मत्ती 7 - बारेली पावरी

गुणू मा लागाळू

¹ “गुणू मा लागाळू ती तुमरे पोर बी गुणू नि लागाये.

² काहाकि जिना रितीसी तुमु गुणू लागाळतला, तिना रितीसी तुमरे पोर बी गुणू लागाळाय जासे; एने जिना मापोसी तुमु मापसु, तीना मापोसी तुमरेन कोरता मापाय जाये.

³ “तू काहा तारा भाशोन डूवान कोचरा काजे देखतलु, एने तारा डूवान कोचरू नी सोमजतू?”

⁴ जेतार तारात डूवामा कोचरू छे, ती तू तारा भाशो काजे कोसु कोय सोकतलु, “लाव मी तारा डूवान कोचरू निकाव दोम?”

⁵ हे दोगावा, पेहेले तारा डूवामा गोथो मूसवो नीकाव ले, तेत्यार तू तारा भाशोन डूवान कोचरु वारला रितीसी देखीन निकाव सोकीस.

⁶ “चुखला चीजे कुत्रा काजे मा आपु, एने आपना मोती सुवऱ्या ओगोव मा नाखू; ओसो नि होये कि चे तीनाक पायो तोवे रोंदवे एने पोछा पोलटीन तुमु काजे फाळ नाखे.”

परमेश्वर जु मांगनो एने हासील कोरनो

⁷ “मांगु ती तुमुक आपायसे; हेरु ती तुमुक जोळसे; ठूकु ती तुमरेन कोरीन उगळी जासे.

⁸ काहाकि जू कुदू मांगतलु, तीनाक आपनेमा आवसे; एने जू हेरतलु, तीनाक जोळतलो; एने जू ठूकतलु तेरेन कोरीन उगळाय जासे.”

⁹ “तुमरेनचा ओसू कून माणूस छे, कि ओगर तेरु पुऱ्यु रुटू मांगे, ती चू तीनाक दोगळू आपे?”

¹⁰ नि ती माछो मांगे ती तीनाक घोळसु आपे?

¹¹ ती जेतार तुमु भुंडा होयीन बी, आपना पुऱ्या काजे वारला चीजे आपने जानतेला, ती तुमुक सोरगोन बास तेरे जूव मांगणे वावा काजे वारला चीजे काहा नि आपे?

¹² इनान वोजेसी जो काहीन तुमुक लागे कि माणसे तुमरे साते कोरे, तुमु बी तिंदरे पुठी तोसोच कोरु; काहाकि शास्त्रान आग्या एने भविष्य कोरतान शिकवन जीत छे.

साकळी एने चोवळी वाट

¹³ “साकळले वाटे जाणेन कोरु, काहाकि चोवळू छे चु झोपलू एने सुदी से जी वाट जी नाश काजे पुगाळतली एने घोणा जोना से जे तीनामा जाणेन कोरतेला.

¹⁴ काहाकि साकेळलु चू झोपलु एने काठली छे वाट जी जीवन काजे पुगाळतली; एने थुलाक जोन छे जे तीनुक जोळतली.

जोसो झाड तोसो फोव

¹⁵ “झुटा भविष्य कोरतासी हुशारीमा रोयू, जे गाडरान भेसमा तुमरेनचा आवता, बाकीन ओवतेन चे फाळनेवावा कुल्या छे.”

¹⁶ तिंदरा फोवो पोरसी तुमु उवखी लेसु. काय माणसे झाडक्यामा गोथा आंगुरोन नीती झळबेरीमा गोथो गुलोर तुडतला?

¹⁷ इना रितीसी होर एक वारलो झाड वारलो फोव आपतलो एने बिन कामोन भुंडलो फोव लावतलो.

¹⁸ वारलो झाड भुंडलो फोव नी लाव सोकतलो, एने नी बिन कामोन झाड वारलो फोव लाव सोकतलो.

¹⁹ यो झाड वारलो फोव नि लावतलो, चो काटायीन आगठामा नाखायतलो.

²⁰ इना रितीसी तिनान फोवोसी तुमु तीनुक उवेखसु.

²¹ “जे मेसेक, हे प्रभू! हे प्रभू! कोयतेला तिंदरे माहीन होर एक जोन सोरगोन राजोमा नी जाय, बाकीन चेत जे मारा सोरगोन बासोन मोर्जी पोर चालतला,

²² तिने दाहळे माणसे मेसेक कोयसे हे प्रभू, हे प्रभू, काय आमु तारा नावोसी भविष्यवाणी नि कोऱ्या, एने तारा नावोसी भुंडली आत्मा काजे नि निकाव्या, एने तारा नावोसी लोकेत मोटला कामे कोऱ्या?”

²³ तेत्यार मे तीनु काजे खुलीन कोय दिस, मे तुमु काजे कोबी नि उवेखतलु, हे भुंडला कामे कोरणे वावा, मारेनचा गोथा जात रोयू.

ओकोल वावु एने बिन ओकल्यु माणूस

²⁴ इनान कोरता जू कुदू मारी वाते सोमवीन तीनुक मानतला, छे इना ओकोलवावा माणसो सारखु ठेरायसे जू आपनो घोर एक चाफऱ्या पोर बांध्यू.

²⁵ एने मोटलु पाणी पोळ्यु, एने पाणी वोयीन आयो, एने आंजी आवी, एने घोरो काजे आपठायी, ते बी चो नी पोळ्यो, काहाकि तेरु, पायु चाफऱ्या पोर बांधलु होतु.

²⁶ बाकीन जु कुदु मारा ये वाते सोमवतला एने तिनान अनसारे नि चालतला, चे तिना बिन ओकल्या माणसो सारखा ठेरायसे जू तेरो घोर रेवतामा बांध्यू.

²⁷ एने पाणी पोळ्यु एने खुदरा आया, एने आंजी आवी, एने तीना घोरो काजे आपठायी एने चे पोळीन सत्यानाश होय गोयो.

²⁸ जेतार येसु ये वाते कोय देदु, ती ओसो होयो कि भीळ तेरा सिकाळना पोरसी वाहराय गोया,

²⁹ काहाकि चू तीनुक शास्त्री सारखु नी बाकीन अधिकारी सारकू सिकाळतू होतु.