फिलिप्पि 1 - बारेली पावरी

अभिवादन

¹ मसिह येसुन सेवक पौलुस एने तीमथीन तोरोफसी, आखा चुखला माणसोन नावे जे येसु मसिहमा रोयीण फिलीप्पी देसोमा रोयता होता, पुढारी एने सेवक साते.

² आपनु बास परमेश्वर एने प्रभू येसु मसिहन तोरोफसी तुमु काजे ओवी दया एने शांती जोळती रोये.

धन्यवाद एने मंडवीन कोरता प्रार्थना

³ मे जेतार-जेतार तुमु काजे फोम कोरतेलू, तेत्यार-तेत्यार आपना परमेश्वरोन धन्यवाद कोरतेलू;

⁴ एने जेतार कोदि तुमु आखान कोरता प्रार्थना कोरो, ती हमेशा खुशीमा प्रार्थना कोरतेलु.

⁵ इनान कोरता कि तुमु पेहेले दाहळे गोथो हिमी तोक वारली खोबरोक पोसरावनेमा मारे साते जुळायला होता.

⁶ मेसेक इनी वातोन भुरसू छे कि जू तुमरे पुठी वारला कामो काजे चालु कोरलु छे, चू तीना काजे येसु मसिहन दाहळा तोक पुरा कोरसे.

⁷ वारू छे कि मे तुमरे आखान कोरता ओसोत विचार कोरो, काहाकि तुमु मारा मोनोम आव लागला छे, एने मार बंदीमा एने वारली खोबरोन कोरता जोवाब एने माप आपनेमा तुमु आखा मारे साते दयामा एखठा होयू.

⁸ इनाम परमेश्वर मारू गोवा छे कि मे येसु मसिहीन सारका मोंग कोरीन तुमरे आखान लालसाय कोरतेलू छे.

⁹ मे जी प्रार्थना कोरो कि तुमरो मोंग ग्यान एने आखा भातीन ओकोल साते ओवी बी बोढतू जाय.

¹⁰ न्या तोक कि तुमु वारलासी वारला वातो काजे वारलो सोमजू, एने मसिहन दाहळा तोक खोरला बोनीन रोयू.

¹¹ एने तीना धारमिकतान फोवोसी यो येसु मसिहन लारे होयतेली छे, पुरा कोरता जावू जीनासी परमेश्वरोन महिमा एने बोढाई होयती रोये.

बोंदीन रूपमा सेवा

¹² हे भाशो, मारी मोर्जी छे कि तुमु यो सोमजी लेवू कि मारे पोर जो वितलो छे, तीनासी वारली खोबरोन बोढती होयली छे.

¹³ न्या तोक कि केसरोन राजघोरोन आखी टुवू एने रोयला आखा माणसोमा यो प्रगट होय गोयो कि मे मसिहन कोरता बंदी छे.

¹⁴ एने प्रभूमा जे भाशे छे, तीनुमा गोथा लोकेत मारे बंदी होयनेन वजेसी हिंमत धोरीन परमेश्वरोन वचन बिंदास सोमवनेन होर कोरतेला.

¹⁵ काहनास ते दोगा एने झोगळान वोजेसी मसिहन प्रचार कोरतेला एने काहनास वारली मोर्जीसी.

¹⁶ कुदू एक ते ओसो सोमजीन कि मे वारली खोबरोन प्रचारोन कोरीन जोवाब आपनेन कोरता ठेराय गोयलु छे, मोंगसी वारली खोबर प्रचार कोरतेला छे.

¹⁷ एने कुदू एक ते सूदला तोरोफसी नी बाकीन खिलापसी मसिहन काहानी सोमवाळतला छे, यो सोमजीन कि मारे साते बंदीमा मारेनन कोरता दुख पोयदा कोरे.

¹⁸ ती काय होयो? निसतो यो कि होर एक भातीन, चाहे बहानासी, चाहे खोरला रितीसी मसिहन काहानी सोमवाळतेला छे, एने मे इनासी खुश छे एने खुशीमा रोयीस.

¹⁹ काहाकि मेसेक मालूम छे कि तुमरी प्रार्थनान लारे, एने येसु मसिहन आत्मान दानोन लारे, एरो प्रतीफोव मारो छुटकारू होयसे.

जीवतला रोयनो मसिही छे

²⁰ मे ते मोनोसी दाहळीन लालच एने आस मेकतलु छे कि मे काहना वातोमा नि लाजवायो, बाकीन जोसो ताकतोन हिंमतसी मसिहन बोढाई मारा डीलोन लारे हमेशा होयती आव रोयी तोसोत हिमी बी होये, अगर मे जीवतु रोयो नि ती मोर जाम.

²¹ काहाकि मारेन कोरता जीवतु रोयनो मसिह छे एने मोर जानो फायदू छे.

²² बाकीन अगर डीलोमा जीवतु रोयनो मारा कामोन कोरता फायदु छे ती मेसेक नी मालूम कि कुनी काजे नेवाळनो.

²³ काहाकि मे दुयोन इचमा लोटकी रोयू; मोन ते कोरे कि काहीन कोरीन मसिहनचा जायीन रोयो, काहाकि यो जुदो वारू छे.

²⁴ बाकीन डीलोमा रोयनो तुमरे वोजेसी ओवी बी गरज छे.

²⁵ इनान कोरता कि मेसे काजे एरू भुरसू छे, आखरी, मेसेक मालूम छे कि मे जीवतु रोयीस बाकीन तुमु आखा साते रोयीण जीनामा तुमु भुरसासी पाका होयता जावू, एने तीनुमा खुशीमा रोयू;

²⁶ एने जी मोटाय तुमु मारा बारामा कोरतेला छे, चो मारे पोछोव तुमरेनचा आवनेसी मसिह येसुमा जादा बोड गोया.

कोशिश एने मसिहीन कोरता दुख झेलणो

²⁷ निसतो ओतरो कोरु कि तुमरो चाल चलन मसिहन वारली खोबरोन लायक रोये कि मे आवीन तुमुक देखो, नीती नी बी आवो, तुमरे बारामा सोमवो कि तुमु एकुत आत्मामा पाका रोयू, एने एक मोन होयीन वारली खोबरोन भुरसान कोरता मेहनतोन कोरता रोयतला.

²⁸ एने कानलीत वातोमा विरोधीसी बिक नी लागतलो, यो तिंदरेन कोरता छुटकारान एने यो परमेश्वर तोरोफसी छे.

²⁹ काहाकि मसिहन वजेसी तुमरे पोर यो गिन होयी कि नी तीनु पोर जो भुरसू कोरे बाकीन तिंदरेन कोरता दुख भी उठाव्यू.

³⁰ एने तुमु काजे बी तोसोत मेहनोत कोरनो छे, जोसा तुमु मेसेक कोरतेलु देखला छे एने हिमी बी तुमु सोमेवतेला कि मे तोसुत कोरतेलू.