मरकुस 16 - बारेली पावरी

ठारलो मोळवाट्यो

¹ जेतार शब्बाथोन दाहळू जात रोयू, ती मरीयम मगदलीनी, एने याकुबोन आया मरीया, एने सोलोमी ये गोंदायने वावा चीजे मुले लेदा कि आवीन तीना पोर लागाळे.

² हाप्तान पेहेले दाहळे भोव भाकवे सोंदारे वेगात जेतार दाहळू निकवनेत बाज रोयू होतु, चे मोळवाट्यान चा आव्या,

³ एने आपोसमा कोयता होता, “आमरेन कोरीन मोळवाट्यान झोपला पोर गोथू दोगळू कून धोकलसे?”

⁴ जेतार चे डूवा उचा कोऱ्या, ती देख्या कि दोगळू ढोबोवलू छे चू घोनु मोटूत होतु.

⁵ मोळवाट्यामा माहाय जायीन चे एक जुवान काजे धोव्वा छिंदरा पेहरीन जेवळे धोळे बोसलू देख्या, एने घोन जुदा वाहराय गोया.

⁶ चू तीनु काजे कोयू, “वाहरायू मा, तुमु येसु नासरी काजे, यु ख्रुस पोर चोळाव गोयलु होतु, हेरने बाज रोया चू जीव उठलु छे, न्या नि होय; देखू, जी ची जागा छे, जा चे तीना काजे मेकला होता.

⁷ बाकीन तुमु जावू, एने तेरा चेला एने पतरस काजे कोयू कि चू तुमरे गोथू पेहेल गलीलमा जोसुजोसू चू तुमु काजे कोयलु होतु, तुमु चा तीना काजे देखसु.”

⁸ एने चे निकवीन मोळवाट्यामा गोथा ढास गोया; काहाकि कापारी एने बिक तिंदरेमा भोराय गोयली होती; एने चे कुदा काजे काहीन नी कोया, काहाकि बिहीता होता.

मेरीयोमोन येसुक देखनो

⁹ हाप्तान पेहेले दाहळे सोंदारो होयताच चू पोछु जीव उठीन आखान-पेहेले मरीया मगदलीनी काजे जीनीमा गोथी चू सात भुंडली आत्मा निकावलु होतु, देखाय पोळ्यु.

¹⁰ ची जायीन येसुन सातीदारो काजे जे दुखोमा डूब रोया होता एने रोड रोया होता, खोबर कोरीन.

¹¹ चे यो सोमवीन कि चू जीवतेलू छे एने ची तीनाक देखली छे, भुरसू नी कोऱ्या.

दुय चेलाक येसुक देखनो

¹² इनान ओवतेन येसु दिसरा रूपमा तिंदरे मायीन दुय जोना काजे जेतार गाव भूनी जाता होता देखाय पोळ्यु.

¹³ चे बी जायीन दिसरा काजे खोबर कोऱ्या, बाकीन चे तिंदरे पोर बी भुरसू नि कोऱ्या.

मोटली आदेश

¹⁴ पोछु चू ग्यारा जोना काजे बी, जेतार चे खाणो खाणे बोस रोया होता देखाय पोळ्यु, एने तिंदरू अविस्वास एने मोनोन काठला पोर गुणू लागाळयू, काहाकि जे तीनाक जीवतू होयीन उठनेन ओवतेन नाक देखला होता, चे तेरे पोर भुरसू नि कोरला होता.

¹⁵ एने येसु तीनु काजे कोयू, “तुमु आखा जोगोमा जायीन आखा कोवीन माणसो काजे वारली खोबरोन प्रचार कोरू.

¹⁶ जू भुरसू कोरे एने बाप्तिस्मा लेये तेरूत छुटकारू होयसे, बाकीन जू भुरसू नी कोऱ्या चा गुणावा ठेराय जासे.

¹⁷ भुरसू कोरणे वावामा ये चिन्ह होयसे कि चे मारा नावोसी भुंडली आत्मा काजे निकावसे, नोवली-नोवली भाषा बुलसे,

¹⁸ घोळसा काजे चूट लेसे, एने कोदि चे जीव लेनेन चीज बी पी जाये ते बी तिंदरो काहनोत नुकसान नि होये; चे बिमारी वावा पोर हात मेकसे, एने चे वारू होय जासे.”

येसुन सोरगोम हाकलायनो

¹⁹ प्रभू येसु तिंदरे साते वात कोरनेन ओवतेन सोरग पोर चुटाय गोयू, एने परमेश्वरोन जेवळे धोळे बोस गोयू.

²⁰ एने चे निकवीन होर जागे प्रचार कोऱ्या, एने प्रभू तिंदरे साते काम कोरतू रोयू एने तीना चिन्हान लारे यो साते-साते होयतो होतो, वचन काजे मजबूत कोरतू रोयू आमेन.