मरकुस 9 - बारेली पावरी

¹ एने तेत्यार चू तीनु काजे कोयू, “मे तुमु काजे छाचलीन कोयो कि ये न्या उबरोय रोया, इनामा काहना ओसा छे, कि जेतार तोक परमेश्वरोन राज काजे ताकत साते आवलु नि देख लेये, तेत्यार तोक मोरनेन सोवाद कोदि नि चाखे.”

येसुन रुपांतर

² छोव दाहळान ओवतेन येसु पतरस एने याकुब एने योहान काजे साते लेदू, एने सुनले जागे एक मोटला बोयळा पोर लीगोयू एने चा तिंदरे सामने तेरो रूप बोदली गोयो,

³ एने तेरा छिंदरा ओसा धोव्वा सोप होय गोया एने न्या तोक धोव्वा होया, कि धोरती पोर काहनुत धोबी बी ओसो धोव नि कोर सोकतेलू,

⁴ एने तीना काजे मुसा साते एलिया देखाय पोळ्यु; एने चे येसु साते वात कोरता होता.

⁵ इनापोरसी पतरस येसु काजे कोयू, “हे रब्बी, आमरो न्या रोयनो वारोलो छे इनान कोरता आमु तीन मंडप बोनावजे; एक तारे जुगू, एक मुसा जुगू, एने एक एलिया जुगू.”

⁶ काहाकि चू नि जानतू होतु कि काय जोवाब आपो, एरेन कोरता कि चे घोणा बिही गोयला होता.

⁷ तेत्यार एक वादवो तिंदरे पोर छावाय गोयो, एने तिना वादवामा गोथो ओसो ओवाज निकव्यू, “यु मारू मोंगावू पुऱ्यु छे, तेरो सोमवू.”

⁸ तेत्यार चे एक सारका च्यारु धोळे नोजोर नाख्या, एने येसु काजे छुळीन तिंदरे साते ओवी कुदा काजे नि देख्यू.

⁹ बोयळा पोर गोथा उतरनेन टेमे चू तीनु काजे आग्या आप्यू कि जेतार तोक माणसोन पुऱ्यु मोरलामा गोथू पोछु जीव नि उठे, चा तोक यो काय तुमु देखला छे चो कुदा काजे झुन कोयता.

¹⁰ चे इनी वातो काजे फोम राख्या; एने एक दिसरा साते जोखळायने बाज गोया, “कि मोरलामा गोथू पोछु जीव उठनेन काय मतलब छे?”

¹¹ एने चे तीना काजे पुछा, “शास्त्री काहा कोयतेला कि एलियान पेहेले आवोनो जरूरी छे?”

¹² येसु तीनु काजे जोवाब आप्यू, “एलिया छाचलीन पेहेले आवीन आखो काय सुदारसे, बाकीन माणसोन पुऱ्यान बारामा यो काहा लिखलो छे कि चू घोनो दुख उठावसे, एने विटाव गीनायसे?”

¹³ बाकीन मे तुमु काजे छाचलीन कोयो, “कि एलिया ते आव लागलु, एने जोसो तेरा बारामा लिखलो छे, तीनु काजे जो काय जुवे तेरे साते कोऱ्या.”

भुंडली आत्मासी छुटकारू

¹⁴ एने तेत्यार चू चेलानचा आव्यु, ती देख्यू कि तिंदरे च्यारु धोळे सोवटी गोरदी होय रोयी एने शास्त्री तिंदरे साते जोखळायने बाज रोया.

¹⁵ एने तिना काजे देखताच आखा घोणात वाहराय गोया, एने तेरे भूनी दोवळीन तीना काजे नमस्कार कोऱ्या.

¹⁶ चू तीनु काजे पुछु, “तुमु इनदरे पुठी काय जोखळी पोळ रोया?”

¹⁷ गोरदीमा गोथू एक जोणु तीना काजे जोवाब आप्यू, “हे गुरु, मे आपना पुऱ्या काजे, जीनामा गुंगी आत्मा भोरायली छे, तारेनचा लावलू होतु.”

