ते होय गोयलु होतु न्या तोक कि मोरने पोर होतु बाकीन परमेश्वर तेरे पोर दया कोऱ्यु, एने निस्तु तेरे पोर ओतरो नि बाकीन मारे पोर बी कि मेसेक दुखो पोर दुख नी देये.

²⁸ इनान कोरता मे तीनाक मुकोलनेन कोऱ्यु कि तुमु तीनासी ओवी भेट कोरीन खुश होय जावू एने मारो दुख बी कोम होय जाय.

²⁹ इनान कोरता तुमु प्रभूमा तीनासी जादा खुशीसी भेट कोरु एने ओसलान आदर कोरता रोयजू.

³⁰ काहाकि चू मसिहन कामोन कोरता तेरा जीवो काजे तोकलीत झेलीन मोरनोन साते आव लागलु होतु काहाकि जी कोमी तुमरेनचा गोथी मारी सेवामा होयली तिनीक पुरो कोरे.