मरकुस 8 - बारेली पावरी

चार हजार माणसोक खावाळनो

¹ तीनु दाहळामा जेतार ओवी मोटीत गोरदी एखठी होयी एने तिंदरे जुव खाणे नि होतो, ती येसु तेरा चेला काजे साते बुलावीन तीनु काजे कोयू,

² “मेसेक इनी गोरदी पोर गिन आवे, काहाकि जे तीन दाहळासी मारे पुठी छे, एने तिंदरे जुव कायबी खाणे नि होय.

³ हिमी मे हिनु काजे भूकला घोर मुकली दिस, ती वाटे थाकीन रोय जासे; काहाकि इनामा गोथा कां-कां नांबे गोथा आवला छे.”

⁴ तेरा चेला तीना काजे जवाब आप्या, “न्या उजाळीमा ओतरा रुटा कुदु कां गोथा लावसे कि जे आफरी जासे?”

⁵ येसु तीनु काजे पुछु, “तुमरे जुव कोतरा रुटा छे?” चे कोया, “सात.”

⁶ तेत्यार चू माणसो काजे धोरती पोर बोसनेन आग्या आप्यू, एने चे सात रुटा लीन एने धन्यवाद कोरीन भांग्यू, एने तेरा चेला काजे आपतू गोयू कि तिंदरे सामने मेके, एने चे माणसो काजे वाट देदा.

⁷ तिंदरे जुव थुलाक नानला माछा बी होता; चू धन्यवाद कोरीन तीनुक बी माणसो सामने मेकनेन आग्या आप्यू.

⁸ चे खायीन आफरी गोया एने चेला तीनु रोयला भूकरान सात खिल्ला भोरीन चुट्या.

⁹ एने माणसे चार होजारोन आस पास होता; एने तेत्यार चू तीनु काजे मुकली देदू,

¹⁰ एने चू तेत्यारुत आपना चेला पुठी ढोंड्यामा चोळीन दलमनुथा देसोमा जात रोयू.

फरुशीन लारे चिन्ह मांगनो

¹¹ एने फरुशी आवीन तीना साते जोखळायने बाज गोया, एने तीना काजे पारेखणेन कोरीन तीना जुव कहीन सोरगोन निशाणी मांग्या.

¹² चू तेरा आत्मामा ठुसका भोरीन कोयू, “इनी टेमोन माणसे काहा निशाणी हेरता होसे? मे तुमु काजे छाचलीन कोयो कि इनी टेमोन माणसो काजे कानली निशाणी नी आपाये.”

¹³ एने ओवतेन चू तीनु काजे छुळीन ओवी ढोंड्यामा चोळ गोयू एने पोरले धोळे जात रोयू.

फरुशीन खमीर

¹⁴ एने चेला रूटा लेणे विसरी गोया, एने ढोंड्यामा तिंदरे जुव एकुत रूटू होतु.

¹⁵ एने चू तीनु काजे जोताळ्यु, “देखू, फरुशीन खमीर एने हेरोदोन खमीरसी हुशारीमा रोवू.”

¹⁶ चे आपोसमा विचार कोरीन कोयने बाज गोया, “आमरे जुव रूटा नि होय.”

¹⁷ यो जानीन येसु तीनु काजे कोयू, “तुमु काहा आपोसमा ओसू विचार कोर रोया कि आमरे जुव रूटा नि होय? काय हांजू तोक नि जानतेला एने नि सोमोजतेला?

¹⁸ काय तुमरा मोने काठला होय गोया? काय डूवे देखीन बी नि देखतेला, एने कानटा होयीन बी नि सोमवतला? एने काय तुमु काजे फोम नि होय.

¹⁹ कि जेतार मे पाच होजारोन कोरता पाच रुटा भांगलू होतु ती तुमु भुकरान कोतरा टूपला भोरीन चूटला?” चे तीना काजे कोया “बारा टूपला”

²⁰ “एने जेतार चार होजारोन कोरता सात रुटा होता ती तुमु भूकरान कोतरा टूपला भोरीन चूटला होता?” चू तीनु काजे कोयू, “सात टूपला”

²¹ चू तीनु काजे कोयू, “काय तुमु हांजू तोक नि सोमोज्या?”