¹⁸ जा काबी ची तीना काजे धोरतेली, चात आसटी देतली एने चू मुयोमा फेस भोर लेतेलू, एने दात पिस्तेलू, एने सुकतू जातलु एने मे तारा चेला काजे कोयू कि चे इना काजे निकाव देयू, बाकीन चे निकाव नि सोक्या.

¹⁹ यो सोमवीन चू तीनु काजे जोवाब आपीन कोयू, “हे कोम भुरस्या माणसो, मे का तोक तुमरे साते रोयीस? एने का तोक तुमरो सोहीस? हिना काजे मारेंचा लावू.”

²⁰ तेत्यार चे तीना काजे तेरेनचा लाव्या एने जेतार चू तीना काजे देख्यू, ती ची भुंडली आत्मा तेत्यारुत तीना काजे पिव्वी देदी; एने चू धोरती पोर पोळ्यु एने मुयमा गोथू फेस वोयाळतू जायीन जाणे बाज गोयू.

²¹ चू तेरा बास काजे पुछु, “एरी जी हालोत कोत्यार गोथी छे?”

²² चू कोयू, “नानलू होतु तेत्यारून चू इना काजे सारने कोरीन कोत्यार आगठामा एने कोत्यार पाणीमा पाळलू; बाकीन अगर तू कोर सोके, ती आमरेपोर गीन कोरीन आमरेपोर उपकार कोर.”

²³ येसु तीना काजे कोयू, “अगर तू कोर सोकतेलु, जी काय वात छे? भुरसू कोरने वावान कोरता सोब काहीन होय सोकतेलो छे.”

²⁴ पुऱ्यान बास मामार नंम्र होयीन कोयू, “हे प्रभू, मे भुरसू कोरो, मारा अविस्वासोन इलाज कोर.”

²⁵ तेत्यार येसु देख्यू कि माणसे दोवळीन गोरदी कोरणे बाज रोया, ती चू भुंडली आत्मा काजे यो कोयीन धोमकाव्यू, “हे गुंगी एने बेहेरी आत्मा, मे तुसे काजे आग्या आपो, इनामा गोथी निकवी आव, एने इनामा कोबी भोरायती झुनी.”

²⁶ तेत्यार चू आयळीन एने तीना काजे घोनो पीव्वीन, निकवी आवी; एने पुऱ्यो मोरे ओसो होय गोयो, न्या तोक कि घोणा माणसे कोयने बाज गोया कि होयू मोर गोयू.

²⁷ बाकीन येसु तेरु हात धोरीन तीना काजे उठाळ्यू, एने चू उबरोय गोयू.

²⁸ जेतार चू घोरोमा आव्यु, ती तेरा चेला सुनलामा तीना काजे पुछ्या, “आमु तीना काजे काहा नि निकाव सोक्या?”

²⁹ चू तीनु काजे कोयू, “जो जात बिना प्रार्थना काहना इलाज सी नि निकोव सोकतेली.”

येसुन मोरनेन दुसरी कावा भविष्यवाणी

³⁰ ओवतेन चे चा गोथा गोया एने गलीलमा गोथा जाता होता तीना काजे नि लाकतो होतो कि कुदू नि उवखे,

³¹ काहाकि चू तेरा चेला काजे सिकाळतू होतु एने तीनु काजे कोयतू होतु, “माणसोन पुऱ्यु माणसोन हाते धोराय जासे, एने चे तीना काजे मार नाखसे; एने चू मोरोनेन तीन दाहळान ओवतेन जीवतु होयीन उठ जासे,

³² बाकीन जो वात तिंदरे सोमोजमा नि आवी, एने चे तीना काजे पुछने बिह्ता होता.”

चेला मायीन मोटलो कुन?

³³ एने चे कफर्णहुममा आव्या; एने घोरोमा आवीन चू तीनु काजे पुछु, “वाटे तुमु कानली वातो पोर जोखळायता होता?”

