फिलेमोन 1 - बारेली पावरी

सुभेच्छा

¹ पौलुस भूनी गोथू यु मसिह येसुन बंदी छे, एने भाश एने तीमथी भूनी मोंगावू काम कोरन्यू फिलेमोन.

² एने बहोनिश अफफिया एने आमरे साते लोळायने वावू अरखिप्पुस एने फिलेमोनोन घरोन मंडवीन नाव.

³ आमरा परमेश्वर बास एने येसु मसिहनचा गोथू दया एने शांती जोळती रोये.

धन्यवाद एने प्रार्थना

⁴ मे हमेशा परमेश्वरोन धन्यवाद कोरो, एने मारी प्रार्थनामा मे भी तुसेक फोम कोरतेलू.

⁵ काहाकि मे तारा तीना मोंग एने भुरसान वाते सोमवतलु, यो आखा चुखला माणसो पुठी एने प्रभू येसु पोर छे.

⁶ मे प्रार्थना कोरो कि भुरसामा तू भेसकायलु जुवे, तुमरी आखी भोलाईन उवखानमा मसिहन कोरता वातळी होये.

⁷ काहाकि हे भाशो मेसेक तारा मोंगसी खुशी एने शांती जोळतली इनान कोरता कि तारे लारे चुखला माणसोन मोन आरामसी भोर गोयला छे.

उनेसिमुस कोरता विनता

⁸ इनान कोरता हिमी तोक मेसेक मसिहमा घोनी हिंमत छे कि जीनाक तेरी आग्या तुसेक आपो.

⁹ ते बी मार सारखा डायला पौलुस काजे जू हिमी मसिह येसुन कोरता बोंदी छे यो ओवी बी वारलो लाग्यो कि मोंगसी विनता कोरो.

¹⁰ मे आपना पुऱ्या उनेसीमूस कोरता, जू मारेसी बंदीन टेमे जोनायला छे, तुसेक विनता कोरो.

¹¹ चू ते पेहेले तारा काय कामोन नी होतु, बाकीन हिमी तारा एने मारा दुयोन घोनु कामोन छे.

¹² तीना काजे मतलब जू मारा डीलोन कावजो छे, मे तारेनचा पोछु मुकली देदलु छे.

¹³ तीनाक मे मारेंचा राखणे होतु कि चू तारा तरफसी इना बंदीमा जे वारली खोबरोन वोजा छे, मारी सेवा कोरे.

¹⁴ मे तारी मोर्जी विगुर कायबी नि कोरणे हिंड्यू, कि तारी जी वारलो दबाव से नि पुन खुशीसी होये.

¹⁵ काहाकि काय मालूम चू तुसेक थुलाक दाहळा कोरता इना वोजेसी ओलोग होयू कि हमेशा कोरता तारे पुठी रोये.

¹⁶ बाकीन हिमी गोथू दासोन तोसु नी बाकीन दास गोथू बी वारला, मतलब भाशो सारखू रोये, जू डीलोमा बी एने प्रभूमा बी मारू खास मोंगावू होये.

फिलेमोनोन आग्याकारीता सी उत्साहित होयनो

¹⁷ आखरी हिमी तू मेसेक तारू साती सोमोजतलु, ती इनाक स्वीकार कोर जोसू मेसेक.

¹⁸ अगर चू तारी काहीन गलत कोरलु होय एने तारे पोर तेरो काहीन आवतो होय, ती मारा नावोसी लिख ले.

¹⁹ मे पौलुस आपना हातोसी लिखो कि मे खुद भोर दिस एने यो कोयनेन जोरूरत नी पोळे कि मारू कोरजू जू मार पोर छे चू तूच छे.

²⁰ हे भाश जी खुशी मेसेक प्रभूमा तार तोरोफसी जोळे. मसिहमा मारा जीवो काजे निवो कोच कोर दे.

²¹ मे तारी आग्या माननेवावू होयनेन भुरसू कोरीन तुसेक लिखो एने यो सोमजो कि जो काय मे कोयने बाज रोयू, तू तीनाम गोथू लोकेत बोढीन कोरिस.

²² एने यो बी कि मारेन कोरता रोयनेन जागा तीयार राख. मेसेक आस छे कि तुमरी प्रार्थना लारे मे तुमुक आपाय जाश.

आखरी सुभेच्छा

²³ इपफ्रास जू मसिह येसुमा मारे पुठी बोंदी छे.

²⁴ एने मरकुस एने अरिस्तर्खुस एने देमास एने लुका जे मारा पुरा काम कोरण्या.

²⁵ आमरा प्रभू येसुन मसिहन दया तुमरा आत्मा पोर होती रोये. आमेन.