मरकुस 6 - बारेली पावरी

नासरेतमा येसुन अपमान

¹ चा गोथू निकवीन चू आपना देसोमा आव्यु, एने तेरा चेला बी तेरे पोछोव गोया.

² शब्बाथोन दाहळे चू प्रार्थना घोरोमा सिकाळने बाज गोयू, एने घोन सोवटा माणसे सोमवीन वाहराय गोया एने कोयने बाज गोया, “इना काजे ये वाते का गोथा आवळी गोया? यो काहनो ग्यान छे जो इना काजे आपायलो छे? कोसो मोटला काम एरा हातोसी देखायतेलो?”

³ काय जी ची सुतार नी होय, जू मरीयमन पुऱ्यु, एने याकुब, एने योसेस, एने यहुदा, एने शिमोनोन भाश छे? एने काय तेरा बहोनिशानचा आमरे साते नि रोयतेला? “इनान कोरता चे तेरा बारामा ठूकर खादा.”

⁴ येसु तीनु काजे कोयू, “भविष्य कोरता काजे आपनु देस, एने आपनु परिवार, एने आपना घोर काजे छुळीन एने कोबी सन्मान नि जोळतेलु.”

⁵ एने चू चा काहीन मोटला काम नि कोर सोक्यू, निसतू थुलाक बिमारी वावा पोर हात मेकीन तीनु काजे वारू कोऱ्यु.

⁶ एने चू तिंदरू अविस्वास पोर नोवलाय कोऱ्यु, एने चू चारू धोळेन गाव-गावमा सिकाळतू फिऱ्यू.

येसुन बारा चेलाक मुकलनो

⁷ एने चू बारा जोना काजे तेरे साते बुलाव्यू एने तीनु काजे दुय-दुय कोरीन मुकलने बाज गोयू; एने तीनु काजे भुंडली आत्मा पोर होक आप्यू.

⁸ एने चू तीनु काजे आग्या आप्यू, “जाय तेतार लाकळी छुळीन ओवी काय झुन लेता; नि ते रूटा, नि झुवनो नि बोटवामा पोयशा,

⁹ बाकीन खासळा पेहेरू एने दुय-दुय डोगला मा पेहरू.”

¹⁰ एने ओवी चू तीनु काजे कोयू, “जा का बी तुमु कुदान घोर उतरसु, ती जेतार तोक चा गोथा आवे नि चा तोक तिना घोरोमा रोवू.

¹¹ जिने जागे माणसे तुमरो स्वीकार नी कोरे एने तुमरो नि सोमवे, चा जाताच आपना पायोन छोयळू झोटकी देयू कि तीनु पोर गोवा होये.”

¹² तेत्यार चे जायीन प्रचार कोऱ्या कि मोन फिरावू,

¹³ एने घोना सोवटा भुंडली आत्मा काजे निकाव्या, एने लोकेत मांदला पोर तेल लागाळीन तीनु काजे वारू कोऱ्या.

बाप्तिस्मा आपने वावाक मार नाखनो

¹⁴ एने हेरोद राजा बी तेरी वात सोमव्यू, काहाकि तेरो नाव पसरी गयो, एने चू कोयू, “योहान बाप्तिस्मा आपने वावु मोरलामा गोथू जीवतू होयु, इनान कोरता तेरेसी जे मोटला कामे देखायतेला.”

¹⁵ एने दिसरा माणसे कोया, “यु एलिया छे” बाकीन काहना दिसरा कोया, “भविष्य कोरता नीती भविष्य कोरता मायलु एक जोना सारकू छे.”

¹⁶ हेरोद यो सोमवीन कोयू, “जिना योहानोन मुनको मे काटाळलु होतु, चू जीवतू होय गोयू.”

¹⁷ एने हेरोद आपनु भाश फिलीपन लाडी हेरोदीयान वोजेसी, तिनी पुठी चू वियाव कोर लेदलु होतु, माणसो काजे मुकलीन योहान काजे धोरावीन बंदी घोरमा नाख देदला होता; काहाकि योहान हेरोद काजे कोयलु होतु, “आपना भाशोन लाडी काजे राखनो तुसेक वारू नी होय.”