³⁴ चे हुगा रोया, काहाकि वाटे चे एक दिसरा साते ओसा जोखळी पोळला कि आमरे गोथू मोटू कून छे.

³⁵ तेत्यार चु बोसीन बारा जोना काजे बुलाव्यू एने तीनु काजे कोयू, “हिमी कुदा काजे मोटू होयने लागे, ती चू आखा गोथू नानू एने आखान सेवक बोने.”

³⁶ एने चू एक पुऱ्या काजे लीन तिंदरे इचमा उबराख देदू एने तीना काजे खुवामा लीन तीनु काजे कोयू,

³⁷ “जू कुदू मारे नावोसी ओसा पुऱ्यामा गोथू कुदा एका काजे बी स्वीकार कोरतेलू, चू मेसेक स्वीकार कोरतेलू छे; एने कुदू मेसेक स्वीकार कोरतेलू, चू मेसेक नी, बाकीन मेसेक मुकलने वावा काजे स्वीकार कोरतेलु.”

जो खिलापमा नि होय, चू पक्षमा

³⁸ तेत्यार योहान तीना काजे कोयू, “हे गुरु, आमु एक माणसो काजे तारा नावसी भुंडली आत्मा काजे निकावतलु देख्या एने आमु तीना काजे मोना कोरला, काहाकि चू आपने पोछोव नि आवतेलु.”

³⁹ येसु कोयू, “तीना काजे मा मोना कोरु; काहाकि ओसो कुदू नि होय जू मारा नावोसी मोटला कामे कोरे, एने ओगा मेसेक भुंडलु कोय सोके,

⁴⁰ काहाकि चे आमरा खिलापमा नि होय, चू आमरे भूनी छे.

⁴¹ जू कुदू एक कोवशु पाणी तुमु काजे एरेन कोरता पिवाळे कि तुमु मसिहन छे ती मे तुमु काजे छाचलीन कोयो कि चू तेरु प्रतीफोव काहनाबी रितीसी नी खुवाळे.

ठूकरोन वजोह बोननो

⁴² “जू कुदू इना नानलामा गोथू जे मार पोर भुरसू कोरतेला छे, कुदा काजे ठूकर खावाळे ती तेरेन कोरता वारू यो छे कि एक मोटीत घट्टीन पूळ तेरा गोवामा टांग देनो जुवे एने तीना काजे दोरीयामा नाख देनो जुवे.

⁴³ जेतार तारू हात तुसेक ठूकर खावाळे ती तीना काजे काट दे दुंन्डू होयीन जीवन जीवनेन कोरता तारेन कोरीन एरे गोथो वारू छे कि दुय हात होयीन बी नोरोगन आगठामा नाखाय जाने जी कोबी उलवाये नि.

⁴⁴ जा तिंदरा कीळा नि मोरतेला एने आगठो नि उलवायतेलो.

⁴⁵ जेतार तारू पाय तुसेक ठूकर खावाळे ती तीना काजे काट दे, लेंगळू होयीन जीवनमा जाणे तारेन कोरता वारू से कि तू दुय पाये लीन नोरोगमा जाय.

⁴⁶ जा तिंदरा कीळा नि मोरतेला एने आगठो नि उलवायतेलो.

⁴⁷ जेतार तारू डूवू तुसेक ठूकर खावाळे ती तीना काजे निकाव दे आन्द्वू होयीन बी परमेश्वरोन राजमा जाणेन कोरता तारे जुगू वारू छे कि दुय डूवा होयीन बी तू नोरोगमा नाखाय जाणे.

⁴⁸ जा तिंदरा किळा नि मोरतेला एने आगठो नि उलवायतेलो.

⁴⁹ काहाकि होर एक जोणु आगठासी खारलो कोरायसे.

⁵⁰ मीठो वारोलो छे, बाकीन मीठान सोवाद जात रोये, ती तीना काजे कालगा सी खोरलो कोरसू? आपनेमा मीठो राखू, एने एक दिसरा साते हिव मेवीन रोयू.”