मरकुस 10 - बारेली पावरी

वियावोन एने छुळनेन वारामा

¹ ओवतेन येसु चा गोथू उठीन यहुदियान हदमा एने यरदन नोंदीन पोरले धोळे आव्यु गोरदी तेरेनचा आवीन एखठी होय गोयी, एने येसु तेरी रिती नुसार तीनु काजे ओवी सिकाळने बाज गोयू.

² तेत्यार फरुशी तीना साते आवीन तेरी पारोक कोरीन तीना काजे पुछ्या, “काय यो वारू छे कि ओदमी आपनी लाडी काजे छुळे?”

³ चू तीना काजे जोवाब आप्यू, “मुसा तुमु काजे काय आग्या आपलु छे?”

⁴ चे कोया, “मुसा छुट चिट्ठी लिखने एने छुळनेन आग्या आपलु छे.”

⁵ येसु तीनु काजे कोयू, “तुमरा मोनोन काठलान वोजेसी चू तुमरेन कोरता जी आग्या लिख्यू.

⁶ बाकीन कोव बोनावनेन टेमे परमेश्वर नोर एने नारी कोरीन तीनु काजे बोनावलु छे.

⁷ एरे वोजेसी माणूस आपना आसी-बासासी ओलोग होयीन आपनी लाडी पुठी रोयसे, एने चे दुय एक डील होयसे;.

⁸ इनान कोरता चे हिमी दुय नि बाकीन एक डील छे.

⁹ इनान कोरता जीना काजे परमेश्वर जुळलू छे तीना काजे माणूस ओलोग नि कोरनो.”

¹⁰ एने घोरमा चेला एरा बारामा येसु काजे ओवी पुछ्या.

¹¹ चू तीनु काजे कोयू, “जू कुदू आपनी लाडी काजे छुळीन दिसरी पुठी वियाव कोरसे ती चू तिनी पेहेलीन खिलापमा व्यभिचार कोरतेलू.”

¹² एने जेतार लाडी आपना पाहणा काजे छुळीन दिसरा साते वियाव कोरे ती ची व्यभिचार कोरतेली.

पुऱ्या एने सोरगोन राज

¹³ ओवतेन माणसे पुऱ्या काजे तेरेनचा लावणे बाज गोया कि चू तिंदरे पोर हात मेके, बाकीन चेला तीनु काजे लोडणे बाज गोया.

¹⁴ येसु यो देख्यू रीसवायीन तीनु काजे कोयू, “पुऱ्या काजे मारेंचा आवने देयू एने तीनु काजे मोना मा कोरू, काहाकि परमेश्वरोन राज ओसला जून छे.

¹⁵ मे तुमु काजे छाचलीन कोयो कि जो कुदू परमेश्वरोन राज काजे पुऱ्या सारको स्वीकार नि कोरे, चू तीनामा कोबी नि जाय सोके.”

¹⁶ एने चू तीनु काजे खुवामा लेदू, एने तिनु पोर हात मेकीन तीनु काजे आशिष आप्यू.

मालदार पुऱ्यु एने परमेश्वरोन राज

¹⁷ जेतार चू चा गोथू निकवीन वाटे जातु होतु, ती एक माणूस तेरेनचा दोवळीन आव्यु, एने तेरे ओगोव मांडा टेकविन तीना काजे पुछु, “हे वारला गुरु, ओमोर जीवनोन ओधीकारी होयनेन कोरता मे काय कोरो?”

¹⁸ येसु तीना काजे कोयू, “तू मेसेक वारला काहा कोयतेलु? कुदू वारला नि होय, निस्तु एक छे मतलब परमेश्वर,

¹⁹ तु आग्या काजे ते जानतलु छे, ‘खुन नि कोरनो, व्यभिचार नि कोरनो, चुरी नि कोरनो, झुटी गोवा नि आपनो, बुराई नि कोरनो, आपना बासोन एने आपनी आशोन मान कोरनो.’”

²⁰ चू तीना काजे कोयू, “हे गुरु, इना आखा काजे मे नानलु होतु तिहिन मानतू आव रोयू.”

