मरकुस 13 - बारेली पावरी

येसुन लारे मंदीरोन नाशोन भविष्यवाणी

¹ जेतार चु मंदीरमा गोथू नीकवतु होतु, ती तेरा चेला मायलु एक जोणु तीनाक कोयू “हे गुरु देख, कोसा मोटला दोगळा एने कोसा मोट-मोटा घोरे छे.”

² येसु तीना काजे कोयू, काय तुमु ये मोट-मोटा घोरे देख रोया,? न्या दोगळा पोर दोगळू बि वाचीन नी रोये यु पाळाय नी सोके.

दुख एने पीळा

³ जेतार चू जयतुनोन बोयळा पोर मंदीरोन सामने बोस रोयू होतु, ती पतरस एने याकुब एने योहान एने अन्द्रियास ओलोग जायीन तीना काजे पुछ्या,

⁴ “आमुक कोय कि ये वाते केतार होयसे?” एने जेतार ये आखा वाते पुरा होयने पोर होयसे तिना टेमोन काय चिन्ह होसे?

⁵ येसु तीनु काजे कोये बाज गोयू, “हुशारीमा रोयु कि कुदू तुमु काजे नि फोसाळे.”

⁶ घोना सोवटा मारे नावसी आवीन कोयसे, “कि मे होयु छे” एने घोणा सोवटा काजे फोसाळने.

⁷ जेतार तुमु लोळाय, एने लोळायीन खोबर सोमवसु, ती नि बिहीजू; काहाकि इंदरो होयनो जोरुरी छे, बाकीन तिनी टेमे आखरी नि होये.

⁸ काहाकि जाती पोर जाती, एने राज पोर राज चोढाइ कोरसे. जागो जाग धोरती फाटसे, एने काव पोळसे यो ते पीळान सुरवातुत होयसे.

⁹ “बाकीन तुमु आपना बारामा हुशारीमा रोयू; काहाकि माणसे तुमु काजे मोटला सभान होवाले कोरसे एने तुमु प्रार्थना घोरमा मार खासु, एने मारे वजेसी सुभेदारोन एने राजान ओगोव उबा कोराय जासे, काहाकि तिंदरेन कोरीन गोवा होये.”

¹⁰ बाकीन जोरुरी छे कि पेहेले वारली खोबरन आखा जातीमा प्रचार कोराय जासे.

¹¹ जेतार चे तुमु काजे लीजायीन होवाले कोरसे, ती पेहेलेसी चिंता नि कोरजू कि आमु काय कोयसू; बाकीन जो काय तुमु काजे तिनी टेमे देखाळसे चो काहनो; काहाकि बुलणे वावा तुमु नि होय, बाकीन पवित्र आत्मा छे.

¹² भाश काजे भाश, एने बास काजे पुऱ्यु मारनेन कोरीन होवाले कोरसे, एने पुऱ्या आसी-बासान खिलापमा उठीन तीनु काजे माराय देसे.

¹³ एने मारा नावोन वोजेसी आखा माणसे तुमरे पोर खिलाप कोरसे; बाकीन जु आखरी तोक धीर धोर रोयसे, तिंदरू छुटकारू होयसे.

मोटला दुखन टेम

¹⁴ आखरी जेतार तुमु तिना उजाळने वावी विटाव चीज काजे जा वारू नि होय चा उबरोयली देखू, (भोनने वावा सोमजी लेजू) तेत्यार जे यहुदिमा होय, चे बोयळा पोर दोवळी पोळे.

¹⁵ जे छोत पोर होय, चे आपने घोर गोथा काहीन लेणे कोरीन नेचा नि उतरे एने नि माहाय जाय;

¹⁶ एने जे खेतोमा होय, चे आपना कापळा लेणे कोरीन पोछा नी आवे.

¹⁷ तीनु दाहळामा जे भारीस एने दुध पावती होसे, तीनुन कोरीन हाय, हाय,

¹⁸ एने प्रार्थना कोरता रोयू कि यो सिवोमा नि होये.

