मरकुस 14 - बारेली पावरी

येसुक मारनेन योजना

¹ दुय दाहळान ओवतेन वोलांडोनोन तीहीवार एने बेखमीर रुटान तीहीवार होयने वावू होतु एने प्रधान पुजारू एने शास्त्री इनी वातोन हेरमा होता कि येसु काजे कोसा धोकू दीन धोरीन मार देजे;.

² बाकीन चे कोयता होता, कि तीहीवारोन दाहळे कोदि ओसो नि होये कि माणसोमा दोंगू होय जाय.

बैतनिय्याह गावमा येसुन अभिषेक

³ जेतार चु बैतनिय्याह गावमा शिमोन कुळावा बिमारी वावान घोर खाणो खाणे बोस रोयू होतु, तेत्यार एक बायोर संगमरमरोन केटलीमा जटामासीन घोनो मोहोंगलो चुखलो इत्तर लीन आवी; एने केटली फुळीन इत्तर काजे तेरे मुनका पोर रेचवी देदी.

⁴ बाकीन काहना माणसे तिंदरा मोनमा रीसवायीन कोयने बाज गोया, “इना इत्तरोन काहा आखो नाश कोराय गोयो?”

⁵ काहाकि यो इत्तर ते तीन सोव दिनार गोथो जादा मोहोंगो वेचीन गरीब काजे वाट सोकता होता, एने चे तिनीक जुर कोरणे बाज गोया.

⁶ येसु कोयू, हीनीक छुळ देवू; हीनीक काहा दोमतेला, होयी ते मारे साते भोलाई कोरली छे?

⁷ गरीब तुमरे साते हमेशा रोयतेला छे, एने तुमुक जेतार जुवे तेत्यार तिंदरी भोलाई कोर सोकतेला बाकीन मे तुमरे साते हमेशा नि रोयो.

⁸ जो काहीन ची कोर सोकी, होयी कोरी; होयी मारो गाळाय जाणेन तीयारी पेहेलेसी मारा डीलोपोर इत्तर लागाळली छे.

⁹ मे तुमु काजे छाचलीन कोयो कि आखा जोगोमा जा का बी वारली खोबरोन प्रचार कोरायसे, चा तेरा इना कामोन वात बी तेरी फोममा कोरायसे.

यहुदान भुरसू घात

¹⁰ तेत्यार यहुदा इस्कारीयोत यु बारा जोना मायलु एक होतु, प्रधान पुजारानचा गोयू कि येसु-काजे इंदरे हाते धोराय देये.

¹¹ चे यो सोमवीन खुश होया, एने तीनाक काजे पोयशा आपनेन वायदु कोऱ्या एने चू टेम हेरने बाज गोयू कि तीनाक काहना रितीसी धोराव दोम.

चेला साते आखरी खाणो

¹² बेखमीर रुटान तीहीवारोन पेहेले दाहळे, जीनामा चे योग्य बलिदान कोरता होता, तेरा चेला तीना काजे पुछ्या, तारी का मोर्जी छे कि आमु जायीन तारेन कोरता तीहीवारोन खाणो खाणे तीयारी कोरजे?

¹³ येसु आपना चेलामा गोथू दुय जोना काजे यो कोयीन मूकल्यु, “सोहोरमा जावू, एने एक माणूस पाणीन डूचरो हाकली रोयलू तुमु काजे भेटायसे, तेरे पोछोव जाजू.”

¹⁴ एने चू जीना घोरमा जाय, तिना घोरन मालिक काजे कोयजू, “गुरु कोये कि मारी पाहांतरायीन जागा जीनामा मे मारा चेला साते तीहीवारोन खाणो खाम का छे?”

¹⁵ ची तुमु काजे घाटावी कोरली, एने तीयार कोरली मोटीत खुली देखाळ देसे, चा आपनेन कोरता तीयारी कोरु.

¹⁶ चेला निकवीन सोहोरोमा आव्या, एने जोसू चू तीनु काजे कोयलु होतु, तोसोच देख्या; एने तीहीवारोन तीयारी कोऱ्या.

