मरकुस 1 - बारेली पावरी

बाप्तिस्मा आपने वावु योहानोन संदेश

¹ परमेश्वरोन पुऱ्यु येसु मसिहन बारामा वारली खोबरोन प्रचारोन सुरवात.

² जोसो यशयाह भविष्य कोरतान किताबमा लिखलो छे “देख, मे मारा दुतो काजे तारे ओगोव मुकलो, चू तारे जुगू वाट सुधारसे

³ बोयळामा एक आयळने वावान आवाज सोमवायने बाजीरोय कि, प्रभून वाट तीयार कोरु, एने तेरी वाट सुदी कोरु.”

⁴ एने योहान आयु, चू बोयळामा बाप्तिस्मा आपे, एने पापोन माफीन कोरता मोन फिरावनेन बाप्तिस्मान प्रचार कोरतू होतु.

⁵ आखा यहुदिया देसोन, एने यरुशलेमोन आखा रोयने वावा निकवीन तेरेनचा गोया, एने तिंदरा पापो काजे मानीन यरदन नोंदीमा तेरे जुव बाप्तिस्मा लेदा.

⁶ योहान उटळान चामळान छिंदरा पेहेरलु एने खुदोन कोड्यामा चामळान पोटटू बांदलू राखतू होतु, एने टीड्या एने बोयळा मायला माहावे खातू होतु.

⁷ एने यु प्रचार कोरतू होतु, “मारे पोछोव चू आवने वावु छे, जू मारे गोथू ताकत वावू छे” मारी लायकी नि होय कि मे ढोंगु वोवीन तेरा खासळान बोंद छुळो.

⁸ मे ते तुमु काजे पाणीसी बाप्तिस्मा आपलु छे बाकीन “चू तुमु काजे पवित्र आत्मान बाप्तिस्मा आपसे.”

येसुन बाप्तिस्मा

⁹ तीनु दाहळामा येसु गलील देसोन नासरेथ गावमा गोथू आवीन, यरदन नदीमा योहानोसी बाप्तिस्मा लेदू.

¹⁰ एने जेतार चू पाणीमा गोथू निकवीन उपोर आव्यु, ती तेत्यारूत चू सोरग उगेळतलो एने आत्मा काजे पेरवा सारको तेरेपोर उतरतेलु देख्यू.

¹¹ एने ओसी सोरगोन बुल होयी, “तू मारू मोंगावू पुऱ्यु छे, तारेसी मे खुश छे.”

येसुन पारख

¹² तेत्यार आत्मा तेत्यारूत येसु काजे बोयळा भूनी मूकल्यु.

¹³ बोयळामा चावीस दाहळा तोक भुतडू तेरी परीक्षा कोऱ्यु; एने चू बोयळा मायला जोनावर साते रोयू, एने सोरग दूत तेरी सेवा कोरता रोया.

गलीलमा येसुन प्रचार

¹⁴ योहान काजे धोरावनेन ओवतेन येसु गलीलमा आवीन परमेश्वरोन राजोन वारली खोबरोन प्रचार कोऱ्यु,

¹⁵ एने कोयू, “टेम पुरी होय गोयली छे, एने परमेश्वरोन राज साते आव गोयलो छे; मोन फिरावू एने वारली खोबर पोर भुरसू कोरू.”

चार माछल्यान बुलावनो

¹⁶ गलीलोन दरियान धोळे-धोळे चालतू जाईन येसु शिमोन एने तेरु भाश अन्द्रियास इनू काजे दोरीयामा जावे नाकतेला देख्यू; काहाकि चे माछ्ल्या होता.

¹⁷ एने येसु तीनु काजे कोयू, “मारे पोछोव आवू; मे तुमु काजे माणसे धोरणे वावा बोनावीस.”

¹⁸ चे तेत्यारुत जाव्या छुळीन तेरे पोछोव चाल पोळ्या.

¹⁹ थुलूक ओगू जायीन, चू जब्दिन पुऱ्यु याकुब, एने तेरु भाश योहान काजे, ढोंड्यामा जाव्या सुधारतेला देख्यू.

²⁰ चू तेत्यारुत तीनु काजे बुलाव्यू; एने चे तिंदरा बास जब्दि काजे दाहळक्या साते ढोंड्यामा छुळीन, येसु पोछोव चाल पोळ्या.

भुंडली आत्मा लागला माणसोक वारू कोरनो

²¹ तेत्यार चे कफर्णहुममा आव्या, एने येसु तेत्यारुत शब्बाथोन दाहळे प्रार्थना घोरमा जायीन भोनावने बाज गोयू.

²² एने माणसे तेरो भोनावनेसी वाहराय गोया; काहाकि चू शास्त्री सारको नी, बाकीन अधिकारी सारकू भोनावतू होतु.