आन्दवा काजे वारू कोरनो

²² एने चे बेथसदामा आव्या; एने माणसे एक आंदवा काजे तेरेनचा लाव्या एने तीना काजे विनता कोऱ्या कि इना काजे छिमे.

²³ चू तिना आंदवान हात धोरीन तीना काजे गावोन बारथे लीगोयू, एने तेरा डूवामा थूपीन तेर पोर हात मेक्यू, एने तीना काजे पुछु, “काय तुसेक काहीन देखाये?”

²⁴ चू डूवा उचा कोरीन कोयू, “मे माणसो काजे देखतेलु; चे मेसे काजे चालतला झाड सारखा देखायतेला.”

²⁵ तेत्यार चू दुय कावार तेरा डूवा पोर हात मेक्यू, एने आंदवू ध्यानसी देख्यू एने चू वारू होय गोयू, एने आखो काय चुखो-चुखो देखने बाज गोयू.

²⁶ एने चू तीना काजे ओसो कोयीन घोर मूकल्यु, “इना गावोमा पाय बी झुन मेके.”

पतरसोन येसुक मान लेनो

²⁷ येसु एने तेरा चेला केसरिया फिलीप्पीन गावोमा जात रोयला. वाटे चू तेरा चेला काजे पुछु, “माणसे मेसे काजे काय कोयतेला?”

²⁸ चे जोवाब आप्या, “योहान बाप्तिस्मा आपनेवावू बाकीन कुदू-कुदू एलिया एने कुदू-कुदू भविष्य कोरता माईन एक बी कोयतेला.”

²⁹ चू तीनु काजे पुछु, “बाकीन तुमु मेसे काजे काय कोयतेला?” पतरस तीना काजे जोवाब आप्यू, “तू मसिह छे.”

³⁰ तेत्यार चू तीनु काजे जोताळीन कोयू कि मारा बारामा यो कुदा काजे झुन कोयता.

येसुन मोरनेन भविष्यवाणी

³¹ एने तेत्यार चू तीनु काजे भोनावने बाज गोयू कि माणसोन पुऱ्यान कोरता जोरुरी छे कि चू घोनो दुख उठावसे, एने डाह-डाहा एने प्रधान पुजारू, एने शास्त्री चे तीनाक विटाव सोमजीन मार देसे, एने चू तीन दाहळान ओवतेन जीवतु होयसे.

³² चू जी वात तीनु काजे खोरी-खोरी कोय देदू इनापोर पतरस तीना काजे ओलोग लीजायीन कोयने बाज गोयू,

³³ बाकीन चू वोवीन तेरा चेला भूनी देख्यू, एने पतरस काजे जुर कोयू, “हे भुतडा, मारे सामने गोथू नांबे होय; काहाकि तू परमेश्वरोन वातो पोर नि, बाकीन माणसोन वातो पोर मोन लागाळतलु.”

चेला बोननेन मतलब

³⁴ चू गोरदी काजे तेरा चेला पुठी साते बुलावीन तीनु काजे कोयू, “जिना कुदा काजे मार पोछोव आवने लागे, चू आपना खुदोन नाकार कोरे, एने आपनु ख्रुस हाकलीन, मार पोछोव आवे.

³⁵ काहाकि जू कुदू आपनु जीव वाचाडनेन देखसे चू तीना काजे खुवाळ देसे, बाकीन जू कुदू मारा एने वारली खोबरोन कोरता आपनु जीव खुवाळसे, चू तीनाक वाचाडसे.

³⁶ अगर माणूस आखो जोगो काजे जीक लेसे एने आपना जीवन नाश कोर लेसे, ती तिना काजे काय फायदु होयसे?

³⁷ एने माणूस आपना जीवनोन बोदले काय आपसे?

³⁸ जू कुदू जे भुंडला विचारे एने पापी जातीन इचमा मेसेक एने मारी वातो काजे लाजवायसे, माणसोन पुऱ्यु बी तेत्यार चू चुखला सोरग दूत पुठी आपना बासोन महिमा साते आवसे, तेतार तीनाक बी लाजवाळसे.”