²¹ येसु तिना पोर नोजोर नाखीन तीना पोर मोंग कोऱ्यु, एने तीना काजे कोयू, “तारेमा एक वातोन कोमी छे जा जो काहीन तारो छे तीना काजे वेचीन गोरीबो काजे आप दे, एने तुसे काजे सोरगोमा धोन जोळसे, एने आवीन मार पोछोव चाल.”

²² इनी वातो पोरसी तेरो मुय नोराज होय गोयो, एने चू दुख कोरतू जात रोयू, काहाकि चू घोनु मालदार होतु.

²³ येसु चारू धोळे भावीन आपना चेला काजे कोयू, “मालदारोन परमेश्वरोन राजमा जाणेन कोरता कोसो काठो छे.”

²⁴ चेला तेरी वातोसी वाहराय गोया इना पर सी येसु एने तीनु काजे कोयू, “हे पुऱ्या, जू धोनोपोर भुरसू राखतेलू, तिंदरेन कोरता परमेश्वरोन राजमा जानो कोसो काठो छे.

²⁵ परमेश्वरोन राजमा मालदारोन जानेसी उटळान सुयोन नाचकामा गोथो निकवीन जाणो सोपो छे.”

²⁶ चे घोन जुदा वाहरायीन एक दिसरा काजे कोयने बाज गोया, “ती ओवतेन कुनीन छुटकारू होय सोकसे?”

²⁷ येसु तिंदरे भुनी भावीन कोयू, “माणसोसी ते यो नि होय सोकतेलो, बाकीन परमेश्वर सी होय सोकतेलो; काहाकि परमेश्वर सी आखो काहीन होय सोकतेलो.”

²⁸ पतरस तीना काजे कोयने बाज गोयू, “कि देख, आमु ते आखो काय छुळीन तारे पोछोव आवला छे.”

²⁹ येसु कोयू, “मे तुमु काजे छाचलीन कोयो कि ओसो कुदू नि होय, जू मारे एने वारली खोबरन कोरता घोर एने भाशोक एने बहोनिशाक एने आशोक एने बासोक एने पुऱ्या-पारीक एने खेतोक छुळ देदला छे,

³⁰ एने हिमी इनी टेमे सोव गुणा नि जोळे, घोरे एने भाशे एने बहोनिशा एने आया एने पुऱ्या-पारी एने खेतो काजे, एने तोकलीतो साते एने आवने वावा संसारमा ओमोर जीवन.

³¹ बाकीन लोकेत जे पेहेला छे, पोछोव होय जासे; एने जे पोछोव छे, चे पेहेल होय जासे.”

येसुन मोरनेन तिसरी भविष्यवाणी

³² येसु एने हेरा चेला यरुशलेममा जानेण वाटे होता, एने येसु तिंदरे ओगोव-ओगोव जातु होतु चे वाहराय गोयला होता एने चे तेरे पोछोव-पोछोव चालता होता चे बिह गोयला होता तेत्यार येसु ओवी तीनु बारे जोनाक लीन तीनु काजे चे वाते कोयने बाज गोयू, जी तीना पोर आवने वावी होती,

³³ “देखू, आमु यरुशलेममा जाने बाज रोया, एने माणसोन पुऱ्यु प्रधान पुजारान एने शास्त्रीन हाते धोरवाय जासे, एने चे तीना काजे घात कोरनेन सही ठेरावसे, एने दिसरा जातीन हातोमा आप देसे.

³⁴ एने चे तीना काजे मोजाकमा उळावसे, एने तिना पोर थूपसे, एने तीना काजे चापका मार से एने तेरु जीव लेसे, एने तीन दाहळामा चू पोछु जीवतु होय जासे.”

याकुब एने योहानोन विनता

³⁵ तेत्यार जब्दिन पुऱ्यु याकुब एने योहान तेरेनचा आवीन कोया, “हे गुरु, आमरी मोर्जी छे कि जो काहीन आमु तार जु मागजे, चो तू आमरेन कोरता कोर.”