¹⁷ जेतार सांतो होयो, ती येसु बारा जोना साते आव्यु.

¹⁸ जेतार चे बोसीन खाणो खाता होता, ती येसु कोयू, “मे तुमु काजे छाचलीन कोयो कि तुमरे मायीन एक, जू मारे पुठी खाणो खाणे बाज रोयू, मेसेक धोरावसे”.

¹⁹ तिंदरेमा नाराजगी आव गोयी एने चे एक-एक जोण तिना काजे कोयने बाज गोया, काय चु मे छे?

²⁰ येसु तीनु काजे कोयू, चू बारा जोना मायन एक छे, जु मारे साते थाविमा हात घालने बाज रोयू.

²¹ काहाकि माणसोन पुऱ्यु ते, जोसो तेरे बारामा लिखलो छे, जातलू छे; बाकीन तिना माणसो पोर हाय जिनान लारे माणसोन पुऱ्यु धोराय जातलू छे बाकीन तिना माणसोन जन्मो नि होयतो, ती तेरेन कोरता वारु होतो.

प्रभू भोज

²² जेतार चे खाणेत बाज रोया होता, चू रुटू लेदू, एने आशिष मांगीन भांग्यू, एने तीनुक आप्यू, एने कोयू, “लेवू यो मारो डील छे.”

²³ ओवतेन चु प्यालू लीन धन्यवाद कोऱ्यु, एने तीनुक आप्यू; एने चे आखा तीनामा गोथा पीदा.

²⁴ एने येसु तीनु काजे कोयू, यो नोवला वायदू मारो चो लुय छे, जो घोना सोवटान कोरता वोयाळाय जातलो छे.

²⁵ मे तुमु काजे छाचलीन कोयो कि आंगुरोन रोस तिने दाहळे तोक ओवी कोबी नी पीयो, जेतार तोक परमेश्वरोन राजमा नोवलो नी पीयो.

²⁶ ओवतेन चे भजन गावीन बारथे जयतुनोन बोयळा पोर गोया.

पतरसोन येसु काजे मना कोरणेन भविष्यवाणी

²⁷ तेत्यार येसु तीनु काजे कोयू, “तुमु आखा ठूकर खासु, काहाकि लिखलो छे, ‘मे राखवाव काजे दिस, एने गाडरा वेरा-वेर होय जासे,’”

²⁸ बाकीन मे खुद जीव उठनेन ओवतेन तुमरे पेहेले गलीलमा जायीस.

²⁹ पतरस तीना काजे कोयू, “अगर आखा ठूकर खाय ती खाय, पुन मे ठूकर नी खाम.”

³⁰ येसु तीनाक कोयू, “मे तुसे काजे छाचलीन कोयो कि आजुत इनी राती कुकळू दुय कावा वासनेन पेहेले, तु तीन कावा मेसे काजे नाकारीस.”

³¹ बाकीन चू ओवी जुर दीन कोयू, “बाकीन मेसेक तारे साते मोरनो बी पोळसे, ते बी मे तारू नाकार कोदि नी कोरो”, इना रितीसी ओवी आखा बी कोया.

गतसमनीमा येसुन प्रार्थना

³² ओवतेन चे गेथसेमोन नावोन एक जागे आव्या, एने येसु आपना चेला काजे कोयू, न्या बोस रोयू, जेतार तोक मे प्रार्थना कोरो,

³³ एने चू पतरस एने याकुब एने योहान काजे तेरे साते लिगोयू; एने घोन जुदु थाक्यू एने कासावीस होयने बाज गोयू,

³⁴ एने तीनु काजे कोयू, “मारो मोन घोनो नोराज छे, न्या तोक कि मे मोरने पोर छे; तुमु न्या रोयू, एने जागता रोयू.”

³⁵ ओवतेन येसु थुलूक ओगू गोयू एने धोरती पोर पोळीन प्रार्थना कोरणे बाज गोयू कि ओगर होय सोके ती जी टेम मारे पोर गोथी टोव जाय.