¹⁸ काहाकि योहान हेरोद काजे कोयलु होतु, “आपना भाशोन लाडी काजे राखनो तुसेक वारू नी होय.”

¹⁹ कोरीन हेरोदीया तेरे पोर डाव धोरती होती एने तिनीक लाकतो होतो कि तीना काजे माराय देयो; बाकीन ओसो नी होय सोक्यो,

²⁰ काहाकि हेरोद योहान काजे धोरमी एने चुखला माणसे मानीन तीना काजे बिहतु होतु, एने तीना काजे वाचाडीन राखतू होतु, एने तेरी वाते सोमवीन घोनु बिहतु होतु, बाकीन खुशीसी सोमवतू होतु.

²¹ एने वारली टेम आवी तेत्यार हेरोद तेरा जन्मोन दाहळा पोर तेरा प्रधान, एने सेनापती, एने गलीलवावा मोटला माणसो जुगू खाणो बोनाव्यू.

²² ती हेरोदीयान पुराय माहाय आवी एने नाचीन हेरोद काजे एने तेरा साते बोसने वावा काजे खुश कोरी तेत्यार राजा पुराय काजे कोयू, “तुसे जो जुवे चो मारजुव माग मे तुसेक आपीस.”

²³ एने तिनी काजे कोसोम खादु, “मे आपनो आदो राजतोक जो काय तू मारे जुव मांगीस मे तुसे आपीस.”

²⁴ ची बारथे जायीन तेरी आया काजे पुछि, “मे काय मांगो?” ची कोयी, “योहान बाप्तिस्मा आपनेवावान मुनको.”

²⁵ ची तेत्यारुच राजानचा माहाय आवी एने तीना काजे विनता कोरी कि, “मेसेक जुवे कि तू हिमी योहान बाप्तिस्मा आपनेवावान मुनको एक थाविमा मेसेक मांगाळ दे.”

²⁶ तेत्यार राजा घोन दुखी होयू, बाकीन तेरी कोसोमोन वोजेसी एने साते बोसने वावान वोजेसी तीना काजे टावायो नि.

²⁷ आखरी राजा तेत्यारुच एक सिपायळा काजे आग्या आपीन मूकल्यु कि तेरो मुनको काटीन लाव.

²⁸ चू जेल खाणामा जायीन तेरो मुनको काट्यु, एने एक थाविमा मेकीन लाव्यू एने पुराय काजे आप्यू, एने पुराय तेरी आया काजे आपी.

²⁹ यो सोमवीन योहानोन चेला आव्या एने तेरा धोळ काजे लीगोया एने मोळवाट्यामा मेक देदा.

पाच हजार माणसोक खावाळनो

³⁰ प्रेषितोन येसु साते एखठा होयीन, जे-जे चे कोरला एने सिकाळला होता, आखो तीना काजे कोया.

³¹ चू तीनु काजे कोयू, “तुमु हिमी ओलोग कांखुर सुनले जागे जायीन थुलाक आराम कोरू” काहाकि लोकेत माणसे आवता-जाता होता, एने तिनु काजे खाणेन तोक टेम नी जोळती होती.

³² इनान कोरता चे ढोंड्या पोर चोळीन सुनसान जागे ओलोग जात रोया.

³³ एने लोकेत जोना तीनु काजे जातलू देखिन उवखी लेदा, एने आखा गावोमा गोथा एखठा होयीन चा पाये दोवळ्या एने तेरे पेहेले जायीन पुग गोया.

³⁴ चू उतरीन सोवटी गोरदी देख्यू, एने तिंदरे पोर गिन कोऱ्यु, काहाकि चे तीनु गाडरा सार कोयता, जिंदरा कुदू राखवाव्या नि होय; एने चू तीनु काजे लोकेत वाते भोनावने बाज गोयू.

³⁵ तेत्यार दाहळू ढोव गोयू, ती तेरा चेला तेरेनचा आवीन कोयने बाज गोया, “न्या सुनसान जागा छे, एने दाहळू लोकेत ढोव गोयलु छे.

³⁶ इनू काजे मुकली दे कि चारू धोळेन गावमा एने वोसत्यामा जायीन, आपने जुगू काहीन खाणेन कोरता मुले लेये.”

