मरकुस 3 - बारेली पावरी

सुकला हात वावान वारू होयनो

¹ एने चू ओवी यहुदिन प्रार्थना घोरमा गोयू एने चा एक माणूस होतु तेरू हात सुक गोयलु होतु,

² एने चे तीना पोर गुणू लागाळनेन कोरता तेरे पोर डाव धोर रोया होता कि देखता, यु शब्बाथोन दाहळे तीना काजे वारू कोरतेलु कि नी.

³ येसु सुकाला हातोवावा माणसो काजे कोयू, “इचमा उबरोयजा.”

⁴ एने तीनु काजे कोयू, “काय शब्बाथोन दाहळे वारू कोरनो वारू छे कि बुरो कोरनो, जीवो काजे वाचाडनो कि मारनो?” बाकीन चे हुगा रोया.

⁵ एने चू तिंदरा काठला मोनोसी दुखी होयीन, तीनु काजे रीसवायीन चारू धोळे देख्यू, एने तीना माणसो काजे कोयू “तारू हात ओगु कोर” चू ओगु कोऱ्यु, एने तेरू हात वारू होय गोयू.

⁶ तेत्यार फरुशी बारथे जायीन तेत्यारुत हेरोदीया साते तेरे खिलापमा वात कोरणे बाज गोया कि इना काजे कोसा सारजे.

येसुन पोछोव गोरदीन आवनो

⁷ एने येसु आपना चेला पुठी दरिया भूनी जात रोयू एने गलीलमा गोथी एक मोटीत गोरदी तेरे पोछोव आवी;.

⁸ एने यहुदिया, एने यरुशलेम सोहोरोम, एने इदोम, एने यरदनोन पोल धोळे, एने सोर एने सिदोनोन आस पास गोथी एक मोटीत गोरदी यो सोमवीन कि येसु कोसू चमत्कारी काम कोरतेलू, तेरेनचा आव्या.

⁹ एने येसु तेरा चेला काजे कोयू, “गोरदीन वोजेसी एक नानलो ढोंड्यो मार जुगू तीयार राखू काहाकि ये मेसेक डाबी नी सोके.”

¹⁰ काहाकि येसु घोणा सोवटा काजे वारू कोरलु होतु, तेरेन कोरता जोतरा माणसे मांदवायला होता, येसुक हात लागाळने कोरीन तीना पोर हिट पोळता होता.

¹¹ भुंडली आत्मा बी, जेतार तीनाक देखतेली, ती तेरे ओगोव हिट पोळती होती, एने आयळीन कोयती होती कि तू परमेश्वरोन पुऱ्यु छे.

¹² एने चू तीनु काजे घोनु कोयू कि मेसे काजे सामने लावता झुनी.

येसुन लारे बारा चेलाक नेवाळनो

¹³ ओवतेन येसु बोयळा पोर गोयू, एने जीनाक चे जुवता होता तीनु काजे आपने साते बुलाव्यू; एने चे तेरे साते आव्या.

¹⁴ तेत्यार चू बारा माणसो काजे नेम देदू कि चे तेरे साते-साते रोये, एने चू तीना काजे मूकल्यु कि चे प्रचार कोरे,

¹⁵ एने भुंडली आत्मा काजे निकावनेन होक राखे.

¹⁶ एने चे ये छे शिमोन जेरो नाव चू पतरस मेक्यू,

¹⁷ एने जब्दिन पुऱ्यु याकुब एने याकुबोन भाश योहान, जेरो नाव चू बुअनरगिस मतलब “आयळनेन पुऱ्यु” मेक्यू,

¹⁸ एने अन्द्रियास, एने फिलीप, एने बरतुल्मै एने मत्ती, एने थोमा, एने हलफईन पुऱ्यु याकुब, एने तद्दै, एने शिमोन कनानी,

¹⁹ एने यहुदा इस्कारीयोत जू तीनाक धोराय बी देदलु.

येसु एने बालजबलुन

²⁰ एने तेत्यार येसु घोरमा आव्यु एने ओसी गोरदी एखठी होय गोयी कि चे रूटा बी नी खाय सोक्या.

²¹ जेतार तेरा परिवार यो सोमव्या, ती चे तिना काजे धोरणे कोरीन निकव्या; काहाकि चे कोयता होता कि तेरो मोन ठीकान नि होय.

²² एने शास्त्री बी जे यरुशलेममा गोथा आवला होता, चे कोयता होता, हिनामा भुतडू छे, एने चू भुतडान सरदारोन साहायतासी भुंडली आत्मा काजे नीकावतेलु.

²³ एने इनान कोरता चू तीनु काजे साते बुलावीन तीनु काजे दाखलासी कोयने बाज गोयू, “भुतडू कोसू भुतडा काजे निकाव सोकतेलु?

²⁴ एने जेतार काहना राज्यामा फुट पोळती, तेत्यार चो राज कोसो सुदो रोय सोकतलो?

²⁵ एने जेतार कुदान घोरमा फुट पोळती, ती चो घोर कोसो सुदो रोय सोकसे?

²⁶ एने इनान कोरता जेतार भुतडू खुदपोरुत खिलाप कोरीन खुदपोरुत फुट पाळे, ती चु कोसू बोनीन रोय सोकतेलू? तेरू ते नाश होय जातेलू.

²⁷ “बाकीन काहनु माणूस कुदा ताकत वावान घोरमा भोरायीन तेरू माल नी लुट सोकतेलू, जेतार तोक कि चू पेहेले तिना ताकत वावा काजे बांध नी लेये; एने तेत्यार तेरा घोरो काजे लुट लेसे.”

²⁸ “मे तुमु काजे छाचलीन कोयो कि माणसोन आखा पाप एने बुराई जे चे कोरतेला, माफ कोराय जासे,

²⁹ बाकीन जू कुदू पवित्र आत्मान बुराई कोरे, चे कोबी बी माफ नि कोराये बाकीन चे सदा ओमोरकाई पापोन गुणावा ठेरायतला.”

³⁰ काहाकि चे यो कोयता होता कि इनामा भुंडली आत्मा छे.

येसुन आया एने भाश

³¹ एने तेत्यार येसुन आया एने तेरा भाश आव्या, एने बारथे उबरोयीन तिना काजे बुलावने कोरीन मुकल्या.

³² एने गोरदी तेरे आळी-छेळी बोसरोयली होती, एने चे तिना काजे कोया, “देख, तारी आया एने तारा भाश बहोनिश बारथे तुसेक हेरे.”

³³ येसु तीनु काजे जोवाब आप्यू, “मारी आया एने मारा भाश कून छे?”

³⁴ एने तीनुपोरसी जे तेरे आळी-धोळे बोस रोयला होता, नोजोर नाखीन कोयू, “देखू, मारी आश एने मारा भाश जे छे.

³⁵ काहाकि जू कुदू परमेश्वरोन मोर्जीसी चालतलु, चू मारू भाश एने बहोनिश एने आश छे.”