³⁶ एने कोयू, “हे अब्बा, हे बास, तारेसी सोब काय होय सोकतलो छे, इना प्याला काजे मारेंचा गोथु छेटू कोरले ते बी जोसो मारा मोनोन तोसो नी, बाकीन तारा मोनोन तोसो होये”.

³⁷ ओवतेन चु आव्यु एने तीनु काजे सुवतेला देखीन पतरस काजे कोयू, “हे शिमोन, तू सुव रोयू? काय तू एक घोळीभोर बी नी जाग सोक्यू?”

³⁸ जागता एने प्रार्थना कोरता रोयू कि तुमु परीक्षामा नी पोळे आत्मा ते तीयार छे, बाकीन डील कोमजुर छे.

³⁹ एने चु ओवी जात रोयू एने तीनु बुलोमा प्रार्थना कोऱ्यु.

⁴⁰ ओवी आवीन तीनुक सुवतेला देख्यू, काहाकि तिंदरा डूवा निंदसी भोरला होता; एने नी जानता होता कि तीनाक काय जोवाब आपजे.

⁴¹ एने तिसरे कावा आवीन तीनु काजे कोयू, “हीमी सुवता रोयू एने आराम कोरु, बस, टेम आव लागी; देखू माणसोन पुऱ्यु पापीन हाते धोरवाय जातलू छे.

⁴² उठू, चालू देखू, मेसेक धोरावने वावु साते आव लागलु छे.”

गतसमनीमा येसुक धोरावनो

⁴³ येसु यो कोयनेत बाज रोयू होतु कि यहुदा जू बारा जोना मायलु एक होतु, आपने साते प्रधान पुजारू एने शास्त्री एने पुढारीनचा गोथी एक मोटीत गोरदी लीन तेत्यारुत आव लाग्यू, जे तलवाऱ्या एने लाकळ्या ली रोया होता.

⁴⁴ तीना काजे धोरावने वावू तीनु काजे यु पोतू आपलु होतु कि जीना काजे मे गुवू दोम होयु छे, तिनाक धोरीन सोमावीन ली जाजू.

⁴⁵ चू आव्यु, एने तेत्यारुत तेरेनचा साते जायीन कोयू, “हे रब्बी!” एने तीना काजे घोन सोवटा गुवालेदू.

⁴⁶ तेत्यार चे तीना पोर हात नाखीन तीनाक धोर लेदा.

⁴⁷ तिंदरे मायला जे साते उबरोय रोया होता, एक जोनू तलवार हापकीन महायाजकोन पावोर पोर चालाळ्यु, एने तेरो कानटो काट देदू.

⁴⁸ येसु तीनु काजे कोयू, “काय तुमु डाखू सोमजीन मेसेक धोरणे कोरीन तलवाऱ्या एने लाकळ्या लीन निकवी रोया?”

⁴⁹ मे ते दाहळीन मंदीरमा तुमरे साते रोयीन सिकाळतू होतु, एने तेत्यार तुमु मेसेक नी धोऱ्या बाकीन यो इनान कोरता होयलो छे कि पवित्र शास्त्रन वाते पुरी होये.

⁵⁰ इनापोरसी आखा चेला येसुक छुळीन ढास गोया.

⁵¹ एक जुवान आपना उगाळला डीलोपोर चादरो पांगेरतू जायीन तेरे पोछोव चाल पोळ्यु; एने माणसे तीनाक धोऱ्या,

⁵² बाकीन चु चादरो छुळीन उगाळलुत ढास गोयू.

मोटली सभामा येसु

⁵³ ओवतेन चे येसु काजे महायाजकनचा लीगोया; एने आखा प्रधान पुजारू एने पुढारी एने शास्त्री तेरेनचा एखठा होय गोया.

⁵⁴ पतरस नांबेत नांबे तेरे पोछोव-पोछोव महायाजकोन आंगनान माहाय तोक गोयू, एने तिंदरा साते वावा साते बोसीन आगठे तापणे बाज गोयू.