³⁶ चू तीना काजे कोयू, “तुमु काजे काय जुवे कि मे तुमरेन कोरता कोरो?”

³⁷ चे तीना काजे कोया, “आमु काजे यो आप कि तारी महिमामा आमरे मायीन एक तारे जेवळे एने दिसरू तारे डाखरे बोसे.”

³⁸ येसु तीनु काजे कोयू, “तुमु नि सोमोजतेला कि काय मांगणे बाज रोया? जो प्यालू मे पिणे वावु छे, काय तुमु पी सोकसू? एने जु बाप्तिस्मा मे लेणे वावु छे, काय तुमु ली सोकसू?”

³⁹ चे तीना काजे कोया, “आमरेसी होय सोकसे” येसु तीनु काजे कोयू, “यो प्यालू मे पीने वावु छे; तुमु पिसू एने जू बाप्तिस्मा मे लेणे वावु छे, चू लेसू.

⁴⁰ बाकीन जिनान कोरीन तीयार कोरलु छे, तीना काजे छुळीन एने कुदा काजे मारे जेवळे एने डाखरे बोसाळनेण मारो काम नि होय.”

⁴¹ यो सोमवीन दोस याकुब एने योहानपोर रीसवाया.

⁴² एने येसु तीनु काजे साते बुलावीन तीनु काजे कोयू, “तुमु सोमेजतेला कि जे दिसरा जातीन सुबेदार सोमोजतेला, चे तीनु पोर हुकुम कोरतेला; एने तिंदरेमा जे मोटला छे, तिंदरे पोर होक चालाळतेला.

⁴³ बाकीन तुमरेमा ओसा नि होय, नीती जू कुदू तुमरेमा मोटू होयनेन देखे चु तुमरू सेवक बोने.

⁴⁴ एने जु कुदू तुमरेमा प्रधान बोनने देखे, चू तुमरू पावोर बोनने जुवे.

⁴⁵ काहाकि माणसोन पुऱ्यु इनान कोरता नि आव्यु कि तेरी सेवा चाकरी कोरावने, बाकीन इनान कोरता आव्यु कि खुद सेवा कोरे, एने घोणा सोवटा काजे छुळावनेन कोरता तेरु जीव आपने.”

आन्दवा बर्तीमाय काजे देखायनो

⁴⁶ एने चे यरीहो सोहोरोमा आव्या, एने जेतार चू एने तेरा चेला, एने एक घोनी मोटी गोरदी यरीहोमा गोथी निकवती होती, तेत्यार तिमाईन पुऱ्यु बरतिमाई एक आंदवू भिकारी, वाटी धोळे बोस रोयू होतु.

⁴⁷ चू जो सोमवीन कि येसु नासरी छे, आयळीन-आयळीन कोयने बाज गोयू, “हे मसिह दाऊदन पुऱ्या, येसु मार पोर दया कोर.”

⁴⁸ लोकेत जोना तीना काजे दोटाव्या कि हुग रोय, बाकीन चू एने आयळने बाज गोयू, “कि हे दाऊदन पुऱ्या, मार पोर दया कोर”

⁴⁹ तेत्यार येसु उबरोयीन कोयू, “हिना काजे बुलावू” एने माणसे तीना आंदवा काजे बुलावीन तीना काजे कोया, “हिंमत बाद! उठ! चू तुसेक बुलावे.”

⁵⁰ चू तेरा कापळा नाखीन मामार उठ्यू, एने येसुनचा आव्यु.

⁵¹ इनापोरसी येसु तीना काजे कोयू, “तारी काय मोर्जी छे कि मे तारेन कोरता कोरो?” आंदवू तीना काजे कोयू, “हे रब्बी, यो कि मे देखणे बाजजाम.”

⁵² येसु तीना काजे कोयू, “जात रोय तारु भुरसू तुसेक वारू कोरलु छे” चू तेत्यारुत देखणे बाज गोयू, एने वाटे तेर पोछोव चाल देदू.