मरकुस 5 - बारेली पावरी

भुंडली आत्मासी भोरायलु माणसोक वारू कोरनो

¹ एने येसु एने तेरा चेला दोरीयान पोरले धोळे गिरासेन देसोमा पुग्या,

² एने तेत्यार येसु ढोंड्यामा गोथू उतऱ्यु ती तेत्यारुत एक माणूस जीनामा भुंडली आत्मा होती, मोळवाट्यामा गोथू निकवीन तीना काजे मेव्यू.

³ चू मोळवाट्यामा रोयतू होतु एने कुदू तीना काजे साकवे कोरीन बी नि बांद सोकता होता,

⁴ काहाकि चू घोळी-घोळी बेड्या एने साकव्या कोरीन बांदायलु होतु, बाकीन चू साकव्या काजे तुळ देदु एने बेड्यान तुकडा-तुकडा कोर देदलु होतु, एने कुदू तिना काजे ताबामा नी कोर सोकता होता.

⁵ चू एक सारकु रात-दाहळू मोळवाट्यामा एने बोयळामा आयेळतेलु, एने खुदो काजे दोगळे कोरीन छेंद लेतलू.

⁶ चू येसु काजे नांबे देखीन दोवळ्यु, तीना काजे नोमोन कोऱ्यु,

⁷ एने उचेत ओवाजसी आयळीन कोयू, “हे येसु, परमप्रधान परमेश्वरोन पुऱ्या, मेसेक तारेसी काय काम? मे तुसे काजे परमेश्वरोन कोसोम आपो कि मेसेक तोकलीत मा आपे.”

⁸ काहाकि चू तीनु काजे कोयलु होतु, “हे भुंडली आत्मा, इना माणसोमा गोथी निकवी आव.”

⁹ चू तिना काजे पुछु, “तारो काय नाव छे?” चू तीना काजे कोयू, “मारो नाव सेना छे; काहाकि आमु लोकेत छे.”

¹⁰ एने चे तीनाक घोणा विनता कोऱ्या, “आमु काजे इना देसोमा गोथा बारथे मा मुकले.”

¹¹ चा बोयळा पोर सुवऱ्यान एक मोटूत टूवू चोरतू होतु.

¹² एने भुंडली आत्मा तीना काजे विनता कोरीन कोया, “आमु काजे हीनु सुवऱ्यामा मुकली दे कि आमु तिंदरे माहाय जाजे.”

¹³ आखरी चू तीनु काजे आग्या आप्यू एने भुंडली आत्मा निकवीन सुवऱ्यामा भोराय गोयी एने टूवू चे काय दुय होजारोन होता, आळखे गोथा झोळवायीन दोरीयामा जायीन पोळ्या एने डूबीन मोऱ गोया.

¹⁴ एने तिंदरा गुवाव्या दोवळीन सोहोरोमा एने गावोमा खोबर सोमवाळ्या.

¹⁵ एने जो होयलो होतो, माणसे चो देखणे येसुनचा आव्या एने आवीन चे तीना काजे जीनामा भुंडली आत्मा होती, मतलब जीनामा सेना भोरायली होती, छिंदरा पेहेरीन एने सुदपोर बोस रोयलू देखिन बिही गोया.

¹⁶ देखणे वावा तेरी, जीनामा भुंडली आत्मा होती, एने सुवऱ्यान आखी हालोत तीनु काजे कोयीन सोमवाळ्यु.

¹⁷ एने तेत्यार चे तीना काजे विनता कोरीन कोयने बाज गोया कि आमरा हदमा गोथू जात रोय.

¹⁸ एने जेतार चू ढोंड्या पोर चोळने बाज गोयू ती चू जीनामा पेहेले भुंडली आत्मा होती, तीना काजे विनता कोरणे बाज गोयू, “मेसे काजे तार साते रोयने दे.”

¹⁹ बाकीन येसु तीना काजे आग्या आप्यू, एने तीना काजे कोयू, “तारे घोर जायीन तारा माणसो काजे कोय कि तारे पोर दया कोरीन प्रभू तारेन कोरता कोसू मोटलो कामे कोरलु छे.”

²⁰ चू जायीन दिकापुलीसमा इनी वातो काजे प्रचार कोरणे बाज गोयू कि येसु मारेन कोरीन कोसू मोटा काम कोऱ्यु; एने आखा माणसे वाहराय जाता होता.

यायीरोन मोरली पुराय एने मांदली बायोर

²¹ जेतार येसु पोछु ढोंड्यामा पोरले धोळे गोयू, ती एक मोटीत गोरदी तेरेनचा एखठी होय गोयी चू दोरीयान धोळेत होतु.