⁵⁵ प्रधान पुजारू एने आखी मोटली सभा येसु काजे मारनेन कोरता तेरे खिलापमा गोवा हेरता होता बाकीन नि जोळी.

⁵⁶ काहाकि लोकेत जोना तेरे खिलापमा झुटी गोवायी आपता होता, बाकीन तिंदरी गोवायी एकसारखी नि होती.

⁵⁷ तेत्यार कहानला माणसे उठीन तेरे खिलापमा जो झुटी गोवायी आप्या,

⁵⁸ “कि आमु इना काजे यो कोयतेलु सोमवला छे, कि मे इना हातोन बोनावला मंदीर काजे पाळ दिस, एने तीन दाहळामा दिसरो बोनावीस, जो हातसी नि बोनलो होय.”

⁵⁹ इनापोर बी तिंदरी गोवायी एकसारखी नि निकवी.

⁶⁰ तेत्यार महायाजक इचमा उबरोयीन येसु काजे पुछु, “तु काय जोवाब नि आपतू? ये माणसे तारा खिलापमा काय गोवायी आपने बाज रोया?”

⁶¹ बाकीन येसु हुगुत रोयू, एने काहीन जोवाब नि आप्यू महायाजक तीना काजे ओवी पुछु, “काय तू तिना परम सोयावान पुऱ्यु मसिह छे?”

⁶² येसु कोयू, “मे छे” एने तुमु माणसोन पुऱ्या काजे सर्वशक्तिमानोन जेवळे धोळे बोसीन, एने सोरगोन वादवा पुठी आवतेलु देखसु.

⁶³ तेत्यार महायाजक तिंदरा छिंदरा फाळीन कोया, हिमी आमु काजे गोवायीन ओवी काय गोरोज छे?

⁶⁴ तुमु जी बुराई सोमव्या, तुमरू काय इरादू छे? चे आखा कोया कि यु मोरनोन दोंडोन लायक छे.

⁶⁵ तेत्यार कहानास ते तिना पोर थूपणे, एने काहनास तेरो मूय ढाकणे एने तीनाक धुमा देणे, एने तिना काजे कोयने बाज गोया, “भविष्यवाणी कोर” एने सिपायळा तीना काजे धोरीन थापळ्या देदा.

पतरसोन येसुक मना कोरनो एने रोडनो

⁶⁶ जेतार पतरस नेचू आंगनामा होतु, ती महायाजकोन पावरनी मायली एक चा आवी,

⁶⁷ एने पतरस काजे आगठे तापतलु देखीन तीनाक टोक लागाळीन देखी एने कोयने बाज गोयी, “तू बी ते इना नासरी येसुन साते होतु.”

⁶⁸ चु घाबराय गोयू, एने कोयू, “मे नि जानतलु एने नि सोमोजतो कि तू काय कोयने बाज रोयी, बारथे देवळी पोर गोयू; एने कुकळू वासने बाज गोयू,”

⁶⁹ ची पावेरनी तीनाक देखीन तिंदरे साते जे उबरोयला होता, एने कोयने बाज गोयी, “यु इंदरे मायलु एक छे.”

⁷⁰ बाकीन चू ओवी नाकार कोऱ्यु थुलिक वारमा चे जे साते उबरोय रोया होता ओवी पतरस काजे कोया, “छाचलीन तू तिंदरे मायलु एक छे; काहाकि तू गलीली बी छे.”

⁷¹ तेत्यार चू धिक्कारीन एने कोसोम खाणे बाज गोयू, “मे तिना माणसो काजे, जेरी तुमु वात कोर रोया, नि जानतलु,”

⁷² तेत्यार तेत्यारुत दिसरे कावा कुकळू वासने बाज गोयू पतरस काजे जी वात जु येसु तीना काजे कोयलु होतु फोम आवी “कुकळान दुय कावा वासनेन पेहेले तू तीन कावार मारू नाकार कोरीस” एने चू इनी वातोन फोम कोरीन रोडणे बाज गोयू.