³⁷ चू जवाब आप्यू, “तुमुत तीनु काजे खाणे आपु” चे तीना काजे कोया, “काय आमु सोव दिनारोन रूटा मुले लेजे, एने इनू काजे खावळावजे?”

³⁸ चू तीनु काजे कोयू, “जायीन देखू तुमरे जुव कोतरा रूटा छे”? चे मालूम कोरीन कोया, “पाच एने दुय माछा बी.”

³⁹ तेत्यार चू तीनु काजे आग्या देदू कि आखा काजे निव्वा खोळापोर पोंगात-पोंगात सी बोसाळ देवू.

⁴⁰ चे सोव-सोव एने पोचास-पोचास कोरीन पोंगात ने पोंगात बोस गोया.

⁴¹ एने चू तीनु पाच रूटाकाजे एने दुय माछा काजे लेदू, एने सोरगो भूनी देखीन धन्यवाद कोऱ्यु, एने रूटाक भांग-भांगीन चेला काजे आपतू गोयू कि चे माणसो काजे वाटे, एने चे दुय माछा बी तीनु आखामा वाट देदा.

⁴² एने आखा खायलीन आफरी गोया,

⁴³ एने चे भुकरा बारा टूपल्या भोरीन चुट्या, एने काहीन माछा बी.

⁴⁴ जे रूटा खादला, चे पाच होजार ओदमीत होता.

येसुन पाणी पोर चालनो

⁴⁵ तेत्यार चू मामार आपना चेला काजे ढोंड्या पोर चोळने कोरीन कोय देदू कि चे तीनाम गोथा पेहेले पोरले धोळे बेथसदामा जात रोये, जेतार तोक कि तीनु माणसो काजे मुकली देये.

⁴⁶ एने तीनु काजे मुकली दिन चू बोयळा पोर प्रार्थना कोरणे कोरीन गोयू.

⁴⁷ एने जेतार सांतो होयो, ती ढोंड्यो दोरीयान इचमा होतो, एने चू एखलु भूयमा होतु.

⁴⁸ तेत्यार चू देख्यू कि चे चालाळता-चालाळता घाबराय गोयला छे, काहाकि वाहावू तिंदरे खिलापमा होतु, ती रातीन चोवथा पोहरोन साते चू दरियापोर चालतू जायीन तिंदरे साते आव्यु; एने तिंदरे गोथू ओगोव जाने वावु होतु.

⁴⁹ बाकीन चे तीना काजे दरियापोर चालतलु देखीन सोमोज्या कि भुतडो छे, एने आयळीन पोळ्या काहाकि आखा तीना काजे देखीन बिही गोयला होता.

⁵⁰ बाकीन चू तेत्यारुत तिंदरे साते वात कोऱ्यु एने कोयू, “हिंमत बादू मे छे; बिहू मा.”

⁵¹ जेतार चू तिंदरेनचा ढोंड्यामा आव्यु, एने वाहवो हुग रोय गोयो एने चे घोणा नोवलाय कोरणे बाज गोया.

⁵² काहाकि चे रूटान बारामा नि सोमेजला होता, काहाकि तिंदरा मोने कोठोर होय रोया होतो.

गन्नेसरेतमा मांदला काजे वारू करनो

⁵³ एने चे पोल धोळे उतरीन गन्नेसरत जागामा पुग गोया, एने ढोंड्या काजे धोळे लागाळ देदा.

⁵⁴ एने जेतार चे ढोंड्यामा गोथा उतऱ्या, ती माणसे तेत्यारुत तीना काजे उवखीन,

⁵⁵ आस पासोन आखा देसोमा दोवळ्या, एने बिमारी वावा काजे खाटला पोर मेकीन, जा-जा खोबर लीन कि चू छे, चा-चा लीन फीऱ्या.

⁵⁶ एने जा कां बी चु गाव, सोहोर, एने वस्तीमा जातु होतु, माणसे मांदला काजे हाटोमा नेकीन तीना काजे विनता कोरता होता कि चू तीनु काजे आपना छिंदरा कुरोकाजे छिमने दे, एने जोतरा तीना काजे छिमता होता, आखा वारू होय जाता होता.