²³ तीने टेमे, तिंदरा प्रार्थना घोरोमा एक माणूस होतु, जीनामा एक भुंडली आत्मा होती.

²⁴ चू आयळीन कोयू, हे येसु नासरेथकर, आमुक तारेसी काय काम? “काय तू आमुक नाश कोरने आवलु छे? मे तुसेक जानतलु, तू कुन छे परमेश्वरोन चुखलु जन.”

²⁵ येसु तीना काजे धोमकावीन कोयू, हुगु रोय, एने हिनामा गोथू निकवी जा.

²⁶ तेत्यार भुंडली आत्मा तीनाक पिव्वीन, एने मोटेत ओवाजसी आयळीन तीनामा गोथी निकवी गोयी.

²⁷ इनापोरसी आखा माणसे वाहरायता जायीन एक दिसरा काजे पुछने बाज गोया, “जी काय वात छे? यो ते काहनो नोवलो भोनावनेसी छे! चू ते होकसी भुंडली आत्मा काजे बी आग्या आपतलु, एने चे तेरी आग्या मानतेला.”

²⁸ एने तेरो नाव तेत्यारुत जे गलीलोन जिल्लान आस पासोन आखा देसमा फेल गोयो.

मांदला काजे वारू कोरनो

²⁹ एने चू तेत्यारुत प्रार्थना घोरमा गोथू निकवीन, याकुब एने योहानोन साते शिमोन एने अन्द्रियास घोर आव्या.

³⁰ शिमोनोन सासू काजे सेरी चोळ रोयलो होतो, एने चे मामार तेरे बारामा तीना काजे कोया.

³¹ तेत्यार येसु साते जायीन तेरु हात धोरीन तिनी काजे उठाळ्यू; एने तेरो सेरी उतरी गोयो, एने ची तेरी सेवा कोरणे बाज गोयी.

³² सांतली टेमे जेतार सूर्य डूब गोयू ती माणसे आखा बिमारी वावा काजे एने तीनु काजे, जिंदरेमा भुंडली आत्मा होती, तेरेनचा लाव्या.

³³ एने आखो गाव झोपला पोर एखठा होया.

³⁴ चू घोन सोवटा काजे जे भाती भातीन बिमारीसी दुखी होता, वारू कोऱ्यु, घोन सोवटा भुंडली आत्मा काजे निकाव्यू, एने भुंडली आत्मा काजे बुलने नी देदू, काहाकि ची तीनाक उवखती होती.

एखलामा येसुन प्रार्थना

³⁵ वेगुत सोंदारे सूर्य उगनेन घोनो पेहेल, चू उठीन निकव्यू, एने एक बोयळान जागे गोयू एने चा प्रार्थना कोरणे बाज गोयू.

³⁶ तेत्यार शिमोन एने तेरा साती तीना काजे हेरने गोया.

³⁷ जेतार चू जोळ्यू ती तीना काजे कोया, “आखा माणसे तुसे काजे हेरने बाज रोया”.

³⁸ चू तीनु काजे कोयू, “आवू; आमु एने कानली आस पासोन वस्तीमा जाजे, कि मे चा बी प्रचार कोरो, काहाकि मे इनान कोरता निकवलू छे”.

³⁹ आखरी चू आखा गलीलमा तिंदरा प्रार्थना घोरोमा जायीन प्रचार कोरतू एने भुंडली आत्मा काजे निकावतू रोयू.

कुळावा काजे वारू कोरनो

⁴⁰ एक कुळावू तेरेनचा आव्यु, तीना काजे विनता कोऱ्यु, एने तेरे ओगोव माडा टेकविन तीना काजे कोयू, अगर तारी मोर्जी होय ती मेसेक चुखू कोर सोकतलु.

⁴¹ चू तीना पोर गिन कोरीन हात ओगु कोऱ्यु, एने तीना काजे छिमीन कोयू, “मारी मोर्जी छे तू चुखू होय जा.”

⁴² एने तेत्यारुत तेरो कुळावान बिमारी जाने बाज गोयी, एने चू चुखू होय गोयू.

⁴³ तेत्यार चू तीना काजे जोताळीन तेत्यारुत मुकली देदू,

⁴⁴ एने तीना काजे कोयू, “देख, कुदा काजे काहीन झुन कोयतू, बाकीन जायीन खुदो काजे पुजारू काजे देखाळ, एने तारो चुखो होयनेन बारामा जो काय मुसा ठेरावलू छे तीनाक भेट चोळाव कि तीना पोर गोवायी होयनो जुवे.”

⁴⁵ बाकीन चू बारथे जायीन इनी वातो काजे जादा प्रचार कोरणे एने न्या तोक फेलावने बाज गोयू कि येसु एने उजोनतु सोहोरोमा नी जाय सोक्यू, बाकीन बारथे बोयळान जागामा रोयू; एने चारू धोळे गोथा माणसे तेरेनचा आवता रोया.