²² एने याईर नावोन प्रार्थना घोरोन सरदारो मायलु एक आव्यु, एने तीना काजे देखीन तेरा पायो पोर पोळ्यु,

²³ एने ओसो कोयीन तीना काजे घोनु विनता कोऱ्यु, कि मारी नानली पुराय मोरने पोर छे तू आवीन तिनी पोर हात मेक कि ची वारू होयीन जीवती रोये.

²⁴ तेत्यार चू तेरे पुठी गोयू; एने मोटीत गोरदी तेरे पोछोव गोयी, न्या तोक कि माणसे तीना पोर पोळ जाता होता.

²⁵ एने एक बायर होती, तिनी काजे बारा साल गोथो लुय वोयनेन बिमारी होती.

²⁶ एने ची घोणा सोवटा डाक्टरसी घोनो दुख उठावी, एने आपनु आखू माल पोयशा खोरचू कोरणे पोर बी तिनी काजे काय फोरोक नि आवलु होतु, बाकीन ओवी बी मांदवाय गोयली होती.

²⁷ ची येसुन वात सोमवीन गोरदीमा तेरे पोछोव गोथी आवी, एने तेरा छिंदरा काजे छिम लेदी,

²⁸ काहाकि ची कोयती होती, “जत्यार मे तेरा छिंदरा काजे बी छिम लीस, ती वारू होय जायीस.”

²⁹ एने तेत्यारुत तेरो लुय वोयनो बोंद होय गोयो, एने ची तेरा डीलोमा जान लेदी कि मे इनी बिमारीमा गोथी वारू होय गोयली छे.

³⁰ येसु तेत्यारुत आपनेमा जान लेदू कि मारेमा गोथो ताकत निकवलो छे, एने गोरदीमा पोछु फिरीन पुछु, “मारा छिंदरा कुन छिमलो छे?”

³¹ तेरा चेला तीना काजे कोया, “तू देखतेलू कि गोरदी तारे पोर पोळ जातेली, एने तू कोय रोयू कि कून मेसेक छिमलो छे?”

³² तेत्यार चू तिनी काजे देखणे कोरीन जू यो काम कोरलु होतु, चारू धोळे नोजोर नाख्यू.

³³ तेत्यार ची बायर यो जाण गोयी कि मारी कोसी भोलाई होयली छे, बिहती एने कापती जाईन आवी, एने तेरा पायो पोर पोळीन तीना काजे आखी हालत खोरी-खोरी कोय देदी.

³⁴ चू तिनी काजे कोयू, “पुराय, तारू भुरसू तुसेक वारू कोरलु छे, खुशाली सी जा, एने आपनी इनी बिमारीसी सोमावीन रोय.”

³⁵ चू ओसो कोयतूत होतु कि प्रार्थना घोरोन सरदारोन घोर गोथा माणसे आवीन कोया, “तारी पुराय ते मोर गोयी, हिमी गुरु काजे काहा दुख देतलू?”

³⁶ जी वात चे कोयता होता, तीना काजे येसु सोमव्यू नि कोवाळने, प्रार्थना घोरोन सरदार काजे कोयू, “मा बिहे; निस्तु भुरसू मेक.”

³⁷ एने चू पतरस एने याकुब एने याकुबोन भाश योहान काजे छुळीन, एने दिसरा कुदा काजे आपने साते आवने नी देदू.

³⁸ एने प्रार्थना घोरोन सरदारोन घोरोमा पुगीण, चू माणसो काजे घोना रोडतेला एने आयळतेला देख्यू.

³⁹ तेत्यार चू माहाय जायीन तीनु काजे कोयू, “तुमु काहा कोचाट कोरतेला एने रोड रोया? पुराय मोरी नि, बाकीन सुवने बाज रोयी.”

⁴⁰ चे तेरी मोजाक कोरणे बाज गोया, बाकीन चू आखा काजे निकावीन पुरायन आसी-बासा एने आपना सातीदारोपुठी माहाय, जा पुराय पोड रोयी होती, गोयू.

⁴¹ एने पुरायन हात धोरीन चू तिनी काजे कोयू, “तलीथा कूम” एरू मतलब छे, “हे पुराय, मे तुसेक कोय, उठ”

⁴² एने पुराय तेत्यारुत उठीन चालने फिरने बाज गोयी; काहाकि ची बारा सालोन होती इनापोरसी माणसे वाहराय गोया.

⁴³ ओवतेन चू तीनु काजे जोताळीन आग्या आप्यू कि जो वात कुदाक मालम नि पोळनो जुवे एने कोयू, “इनी काजे काहीन खाणे आपु.”