¹⁹ काहाकि चे दाहळा ओसा दुखोवावा रोयसे कि जोगोन सुरुवातशी, यो परमेश्वरोन बोनावलो छे, हिमी तोक नि ते होयो एने नि एने कोबी होयसे.

²⁰ ओगर प्रभू तीनु दाहळा काजे नि घोटाळतू, ती कुदू प्राणी बी धोरती पोर नि वाचता; बाकीन इनू प्रेषितोन वजेसी जीनु काजे येसु नेवाळलु छे, इनू दाहळा काजे घोटाळयू.

²¹ इनी टेमे हीमी कुदू तुमु काजे कोये, “देखू, मसिह न्या छे,” नीती “देखू, वा छे,” ती भुरसू झुन कोरता.

²² काहाकि झुटा मसिह एने झुटा भविष्य कोरता उठीन उबरोय से, एने चिन्हा एने चमत्कारी काम देखाळसे कि ओगर होय सोके ती नेवाळला काजे बी फोसाळ देसे.

²³ बाकीन तुमु हुशारीमा रोयू; देखू, मे तुमु काजे आखा वाते पेहेलेसी कोय देदलु छे.

येसुन पोछो आवनो

²⁴ तीनु दाहळामा, तीनु तोकलीतोन ओवतेन दाहळू आंदारू होय जासे, एने चांद विजावो नि आपे;.

²⁵ एने सोरगोमा गोथा तारा पोळने बाज जासे; एने सोरगोन ताकत हालवाय जासे.

²⁶ तेत्यार माणसे माणसोन पुऱ्या काजे मोटी ताकत एने महीमा साते वादवामा आवतेलु देखसे.

²⁷ तिनी टेमे चु आपना सोरग दूतो काजे मुकलीन, धोरतीन इनी धोळे गोथो सोरगोन पोल धोळे तोक, चारू धोळे गोथा आपना नेवाळला माणसो काजे एखठा कोरसे.

गुलोर झाडोन दाखलू

²⁸ गुलोरोन झाडोसी यु दाखलू सिकू जेतार तेरी डाव कोवोव्वी होय जातली, एने पाला निकोवने लाग जातला; ती तुमु जान जातला कि उनावू साते छे.

²⁹ इनी रितीसी जेतार तुमु इनी वातो काजे होयतेली देखसु, ती जान लेवू कि चु साते छे पुन झोपलेत छे.

³⁰ मे तुमु काजे छाचलीन कोयो कि जेतार तोक ये आखा वाते नि होये, तेत्यार तोक ये माणसे जाती नि रोये.

³¹ सोरग एने धोरती टोव जासे, बाकीन मारी वाते कोबी नि टोवे.

जागता रोयू

³² “तिने दाहळे नीती तिनी टेमोन बारामा कुदु नी जानतलु, नि सोरगोन दूत, एने नी पुऱ्यु; बाकीन निस्तू बास.”

³³ देखू, जागता एने प्रार्थना कोरता रोयू; काहाकि तुमु नि जानतेला कि ची टेम कोत्यार आवसे.

³⁴ यो तिना माणसो तोसी हालत छे, जु पोरदेश जाणेन टेमे आपनो घोर छुळीन जाय, एने आपना पावोर काजे होक आप देय; एने होर एक जोना काजे तेरो काम देखाळ देये, एने राखवाव काजे जागतू रोयनेन आग्या आपे.

³⁵ इनान कोरता जागता रोयू, काहाकि तुमु नि जानतला कि घोरोन मालिक कोत्यार आवसे, सांतू नीती आदी राती, नीती कुकळा वासनेन टेमे नीती सोंदारे वेगूत.

³⁶ ओसो नि होयनो जुवे कि चू उचकालुन आवीन तुमु काजे सुवतेला देखे.

³⁷ एने यो मे तुमु काजे कोय कि, चोत आखा काजे कोय, “जागता रोयू.”